Omega-3 Fatty Acids ဆိုတာ
Omega-3 fatty acids ကို မိမိတို့စားသုံးသောအစားစာတွေနဲ့ ဖြည့်စွက်အားဆေးမှရရှိတဲ့ အာဟာရပဲ ဖြစ်ပါတယ်။ Omega-3 Fatty Acids က ကျန်းမာတဲ့ခန္ဓာကိုယ်ကို ဆောက်တည်ထိန်းသိမ်းပေးနိုင်ပြီး ကိုယ်တွင်းရှိဆဲလ်နံရံတွေ တည်ဆောက်ရာမှာ အဓိကကျပါတယ်။ ဒါ့ပြင် မိမိရဲ့ခန္ဓာကိုယ် စွမ်းအားအရင်းအမြစ်လည်းဖြစ်သလို နှလုံး၊အဆုတ် ၊ သွေးကြောနဲ့ ကိုယ်ခံအား စနစ်တို့ကို ပုံမှန်မှန်ကန်စွာ လည်ပတ်အောင် ထိန်းသိမ်းပေးထားတာပါ။
Omega-3 Fatty Acids မှာ DHA (Docosahexaenoic Acid)၊ EPA (Ecosapentaenoic Acid) နှင့် ALA (Alpha-linolenic acid) ဆိုပြီး သုံးမျိုးရှိပါတယ်။ ဒါတွေလုံလောက်စွာရှိထားမယ်ဆိုရင် ကိုယ်ခန္ဓာအတွက် အကျိုးကျေးဇူး များစွာ ရရှိမှာပါ။ DHA နဲ့ EPA တို့ကို ငါးတွေမှာ အမြောက်အမြားတွေ့ရှိနိုင်ပါတယ်။ ALA ဟာ အပင်အရင်းအမြစ်တွေဖြစ်တဲ့ အစေ့အဆန်၊ သစ်သီးစေ့တွေကနေ ရရှိနိုင်ပါတယ်။
Omega-3 Fatty Acids အကျိုးကျေးဇူးများ
Omega-3 Fatty Acids က Triglycerides (အဆီဆိပ်) ကိုလျှော့ချပေးနိုင်တာမို့ နှလုံးရောဂါနဲ့ လေဖြတ်ခြင်းတို့မှ ကာကွယ်ပေးနိုင်ပါတယ်။ အဆစ်မြစ်ရောင်ရမ်းခြင်းနဲ့ လေးဘက်နာတွေမှာ ဖြစ်လေ့ရှိတဲ့ တောင့်တင်းခြင်းနဲ့ ကိုက်ခဲဝေဒနာတွေကို တားဆီးပေးနိုင်ပါတယ်။ အရောင်ကျရန်သောက်သုံးလိုက်တဲ့ ဆေးတွေရဲ့ ထိရောက်မှုအားကိုလည်း မြှင့်တင်ပေးပါတယ်။ Omega 3 သုံးစွဲတဲ့သူတွေမှာ ခန္ဓာကိုယ်အတွင်း ရောင်ရမ်းခြင်းကို
လျှော့ချပေးနိုင်တာကြောင့်လည်း ပန်းနာရင်ကျပ်ရှိသူတွေအတွက် အကျိုးသက်ရောက်မှုများစွာရရှိစေနိုင်ပါတယ်။
Omega-3 စားသုံးသောသူတွေမှာ စိတ်ညစ်ခြင်း၊ စိတ်ဓာတ်ကျခြင်းရောဂါတွေကို လျော့ကျစေတာကို လေ့လာတွေ့ရှိထားပါတယ်။ ကလေးတွေ အမြင်အာရုံနဲ့ အတွေးခေါ် ဖွံ့ဖြိုးတိုးတက်မှုအတွက် DHA က အရေးကြီးပါတယ်။ ဒါ့ပြင် ကလေးများကောင်းမွန်စွာ အိပ်စက်နိုင်ဖို့ အတွက်လည်း အထောက်ကူပြုပေးနိုင်ပါတယ်။
