ဗီတာမင် C ဟာ ခန္ဓာကိုယ်အတွက် အလိုအပ်ဆုံးသော ဗီတာမင်တွေထဲက တစ်ခုပါ။ အရွယ်ရောက်ပြီးသား အမျိုးသမီးတစ်ယောက်အတွက် တစ်နေ့ကို ဗီတာမင် C 75 mg လိုအပ်ပြီး အမျိုးသားတစ်ယောက်အတွက် 90 mg လိုအပ်ပါတယ်။ ဆေးလိပ်သောက်တတ်တဲ့သူဆိုရင် ဓါတ်တိုးမှုဖြစ်စေတဲ့ပစ္စည်း free radicals တွေကြောင့် ပျက်စီးသွားတဲ့ဆဲလ်တွေကို ပြုပြင်ဖို့အတွက် ပုံမှန်ထက် 35 mg ပိုလိုအပ်နိုင်ပါတယ်။
ငရုတ်ပွ၊ လိမ္မော်သီး၊ နာနတ်သီး၊ သံပုရာသီးတို့လို ချဉ်တဲ့အသီးတွေ၊ မာလကာသီး၊ ကီဝီသီး၊ ဘရိုကိုလီ၊ ဆလတ်ရွက်၊ ဂေါ်ဖီထုပ် စတာတွေဟာ ဗီတာမင် C ကြွယ်ဝတဲ့ အစားအစာတွေပါ။
ဗီတာမင် C ချို့တဲ့ရင်…..
(၁) အနာကျက်တာ နှေးနိုင်တယ်
ထိခိုက်ဒဏ်ရာ ရတဲ့အခါ ဗီတာမင် C ကအနာကျက်ဖို့ အရေးပါပါတယ်။
ဗီတာမင် C ဟာကော်လဂျင် ထုတ်လုပ်မှုကို ကူညီပြီး ဆဲလ်အသစ်တွေဖြစ်ကာ အသားအရေကို ပြုပြင်ပြီး အနာကျက်မြန်စေတဲ့ သတ္တိရှိပါတယ်။
(၂) သွားဖုံးသွေးထွက်လွယ်တယ်၊ ထိခိုက်ရင် သွေးခြေဥလွယ်တယ်
ဗီတာမင် C ကသွေးခဲစေတဲ့ သတ္တိရှိပြီး သွေးကြောတွေကို သန်မာစေလို့ ဗီတာမင် C ချို့တဲ့ရင် သွေးထွက်လွယ်တာ၊ သွေးခြေဥလွယ်တာ၊ သွေးမတိတ်တာတွေ ဖြစ်လာပါတယ်။
(၃) အသားအရေခြောက်သွေ့ပြီး အရေးအကြောင်းဖြစ်လွယ်တယ်
ဗီတာမင် C က antioxidants ဖြစ်လို့ free radicals တွေကို တိုက်ထုတ်ပေးပြီး ကော်လဂျင်ထုတ်လုပ်ရာမှာ ကူညီပေးလို့ အသားအရေ နူးညံချောမွေ့ တောက်ပဖို့ အရေးပါပါတယ်။
(၄) မောပန်းနေတတ်တယ်
ဗီတာမင် C ကလန်းဆန်းတက်ကြွစေတဲ့ အာနိသင်လည်း ရှိပါတယ်။ ဗီတာမင်စီ ချို့တဲ့ တဲ့အခါ အလိုလို မောပန်းအားကုန် နေတတ်ပါတယ်။
(၅) ကိုယ်ခံအားကျတယ်
ဗီတာမင် C ကကိုယ်ခံအားကောင်းစေသလို ရောဂါပိုးတွေကို တိုက်ထုတ်တဲ့ neutrophils လို့ခေါ်တဲ့ သွေးဖြူဥတွေကို ကူညီတဲ့ လုပ်ငန်းလည်း လုပ်ဆောင်ပါတယ်။ ဒါကြောင့် ဗီတာမင် C ချို့တဲ့ရင် ကိုယ်ခံအားကျပြီး ရောဂါပိုး ဝင်လွယ်မှာပါ။
(၆) အမြင်အာရုံကို ထိခိုက်နိုင်တယ်
ဗီတာမင် C ချို့တဲ့ရင် အသက်ကြီးတဲ့အခါ ဖြစ်တတ်တဲ့ အတွင်းတိမ်နဲ့ macular degeneration လို အမြင်အာရုံကို ထိခိုက်တဲ့ ရောဂါတွေ ဖြစ်လာနိုင်ပါတယ်။
(၇) ဗီတာမင် C ချို့တဲ့သော scurvy ရောဂါ ဖြစ်မယ်
ဗီတာမင် C ချို့တဲ့ရင် scurvy လို့ခေါ်တဲ့ရောဂါ ဖြစ်တဲ့အခါ သွားတွေနဲ့ လာတာ၊ လက်သည်းခြေသည်းကျိုးလွယ်တာ၊ အရိုးကျိုးလွယ်တာ၊ အဆစ်နာတာ၊ ဆံပင်တွေ ခြောက်သွေ့ကျိုးကြေလွယ်တာတွေ ခံစားရနိုင်ပါတယ်။
(၈) ကိုယ်အလေးချိန် တက်လာမယ်
ဗီတာမင် C ချို့တဲ့ရင် ကိုယ်အလေးချိန် တက်လာနိုင်ပါတယ်။ ဗီတာမင် C ဖြစ်တဲ့ သံပုရာရည်သောက်တာ၊ အသီးအရွက်တွေစားတာက ဝိတ်ကျစေပါတယ်။
နေ့စဉ်စားတဲ့ အစားအစာတွေထဲမှာ ဗီတာမင် C နေ့စဉ်ပါဝင်ဖို့ မရှိမဖြစ်လိုအပ်ပါတယ်။ အစားအစာတွေ ဂရုတစိုက် မစီစဉ်နိုင်တဲ့အခါ ဗီတာမင် C မချို့တဲ့ရအောင် ဖြည့်စွက်စာအနေနဲ့ vtaminC ဖြည့်စွက်ဆေးတွေကို သောက်သုံးနိုင်ပါတယ်။ ဗီတာမင်C ကို လုံလောက်အောင် ဖြည့်တင်းပေးခြင်းဖြင့် antioxidants ကြွယ်ဝလို့ ခန္ဓာကိုယ်ရဲ့ ဇီဝကမ္မလုပ်ငန်းတွေကို ထိန်းသိမ်းပေးပြီးလန်းဆန်းတက်ကြွစေတာ၊ စိတ်ဖိစီးမှုနည်းစေတာ၊ ကိုယ်ခံအားကောင်းစေတာ၊ အသားအရေ ချောမွေ့တောက်ပစေတာ စတဲ့ အာနိသင်တွေ ရရှိစေမှာဖြစ်ပါတယ်။
Author: Dr.Yee Mon
