ကြွက်သားတွေနာကျင်တာ၊ တစ်ကိုယ်လုံး ညောင်းညာကိုက်ခဲတာကို လူငယ်၊ လူကြီးတော်တော်များများ ခံစားရဖူးပါတယ်။
ကြွက်သားနာကျင်တာဟာ နေရာတိုင်းအချိန်တိုင်းမှာ ဖြစ်ပွားနိုင်ပါတယ်။ တစ်နေရာတည်း ဖြစ်နိုင်သလို တစ်ကိုယ်လုံးလည်း ဖြစ်နိုင်ပါတယ်။
အများစုမှာတော့ ထိခိုက်မိလို့ဖြစ်စေ၊ လေ့ကျင့်ခန်း အလွန်အကျွံလုပ်မိလို့ဖြစ်စေ ကြွက်သားတွေ တင်းအားများသွားတဲ့အချိန်မျိုးတွေမှာ ဖြစ်တတ်ပါတယ်။
တုပ်ကွေး ( covid 19 အပါအဝင်)၊ ကြွက်တက်တာ၊ အဆစ်အမြစ်များ ရောင်ရမ်းသောရောဂါများ အစရှိတဲ့ တချို့ရောဂါတွေမှာ ကြွက်သားနာကျင်ခြင်းကို ရောဂါလက္ခဏာတစ်ခုအဖြစ် ခံစားရနိုင်ပါတယ်။
ကြွက်သားနာကျင်ခြင်းကိုသက်သာစေနိုင်တဲ့နည်းလမ်းများ
ကြွက်သားနာကျင်ခြင်းကို သက်သာစေနိုင်တဲ့နည်းလမ်းတွေ ရှိပါတယ်။
၁။ ရေခဲကပ်ပါ။
ရေခဲကို အဝတ်သန့်သန့်နဲ့ပတ်ပြီး ကပ်ပေးလို့ရပါတယ်။ နာကျင်နေတဲ့နေရာကို နားလိုက်၊ ပြန်ကပ်ပေးလိုက် လုပ်လို့ရပါတယ်။
၂။ ရေနွေးအိတ် ကပ်ပါ။
ရေနွေးအိပ်ကပ်တာလည်း နည်းလမ်းတစ်ခုပါ။ ဒါပေမဲ့ အပူချိန်ကိုတော့ သတိထားဖို့လိုပါတယ်။ အပူလောင်တတ်ပါတယ်။ ရေခဲကပ်ပြီးမှ သွေးစီးဆင်းမှုကောင်းအောင် ရေနွေးအိတ် ကပ်တာမျိုးလည်း လုပ်ပေးနိုင်ပါတယ်။
၃။ အနားယူပါ။
နာကျင်နေတဲ့ကြွက်သားကို အနားပေးရပါမယ်။ တင်းအားများနေတဲ့ကြွက်သားရဲ့ အလုပ်များကို လျော့ချပေးခြင်းဖြင့် နာကျင်ခြင်းကို သက်သာစေနိုင်ပါတယ်။
၄။ သက်ဆိုင်ရာ လေ့ကျင့်ခန်းလုပ်ပါ။
နာကျင်နေတဲ့နေရာနဲ့ သက်ဆိုင်တဲ့ အသေးစားလေ့ကျင့်ခန်းများလုပ်ခြင်းဖြင့် ကြွက်သားတင်းအားများ လျော့ကျစေနိုင်ပြီး သွေးစီးဆင်းမှုကောင်းလို့ နာကျင်ခြင်း သက်သာနိုင်ပါတယ်။
၅။ လေ့ကျင့်ခန်းလုပ်လျှင် နည်းလမ်းမှန်ကန်အောင် ဂရုစိုက်ပါ။
Gymသွားပြီး လေ့ကျင့်ခန်းလုပ်ကြတဲ့အခါ နည်းလမ်းမမှန်ကန်ခဲ့လျှင် ကြွက်သားများကို ဒဏ်ရာရစေနိုင်ပါတယ်။ မလုပ်ခင်သွေးပူလေ့ကျင့်ခန်းလုပ်ဖို့နဲ့ လုပ်ပြီးအကြောလျော့ဖို့လည်း အရေးကြီးပါတယ်။
၆။ အဟာရပြည့်အောင်၊ ရေဓါတ်ပြည့်အောင် ဂရုစိုက်ပါ။
အစားကောင်းကောင်းစားပါ။ ရေများများသောက်ပါ။ ကိုယ်ခံအားကောင်းလျှင် နာကျင်ခြင်း သက်သာနိုင်ပါတယ်။
၇။ ဆေးလိမ်း၊ ဆေးသောက်ပါ။
အကိုက်အခဲပျောက်လိမ်းဆေးများနဲ့ ပါရာစီတမောအစရှိ ဆေးဝါးများကလည်း ကူညီပေးနိုင်ပါတယ်။ လိုအပ်တာထက်ပိုသွားခဲ့ရင်တော့ ဘေးထွက်ဆိုးကျိုးများရှိလို့ သတိထားသင့်ပါတယ်။
ကြွက်သားနာကျင်ခြင်းဟာ တစ်ခါတစ်လေလည်း အရေးကြီးကျန်းမာရေးပြသနာများနဲ့ ဆက်စပ်နေနိုင်ပါတယ်။ ဒါကြောင့်
- ရက်တော်တော်ကြာကြာအထိ မသက်သာရင်
- အဖျားကြီးတာမျိုး၊ အသက်ရှူခက်တာမျိုး ၊ကြွက်သားတွေ အလွန်အမင်းအားနည်းသွားတာမျိုးနဲ့ တွဲပြီးဖြစ်ရင်
- အကောင် တစ်ကောင်ကောင်ကိုက်ခံရပြီး နာကျင်ကျန်ခဲ့တာမျိုး ဆိုရင်တော့ ဆရာဝန်နဲ့ ချက်ချင်းပြသသင့်ကြောင်းပါ။
Author : Dr. PSYM
