Ascorbic acid ဟု လူသိများသော ရေတွင်ပျော်ဝင်နိုင်သည့် ဗီတာမင်တစ်မျိုးဖြစ်သည့် ဗီတာမင် စီ သည် ခန္ဓာကိုယ်၏ ခုခံအား စနစ်ကို ထောက်ပံ့ပေးသည့်နေရာတွင် အဓိက အရေးကြီးသည့် အခန်းကဏ္ဍမှ ပါဝင်နေပါသည်။
သုတေသန လေ့လာတွေ့ရှိချက်များအရ ဗီတာမင် စီ သည် ခန္ဓာကိုယ် တစ်ခုလုံးတွင်ရှိသော တစ်ရှူးများ ကြီးထွားခြင်းနှင့် ပြန်လည်ပြင်ဆင်ခြင်းတို့ အတွက် မရှိမဖြစ် အရေးပါလှပါသည်။
အနာကောင်းစွာကျက်ရန်အတွက် အရေးပါသကဲ့သို့ ခန္ဓာကိုယ်ရှိ အရိုးများ၊ သွားများ၊ အရိုးနုများနှင့် အရေပြားများ ကျန်းမာကြံ့ခိုင်ရေးနှင့် ပြုပြင်ပြင်ဆင်ရေးတို့အတွက် အကူအညီ များစွာပေးပါသည်။
Antioxidant တစ်မျိုးဖြစ်သော ဗီတာမင် စီ သည် ခန္ဓာကိုယ်အတွင်းမှ free Radicals များကို တိုက်ခိုက်ပေးသောကြောင့် အသက်အရွယ်ကြီးရင့်မှုနှင့်အတူ ဖြစ်ပေါ်လာတတ်သည့် ကင်ဆာရောဂါများ၊ နှလုံးရောဂါများ ကိုလည်း ကာကွယ်ပေးနိုင်ပါသည်။
ထို့အပြင် အရိုးအဆစ်ရောင်ရမ်းသော ရောဂါများတွင်လည်း အရိုးနုများ ပျက်စီးဆုံးရှုံးခြင်းကိုလည်း ဗီတာမင် စီ က လျှော့ချ ပေးနိုင်ပါသည်။
အအေးမိ၊ နှာစီးရောဂါများကိုလည်း ဗီတာမင် စီက လျင်မြန်စွာ ပျောက်ကင်းစေရန် အကူအညီပေးနိုင်ကြောင်း လေ့လာတွေ့ရှိရပါသည်။
သို့သော် ဗီတာမင် စီ ကို ခန္ဓာကိုယ်မှ ထုတ်လုပ်နိုင်ခြင်းမရှိသည့်အတွက်ကြောင့် နေ့စဉ်စားသုံးသော အစားအစာများထဲမှ ဗီတာမင် စီ ကိုရယူရပေသည်။
နေ့စဉ်စားသုံးသော အသီးအနှံများနှင့် ဟင်းသီးဟင်းရွက်များတွင် ဗီတာမင် စီ ပါဝင်လေ့ရှိပါသည်။
– အချဉ် အရသာရှိသော အသီးအနှံများ
– ခရမ်းချဉ်သီး
– အာလူး
– စတော်ဘယ်ရီ
– ငရုတ်ပွအစိမ်းနှင့် ငရုတ်ပွအနီ
– ဘရိုကိုလီ
– ကီဝီသီး အစရှိသော သစ်သီးများနှင့် ဟင်းသီးဟင်းရွက်များတွင် ဗီတာမင် စီ ပါဝင်လေ့ရှိပါသည်။
ထိုဟင်းသီးဟင်းရွက်များနှင့် အသီးအနှံများကို အစိမ်းစား၍သော်လည်းကောင်း၊ ချက်ပြုတ်၍သော်လည်းကောင်း စားသောက်နိုင်ပါသည်။
ဤနေရာတွင် သတိပြုရမည့် အချက်မှာ အသီးအနှံများနှင့် ဟင်းသီးဟင်းရွက်များသည် အပူနှင့်ထိတွေ့မိလျှင်သော်လည်းကောင်း၊ ကာလရှည်ကြာစွာ သိမ်းဆည်းထားလျှင်သော်လည်းကောင်း ဗီတာမင် စီ ပမာဏ လျော့ကျသွားတက်ပါသည်။
ထို့ကြောင့် အာဟာရဓာတ်များ ပျက်စီးဆုံးရှုံး လျော့ကျမှု နည်းပါးစေရန်အတွက် တက်နိုင်သလောက် လတ်ဆတ်သော အသီးအနှံများကို ဝယ်ယူလာပြီးသည်နှင့် စားခြင်း၊ ကြာရှည်စွာမချက်ပြုတ်ဘဲ ခဏတစ်ဖြုတ်သာ ချက်ပြုတ်ခြင်း တို့ကို ပြုလုပ်သင့်ပါသည်။
ထို့အပြင် ဗီတာမင် စီ သည် ပဲ၊ ဟင်းနုနွယ်၊ ကွီနို ကဲ့သို့သော ဟင်းသီးဟင်းရွက် အစားအစာများမှ ရရှိသည့် သံဓာတ်ကို ပိုမိုစုပ်ယူနိုင်စေရန် အကူအညီ ပေးပါသည်။
ထို့ကြောင့် သက်သတ်လွတ်သမားများအတွက် များစွာ အကျိုးရှိစေပါသည်။ ပိုမိုကောင်းမွန်သော အကျိုးကျေးဇူးရရှိစေရန်အတွက် ဗီတာမင် စီ ကြွယ်ဝ သောအစားအစာများကို သံဓာတ်ကြွယ်ဝသော အစားအစာများနှင့် တွဲဖက်ကာ စားသုံးသင့်ပါကြောင်း အကြံပြုလိုက်ပါသည်။
Author : Dr. CK
