ဝက်သား၊ဆိတ်သား၊အမဲသား၊ငါး စသဖြင့် အသားတွေများစွာရှိတဲ့အနက် ကြက်သားဟာ လူအစားအများဆုံး အသားဖြစ်ပါတယ်။
ဝက်သားကလည်းလူစားများပေမယ့် ဘာသာရေးအရရော၊ကျန်းမာရေးအရရော ရှောင်တဲ့သူတွေရှိတဲ့အတွက် ကြက်သားနဲ့ယှဉ်ရင်ကျ ကြက်သားလောက် အစားမများပါဘူး။
ဆိတ်သား၊အမဲသားကကျ ဈေးလည်းကြီးပြီး တချို့နေရာတွေမှာဝယ်ရမလွယ်ပါ။ဒါ့အပြင် ချက်ပြုတ်တဲ့အခါအနံ့ပျောက်အောင်ချက်ရတဲ့အတွက် ခက်ခဲပါတယ်။
ငါးကျဝယ်ရလွယ်ပြီး ဈေးပေါပေမယ့် လူ၁၀ယောက်မှာ၃ယောက်လောက်က ငါးဟင်းမကြိုက်ကြပါဘူး။
ကြက်သားဟာ တခြားအသားတွေထက်စာရင် ဈေးသိပ်မကြီးသလို အလွယ်တကူလည်းဝယ်လို့ရနိုင်ပါတယ်။ချက်ပြုတ်ရလုပ်ရကိုင်ရတာလည်းလွယ်ပါတယ်။
ကြက်သားကို ကြော်စားတာ၊ဘူသီးအာလူးစသဖြင့်နဲ့ရောချက်စားတာ၊ကင်စားတာ၊ပေါင်းစားတာ၊စွပ်ပြုတ်ဟင်းရည်လုပ်သောက်တာ၊သုပ်စားတာ စသဖြင့် အမျိုးမျိုးလုပ်စားကြပါတယ်။
ဒီလို လူအားလုံးနီးပါး ပုံစံအမျိုးမျိုးနဲ့ အစားများကြတဲ့ ကြက်သားဟာ လူတွေရဲ့ကျန်းမာရေးကို ဘယ်လိုကောင်းကျိုးတွေပေးနိုင်လဲဆိုတာကို ဒီတပတ်မှာ ရေးသားတင်ပြချင်ပါတယ်။
ကြက်သားမှာ ပရိုတင်း၊ကာဘိုဟိုက်ဒရိတ်၊ဗီတာမင်အေ၊ဘီ၊ကယ်လ်စီယံဓါတ်၊ဖော့စဖောရက်စ်ဓါတ်၊သံဓါတ်၊ကြေးဓါတ်၊နိုင်ရာစင်၊အဆီဓါတ်စတဲ့ဓါတ်တွေကြွယ်ဝစွာပါဝင်ပါတယ်။
ကြက်သားစားခြင်းဖြင့်ရနိုင်တဲ့ကျန်းမာရေးအကျိုးတွေကတော့အောက်ပါအတိုင်းဖြစ်ပါတယ်။
၁။ပရိုတင်းဓါတ်ကြွယ်ဝစွာရရှိနိုင်ခြင်း
ကြက်သားမှာပရိုတင်းဓါတ်ကြွယ်ဝစွာပါပါတယ်။ပရိုတင်းဓါတ်ဟာ ခန္ဓာကိုယ်ရှိကြွက်သားတွေကြီးထွားဖွံ့ဖြိုးဖို့အတွက်အထောက်အကူပြုပါတယ်။ဆံပင်၊အရေပြားအတွက်လည်းကောင်းကျိုးပေးပါတယ်။
ကြွက်သားကြီးထွားချင်တဲ့သူတွေ၊Six packs ရချင်တဲ့သူတွေဆိုရင် Gym ဆော့ အလေးမတာတွေလုပ်ဖို့လည်းလိုသလို ကြက်သားပါများများစားပေးဖို့လည်းလိုပါတယ်။
၂။ခန္ဓာကိုယ် အလေးချိန်ကိုထိန်းညှိပေးနိုင်ခြင်း
ကြက်သားမှာကြွယ်ဝစွာပါဝင်တဲ့ပရိုတင်းဓါတ်ဟာအရည်အသွေးမြင့်ပရိုတင်းဓါတ်ဖြစ်တာကြောင့် ခန္ဓာကိုယ်အလေးချိန်ထိန်းညှိပေးဖို့အတွက်အထောက်ကူပြုနိုင်ပါတယ်။
ကိုယ်အလေးချိန်များပြီးအဝလွန်တဲ့သူတွေဆိုရင် တခြားအသားတွေစားတာထက် ကြက်သားစားသင့်ပါတယ်။