ADHD လက္ခဏာများကိုလျော့ချပေးနိုင်ခြင်း
ADHD ဆိုတာ ကလေးတွေမှာအဓိကကြုံတွေ့ရပါတယ်။ သူကတော့ အာရုံစိုက်တဲ့အခါတွင် အခက်ခဲရှိနိုင်ခြင်း၊ သာမန်ထက် စိတ်ပိုတက်ကြွ လေ့ရှိပါတယ်။ Omega-3 သောက်သုံးပေးမယ်ဆိုရင် ဒါတွေကို လျှော့ချနိုင်ပြီး ကလေးရဲ့အာရုံကြောလုပ်ဆောင်တာတွေဖြစ်တဲ့ စဉ်းစားတွေးခေါ်မှု ၊ မှတ်ဉာဏ်၊ သင်ယူမှုနိုင်မှုတို့ကို ပိုမိုဖွံ့ဖြိုးတိုးတက်စေနိုင်ပါတယ်။
အကျိုးကျေးဇူးတွေ သိရှိထားတာမို့ Omega-3 Fatty Acids ရရှိနိုင်မယ့် အစားစာတွေ ကိုဖော်ပြပေးပါမယ်။
ကျန်းမာတဲ့လူကြီးတစ်ယောက်အနေနဲ့ တစ်နေ့ကို Omega-3 fatty acids (DHA+EPA) ၂၅၀-၅၀၀ မီလီဂရမ်ထိသောက်သုံးသင့်ပါတယ်။ ကလေးငယ်တစ်ယောက်ကတော့ ၅၀-၁၀၀ မီလီဂရမ်ထိ သောက်သုံးသင့်ပါတယ်။ **ကိုယ်ဝန်ဆောင်၊ နို့တိုက်မိခင်တွေ၊ ကုသမှုဆိုင်ရာဆေးဝါးစွဲသောက်သူတွေအနေနဲ့တော့ မသောက်သုံးမီ ဆရာဝန်နဲ့ သေချာဆွေးနွေး တိုင်ပင်ပြီးမှ သောက်သုံးသင့်ပါတယ်။ ***
Omega-3 Fatty Acids ရဖို့ဆို အားဆေးတွေသောက်သုံးခြင်းထက် နေ့စဉ်စားတဲ့အစားစာတွေကရရှိအောင် စားသုံးသင့်ပါတယ်။ Omega-3 ပါဝင်တဲ့အစားစာတွေကို တစ်ပတ်လျှင် အနည်းဆုံး နှစ်ကြိမ် စားသုံးပေးသင့်ပါတယ်။
Omega-3 fatty Acids ရရှိနိုင်သောအစားစာတွေကတော့-
ငါးများနှင့် ပင်လယ်စာများ
• ငါးနီတူး
• ဆော်လမွန်ငါး
• ငါးသေတ္တာ
• တူနာငါး
• မက်ခရယ်ငါး
• ခရု
အစေ့ဆန် နှင့် သစ်သီးအစေ့များ
• ပဲနို့
• သစ်ကြာသီး
• Flax Seed
• Chia seed
• အပင်ကရသော ဆီများ ( ပဲဆီ ၊ Canola oil)
• အစိမ်းရောင်အသီးရွက်များ ၊ ဘယ်ရီသီးများ၊ ဖရုံသီး အမျိုးမျိုး
Omega-3 ရရန်အတွက် သီးခြားထုတ်လုပ်ထားတဲ့ အစားစာတွေကတော့ ကြက်ဥ ၊ ဒိန်ချဉ်၊ အသီးဖျော်ရည်၊ နွားနို့ နဲ့ ပဲနို့ထုတ်ကုန် ၊ ကလေးနို့မှုန့် တို့ပဲ ဖြစ်ပါတယ်။
Omega-3 Fatty Acids လုံလောက်တဲ့ပမာဏ ပြည့်ဝပြီး ကျန်းမာသန်စွမ်းတဲ့ခန္ဓာကိုယ်ကို ပိုင်ဆိုင်နိုင်ကြပါစေ။
Author: Dr. Win
