ယခုကမ္ဘာလောကကြီးမှာ နည်းပညာတွေတိုးတက်လာသည်နှင့်အမျှ လူသားတွေဟာ ဇရာကိုပါ အန်တုလာနိုင်ကြပါတယ်။ ဆေးဝါးများ၊ အလှအပဆိုင်ရာများစသည့် နည်းလမ်းမျိုးစုံနှင့် အသက်အရွယ်ကြီးလာလျှင် ဖြစ်လာနိုင်သော ပျက်စီးခြင်းတွေကို ဟန့်တားလာနိုင်ကြပါတယ်။ ဒါပေမယ့် လုံးဝဖြစ်မလာအောင်တော့ မတားဆီးနိုင်သေးပါဘူး။ လူ့ခန္ဓာကိုယ်မှာ ရှိတဲ့ကြွက်သားတွေဟာ အသက် ၄၀ ကျော်လာတာနဲ့ တစ်နှစ်ကို ပျှမ်းမျှအားဖြင့် ၈%ထိ ဆုံးရှုံးလာနိုင်ပါတယ်။ အဲ့လိုကြွက်သားဆုံးရှုံးလာခြင်းဟာ အသက်၅၀ ကျော်လာတဲ့အခါမှာ သိသာလာပါတယ်။
ကြွက်သားဆုံးရှုံးခြင်းရဲ့ လက္ခဏာများ
- ပင်ပန်းနွမ်းနယ်နေတတ်ခြင်း
- ယခင်နှစ်တွေကလောက် ပုံမှန်သယ်နေကျ အရာများအား မသယ်နိုင်တော့ခြင်း
- လမ်းလျှောက်ရာမှာ ယခင်ကလောက် မသွက်တော့ခြင်း
- ကိုယ်အလေးချိန် ကျလာခြင်း
စတာတွေဟာ ကျန်းမာရေးပြဿနာ အခြားဘာမှမရှိလျှင် အသက်ကြီးလာခြင်းကြောင့် ကြွက်သားဆုံးရှုံးတဲ့လက္ခဏာတွေပဲ ဖြစ်ပါတယ်။ ဆေးပညာဝေါဟာရ အရ Sarcopenia လို့ ခေါ် ဝေါ်ကြပါတယ်။
သည်လိုဖြစ်ရတာဟာ အသက်ကြီးလာတဲ့အခါ ခန္ဓာကိုယ်မှာ ဖြစ်ပျက်နေတဲ့ဇီဝကမ္မဖြစ်စဉ်တွေ ဟန်ချက်မညီပဲ ပျက်ယွင်းလာလို့ပဲ ဖြစ်ပါတယ်။
ဘယ်လိုအရာတွေဟာ ကြွက်သားဆုံးရှုံးခြင်းကို အားပေးနေသလဲ?
⮚ အာဟာရ ပြည့်ဝစွာ မစားသုံးခြင်း
တစ်နေ့တာ အတွက် လိုအပ်တဲ့ ကယ်လိုရီနဲ့ အသားဓာတ်တွေကို လုံလောက်စွာ မစားတဲ့အခါ ကြွက်သားဆုံးရှုံးတာဟာ ပိုဖြစ်တတ်ပါတယ်။
⮚ လှုပ်လှုပ်ရှားရှား နေထိုင်မှုမရှိခြင်း
အမြဲတမ်း ထိုင်နေပြီး ကိုယ်လက်လှုပ်ရှားလေ့ကျင့်ခန်း မလုပ်သူများ၊ ထိခိုက်ဒဏ်ရာကြောင့် မလှုပ်ရှားနိုင်သူများ၊ ရောဂါကြောင့် အိပ်ရာပေါ်တွင်သာ နေနေရသူများဟာ ကြွက်သားဆုံးရှုံးခြင်းဒဏ်ကို ပိုမိုခံစားရတတ်ပါတယ်။
⮚ နာတာရှည် ရောင်ယမ်းခြင်း ပြဿနာရှိသူများ
နာတာရှည်ရောင်ယမ်းစေတဲ့ ရောဂါတွေဖြစ်တဲ့ သွေးလေးဘက်နာရောဂါ၊ အစာအိမ် အူလမ်းကြောင်းဆိုင်ရာ ရောင်ယမ်းခြင်း ပြသနာများ ( Inflammatory Bowel Diseases )၊ တီဘီရောဂါ ကဲ့သို့ ရောဂါအခံရှိသူတွေမှာ ရောင်ယမ်းမှု ကြောင့် ဇီဝကမ္မဖြစ်စဉ်တွေ ပျက်ယွင်းပြီး ကြွက်သားဆုံရှုံးမှု ပိုမိုဖြစ်တတ်ပါတယ်။
⮚ ရောဂါ အခံရှိသူများ
ကင်ဆာဝေဒနာရှင်များ၊ အသည်းခြောက်ရောဂါ၊ နှလုံးရောဂါသည်များ စသူတွေမှာ ရောဂါအခံကြောင့် ခန္ဓာကိုယ်က ဆဲလ်တွေ ပျက်စီးလွယ်ပြီး ကြွက်သား ဆုံရှုံးမှုကို ပိုမို အားပေးစေနိုင်ပါတယ်။
အသက်အရွယ်အရကြွက်သားဆုံးရှုံးမှုကို ဘယ်လိုကာကွယ်နိုင်မလဲ?