၃။နှလုံးကျန်းမာရေးကိုအထောက်အကူပြုခြင်း
ကြက်သားစားခြင်းဖြင့် ခန္ဓာကိုယ်ထဲက homocysteine amino acid ပမာဏကို ထိန်းညှိပေးနိုင်ပါတယ်။
Homocysteine amino acid ပမာဏများလာရင် နှလုံးသွေးကြောကျဉ်းရောဂါတွေကိုဖြစ်စေနိုင်ပါတယ်။
၄။အရိုးနဲ့သွားတွေကိုကြံ့ခိုင်သန်မာစေခြင်း
ကြက်သားမှာပါတဲ့ပရိုးတင်းဓါတ်တွေဟာ အရိုးပါးခြင်း၊ပွခြင်းတွေကို ကာကွယ်လျှော့ချပေးနိုင်ပြီး ဖော့စဖောရပ်စ် ဓါတ်ဟာ အရိုးနဲ့သွားတွေကို ကြံ့ခိုင်သန်မာစေနိုင်ပါတယ်။
ဖော့စဖောရပ်စ်ဓါတ်ဟာ ကျောက်ကပ်၊အသည်း၊အာရုံကြောစနစ်တွေကောင်းစွာအလုပ်လုပ်ဖို့အတွက်လည်း အထောက်အကူပြုပါတယ်။
သွေးဆုံးပြီးတဲ့အမျိုးသမီးတွေ၊အသက်ကြီးတဲ့သူတွေအနေနဲ့ အရိုးပါးခြင်း၊ပွခြင်းတွေမှ ကာကွယ်ရန် ကြက်သားများများစားသင့်ပါတယ်။
၅။ကင်ဆာရောဂါဖြစ်နိုင်ခြေကို လျော့ကျစေနိုင်ခြင်း
ကြက်သားမှာ ဗီတာမင်ဘီမျိုးကွဲတခုဖြစ်တဲ့ နိုင်ရာစင်ဓါတ်ကြွယ်ဝစွာပါရှိပါတယ်။ထိုနိုင်ရာစင်ဓါတ်ဟာ ကင်ဆာရောဂါတွေကို ကာကွယ်နိုင်ပါတယ်။
၆။မျက်လုံးကိုအထောက်အကူပြုခြင်း
ကြက်သားမှာဗီတာမင်အေ ကြွယ်ဝစွာပါရှိတဲ့အတွက်မျက်လုံးကျန်းမာရေးနဲ့အမြင်အာရုံကိုအထောက်အကူပြုပြီး ကြက်မျက်သင့်ရောဂါမဖြစ်အောင်ကာကွယ်ပေးပါတယ်။
၇။သွေးအားကောင်းစေခြင်း
ကြက်သားမှာသံဓါတ်ကြွယ်ဝစွာပါဝင်တာကြောင့် သွေးအားကိုကောင်းစေနိုင်ပါတယ်။
သံဓါတ်ချို့တဲ့သွေးအားနည်းတဲ့သူတွေဆိုရင် ကြက်သားများများစားသင့်ပါတယ်။
၈။စိတ်ကျန်းမာရေးကိုအထောက်အကူပြုခြင်း
ကြက်သားစားခြင်းဖြင့် စီရိုတိုနင်ဟော်မုန်းကို မြင့်တက်စေနိုင်ကာ စိတ်ဖိစီးမှုတွေကို လျော့ကျစေပြီး စိတ်ပျော်ရွှင်မှု စိတ်တည်ငြိမ်ပေါ့ပါးမှုကိုဖြစ်စေနိုင်ပါတယ်။
ဒါတွေကတော့ သိသလောက်ကြက်သားစားခြင်းဖြင့်ရနိုင်တဲ့အကျိုးကျေးဇူးတွေဖြစ်ပါတယ်။
ကြက်သားဟာကျန်းမာရေးကောင်းကျိုးတွေများပေမယ့့် ကြက်သားချက်တဲ့အခါမှာ လတ်ဆတ်တဲ့ကြက်သားကိုချက်ဖို့နဲ့ သေချာကျက်အောင်ချက်ပြုတ်ဖို့လိုပါတယ်။
သေချာကျက်အောင်မချက်ရင် ကြက်နာသားတွေချက်ရင် ကြက်ငှက်တုပ်ကွေးရောဂါပိုးကူးစက်ခံရတာ၊အူရောင်ငန်းဖျားရောဂါပိုးကူးစက်ခံရတာမျိုးတွေဖြစ်နိုင်ပါတယ်။
Dr 528
