အရိုးပွတယ်ဆိုတာက ကျွန်တော်တို့ရဲ့အရိုးတွေထဲမှာ အပေါက်ကလေးတွေဖြစ်လာတာပါ။
ဒီလိုအပေါက်ကလေးတွေအများကြီးဖြစ်လာရင် အရိုးရဲ့သိပ်သည်းဆလျော့နည်းလာပြီး အရိုးတွေကြွပ်ဆတ်လာကာ အရိုးကျိုးလွယ်လာပါတယ်။အရိုးပွခြင်းကိုဖြစ်စေနိုင်တဲ့အကြောင်းတွေကတော့
မျိုးရိုးဗီဇရှိတာ၊အသက်ကြီးလာတာ၊အမျိုးသမီးတွေဆိုရင် သွေးဆုံးပြီးနောက်ပိုင်း အီစတိုဂျင်ဟော်မုန်းပမာဏလျော့နည်းလာတာ၊ကျောက်ကပ်ရောဂါရှိတာ၊စတီးရွိုက်ဆေးစွဲသောက်နေရတာ၊သိုင်းရွက်ဟော်မုန်းလွန်ကဲပြီးလည်ပင်းကြီးရောဂါရှိတာ၊အစာအိမ်နဲ့အူလမ်းကြောင်းမှာရောဂါရှိလို့စားတဲ့အာဟာရဓါတ်တွေကိုအကုန်မစုပ်ယူနိုင်တာ၊အစာအာဟာရချို့တဲ့တာ၊ကိုယ်လက်လှုပ်ရှားမှုနည်းတာ၊ဆေးလိပ်သောက်တာ စသဖြင့် အကြောင်းတွေအများကြီးရှိပါတယ်။
အရိုးပွတာကို ဆေးပညာအရတော့ Osteoporosis (အော်စတီရို ပရိုးစစ်) လို့ခေါ်ပါတယ်။ကမ္ဘာနဲ့အဝှမ်း လူဦးရေ သန်း၅၀ကျော်ဟာ ဒီအရိုးပွရောဂါကို ခံစားနေရကာ အသက်၅၀ကျော်အမျိုးသမီး၃ယောက်မှာ၁ယောက်၊အသက်၅၀ကျော်အမျိုးသား၅ယောက်မှာ ၁ယောက်ဟာ ဒီအရိုးပွရောဂါကြောင့်အရိုးကျိုးမှု ဖြစ်နေရပါတယ်။
ဒါ့ကြောင့်ဒီတပတ်မှာ အရိုးပွခြင်းဖြစ်ပွားနိုင်ခြေကို နည်းအောင် ဆောင်ရမယ့်အချက်တွေ ရှောင်ရမယ့်အချက်တွေကို သိသလောက်ရေးသားတင်ပြလိုပါတယ်။
ဆောင်ရမယ့်အချက်တွေကတော့
၁။ကယ်လ်ဆီယမ်ဓါတ်ကြွယ်ဝသော သဘာဝအစားအစာများ(ဥပမာ- နို့နဲ့နို့ထွက်ပစ္စည်းများ၊ဟင်းနုနွယ်ရွက်)ကို နေ့စဉ်နေ့တိုင်းစားသုံးပေးပါ။
၂။ဗီတာမင်ဒီဓါတ်လုံလောက်စွာရအောင်ဂရုစိုက်ပါ။မနက်ခင်း နေရောင်နုနုနဲ့ အရေပြားနဲ့ နေ့တိုင်း၁၀မိနစ်လောက်ထိတွေ့ပေးပါ။
ဗီတာမင်ဒီဟာ ကယ်ဆီယမ်ဓါတ်ကို ကိုယ်ခန္ဓာက ပိုမိုစုပ်ယူနိုင်အောင်ကူညီအားပေးတဲ့ဗီတာမင်ပါ။ အဆီများတဲ့ငါးများ(ဆော်လမွန်၊ဆာဒင်း၊တူနာ)၊နို့နဲ့နို့ထွက်ပစ္စည်းများ၊ငါးကြီးဆီ၊ကွေကာာစတဲ့အစားအစာများသည် ဗီတာမင်ဒီကြွယ်ဝသောအစားအစာများဖြစ်သည်။
တခုထူးခြားတာက ဗီတာမင်ဒီကို အစားသောက်ကနေပဲရနိုင်တာမဟုတ်ဘဲ ကျွန်တော်တို့ခန္ဓာကိုယ်ကလည်း ထုတ်လုပ်ပေးနိုင်ပါတယ်။ တနေ့ကို ၁၀မိနစ်ကနေ ၁၅မိနစ်လောက် နေခြည်နုနုနဲ့မိမိရဲ့အရေပြားနဲ့ထိတွေ့ခြင်းဖြင့် တနေ့တာလိုအပ်တဲ့ ဗီတာမင်ဒီပမာဏကို ရရှိစေနိုင်ပါတယ်။ဒါကြောင့်ဗီတာမင်ဒီကို ဆန်းရှိုင်းဗီတာမင်(Sunshine vitamin)ဟုလည်းခေါ်သည်။
၃။အခွံမာအစေ့အဆံနဲ့Phytoestrogen ဓါတ်များများပါသောအစားစာတွေဖြစ်တဲ့(ပဲမျိုးစုံ၊ကြက်သွန်ဖြူ၊ကြက်သွန်နီ၊မုန်လာဥနီ)တွေကို နေ့စဉ် သို့မဟုတ် မကြာခဏစားပေးပါ။
၄။မပြင်းထန်သော ကိုယ်လက်လှုပ်ရှားမှုများကို သင့်တင့်သလောက်ပြုလုပ်ပေးပါ။
၅။အသား ငါး ဟင်းသီးဟင်းရွက် မျှတစုံလင်အောင် စားပါ။
၆။အသက်၅၀လောက်ရောက်ရင် အရိုးသိပ်သည်းဆကို တနှစ်တခါလောက်စစ်ဆေးပါ။
ရှောင်ရမယ့်အချက်တွေကတော့
၁။ဆေးလိပ်သောက်နေတယ်ဆိုပါက ဆေးလိပ်ဖြတ်ပါ။
အရက်သောက်နေတယ်ဆိုပါက အလွန်အကျွံမသောက်မိအောင်ဂရုစိုက်ပါ။
၂။ရယ်ဒီမိတ်အစားအစာများ၊ကြာရှည်ခံအောင်စီရင်ထားသောအစားစာများ(ဥပမာ ခေါက်ဆွဲခြောက်၊စည်သွပ်ဗူး)မကြာခဏစားသုံးခြင်းကိုရှောင်ပါ။
၃။ပြင်းပြင်းထန်ထန်ကိုယ်လက်လေ့ကျင့်ခန်းလုပ်တာ၊အလေးအရမ်းမတာ တွေရှောင်ပါ။
၄။အဆီအဆိမ့်အငန်လျှော့စားပါ။
၅။အစာအိမ်ရောဂါဆေးများကို မိမိသဘောနဲ့မိမိရေရှည်စွဲစားတာမျိုးကိုရှောင်ပါ။
Dr. 528