⮚ ကိုယ်လက်လေ့ကျင့်ခန်း ပုံမှန်ပြုလုပ်ပေးပါ။
လေ့ကျင့်ခန်း အမျိုးအစားတွေထဲမှာ
- ကြွက်သားတွေကို အားစိုက်သုံးရတဲ့ လေ့ကျင့်ခန်းတွေဖြစ်တဲ့ ဝိတ်မခြင်း၊ အိပ်ထမတင် လုပ်ခြင်း၊ ဒိုက်ထိုးခြင်း
- ခန္ဓာကိုယ်ကို ဟန်ချက်ညီညီနှင့် ထိန်းပြီး ဆော့ရသည့် အေရိုးဗစ်လေ့ကျင့်ခန်းများ
- စက်ဘီးစီးခြင်း၊ jogging လျှောက်ခြင်း
- လမ်းလျှောက်ခြင်း
စတဲ့ လေ့ကျင့်ခန်းတွေကို တစ်ပတ် ငါးရက်၊ တစ်နေ့ကို 15မိနစ် မှ မိနစ်30 ထိ ဆော့ကစားပေးသင့်ပါတယ်။ ကိုယ်လက်လှုပ်ရှားခြင်းဟာ ကြွက်သားဆုံးရှုံးမှုကို ကာကွယ်စေနိုင်တဲ့ အရေးကြီးတဲ့ အချက်ဖြစ်ပါတယ်။ ပုံမှန်လမ်းလျှောက်ခြင်းကပင် ကြွက်သားဆုံရှုံးမှုနှုန်းကို နှေးကွေးသွားစေနိုင်ပါတယ်။
⮚ ကြွက်သား ဆုံးရှုံးမှုကို ဟန့်တားစေနိုင်သည့် အစားအသောက်များ
- Protein အသားဓာတ် ကြွယ်ဝစေသော အစားအသောက်များဖြစ်တဲ့ ကြက်ဥ၊ အသား၊ ပဲအမျိုးမျိုး စသည်တို့ကို ပုံမှန်ထက် ပိုမိုစားသုံးပေးသင့်ပါတယ်။ Protein ထဲမှာပါတဲ့ amino acid leucine ဟာ ကြွက်သားများတည်ဆောက်ရာမှာ အခြေခံကျတာကြောင့် ပုံမှန်စားသုံးပေးခြင်းဖြင့် ကြွက်သားများဆုံးရှုံးခြင်းကို ကာကွယ်နိုင်ပါတယ်။
- Creatine ဓာတ် ကြွယ်ဝစွာပါဝင်တဲ့ အနီရောင်အသားများ၊ ငါးအမျိုးမျိုးကို စားသုံးပေးခြင်းဖြင့် Creatineဟာ ကြွက်သားကြီးထွားမှုကို အားပေးစေပါတယ်။ Gym trainer များ၊ ဗလတောင့်ချင်သူများကတော့ creatine supplements တွေကို သောက်သုံးလာကြပါတယ်။
- Vitamin D ချို့တဲ့ခြင်းဟာ အသက်ကြီးလာတဲ့အခါ ကြွက်သားဆုံးရှုံးမှုနှင့် ဆက်စပ်နေတယ်လို့ လေ့လာချက်တွေအရ တွေ့ရပါတယ်။ ဒါကြောင့် Vitamin D ကြွယ်ဝတဲ့ အရာတွေဖြစ်တဲ့ ဟင်းသီးဟင်းရွက် အမျိုးမျိုး၊ ဆယ်မွန်ငါး၊ ဆာဒင်းငါး၊ နို့နှင့် နို့ထွက်ပစ္စည်းများကို စားသုံးပေးသင့်ပါတယ်။
- Omega3 fatty acids ဟာ အသက်အရွယ်မရွေး အန္တရာယ်ကင်းစွာ သောက်သုံးလို့ရပြီး ကြွက်သား ဆုံးရှုံးမှုတွေမဖြစ်အောင်ကာကွယ်နိုင်ပါတယ်။ ရောင်ယမ်းမှုတွေကို သက်သာစေပြီး ကြွက်သား တည်ဆောက်ရာမှာ ပါဝင်အားဖြည့်ပေးလို့ပဲ ဖြစ်ပါတယ်။
