ကိုယ်ဝန်ဆောင်မိခင်များတွင် အချိန်မတိုင်မှီ အချင်းကွာခြင်း
အချင်း(Placenta) နဲ့ ချက်ကြိုး(Umbilical cord)ဆိုတာဟာ သန္ဓေသားအတွက် မရှိမဖြစ်တဲ့အရာတွေပါ။
သားအိမ်အတွင်းမှာသန္ဓေစတည်ကတည်းက အချင်းနဲ့ချက်ကြိုးဟာသန္ဓေသားနဲ့အတူစဖြစ်လာပါတယ်။
အချင်းရဲ့ပုံပန်းသဏ္ဍာန်အနေနဲ့ကတော့ ကြာရွက်လိုမျိုးပုံစံရှိပါတယ်။သို့သော်ကြာရွက်လိုပါးပါးရှပ်ရှပ်တော့မဟုတ်ပါဘူး။ထူပါတယ်။ကိုင်ကြည့်ပါက ရေမြုပ်ကိုင်ရသလို အိစိ အိစိ ခံစားမှုမျိုးရှိပါတယ်။
အချင်းရှိရမယ့်နေရာကတော့ သားအိမ်ရဲ့ ဘေးဘက် သို့မဟုတ် အပေါ်ထိပ်ဘက်မှာပါ။
အချင်းကနေ ချက်ကြိုးထွက်ပါတယ်။
အဲ့ချက်ကြိုးကနေတဆင့် သန္ဓေသားအတွက်လိုအပ်တဲ့ အစာအာဟာရ တို့အောက်ဆီဂျင်တို့ကို ထောက်ပံပေးတယ်။ သန္ဓေသားကနေစွန့်ပစ်လိုက်တဲ့အညစ်အကြေးတွေကလည်း ချက်ကြိုးကနေတဆင့် အချင်းရောက်တယ် အချင်းကနေအဲ့အညစ်အကြေးတွေကိုဖယ်ရှားပေးတယ်။
ပုံမှန်အားဖြင့်ဆိုရင် ကလေးမွေးပြီးမှပဲ အချင်းကထွက်ကျရပါတယ်။
ဒီလိုမဟုတ်ဘဲ ကလေးမမွေးခင်အချင်းကွာတယ်ဆိုရင် အချိန်မတိုင်မှီအချင်းစောကွာတယ်လို့သတ်မှတ်ပါတယ်။အများအားဖြင့် ကိုယ်ဝန်အပတ်နှစ်ဆယ်နောက်ပိုင်းမှာဖြစ်လေ့ရှိတတ်ပါတယ်။
အချိန်မတိုင်ခင်အချင်းစောကွာသွားရင် သန္ဓေသားမှာအောက်စီဂျင်နဲ့အစာအာဟာရထောက်ပံ့မှုပြတ်ကာ အသက်အန္တရာယ်ရှိနိုင်ပါတယ်။
အချိန်မတိုင်မှီအချင်းစောကွာခြင်းကို ဖြစ်စေနိုင်တဲ့အကြောင်းတွေကတော့
ကိုယ်ဝန်ဆောင်မိခင်ကသွေးတိုးရှိတာ
ဆေးလိပ်သောက်တာ၊ကိုကင်းသုံးတာ
သွေးကျဲဆေးတွေသောက်နေရတာ
ကိုယ်ဝန်ဆောင်စဉ် အကြောင်းကြောင်းကြောင့် ဗိုက်ကိုခိုက်မိတာ
အမွှာကိုယ်ဝန်ဆောင်ရတာ
ရေမွှာရည်များနေတာ
အချိန်မတိုင်မှီရေမွှာစောပေါက်တာ စသဖြင့်အများကြီးရှိပါတယ်။
အချင်းစောကွာခြင်းရဲ့လက္ခဏာတွေအနေနဲ့ကတော့
ဗိုက်(သားအိမ်)နေရာမှာ ဆက်တိုက်အရမ်းနာနေတာ၊အောင့်နေတာ
မိန်းမကိုယ်ကနေ ညိုပုပ်ပုပ်သွေးတွေဆင်းတာ
ပျို့အန်ပြီး၊ဂဏှာမငြိမ်ဖြစ်တာ သို့မဟုတ် မူးနောက်နောက်ဖြစ်တာ တွေပါ။
အများအားဖြင့်တော့ အချင်းစောကွာရင် မိန်းမကိုယ်ကနေ သွေးဆင်းလေ့ရှိပေမယ့် အချင်းစောကွာတာဖြစ်တဲ့ကိုယ်ဝန်ဆောင်တွေရဲ့သုံးပုံတပုံမှာတော့ မိန်းမကိုယ်ကနေသွေးမဆင်းဘဲ အချင်းအနောက်ဘက်မှာ သွေးတွေကသွားစုပြီးခဲနေတာမျိုးလည်းရှိပါတယ်။
အချင်းစောကွာတာဟာ အန္တရာယ်ရှိတဲ့အခြေအနေဖြစ်ပြီး နောက်ဆက်တွဲအနေနဲ့ပိုးဝင်တာ၊သွေးဆင်းများပြီးသွေးပေါင်ကျကာ Shock ဖြစ်တာ စတဲ့ မိခင်ရောသန္ဓေသားပါ အသက်အန္တရာယ်စိုးရိမ်ရတာမျိုးတွေဖြစ်နိုင်တဲ့အတွက် အမြန်ဆုံးဆေးရုံတက်ကုသဖို့လိုပါတယ်။
ဆေးရုံရောက်ပါက မိခင်နဲ့သန္ဓေသားအခြေအနေသိဖို့အတွက် အာထရာဆောင်းရိုက်တာ၊သွေးစစ်တာ၊ဆီးစစ်တာ စသဖြင့် စစ်ဆေးမှုတွေလုပ်ဖို့လိုပါတယ်။
ကုသမှုအနေနဲ့ကတော့ ရောဂါအခြေအနေပေါ်မူတည်ပြီး အမျိုးမျိုးရှိပါတယ်။
(၁)အချင်းကွာတာကလည်းနည်းနည်းပဲကွာတယ်။သွေးဆင်းကလည်းမများဘူး။သန္ဓေသားကလည်း အသက်ရှိသေးတယ်။အသက်ရှုကြပ်တာမွန်းတာမရှိဘူးဆိုရင်တော့ ဆေးရုံတက်ပြီးကလေးလစေ့တဲ့အထိစောင့်ပါတယ်။လစေ့မှ ရိုးရိုးသော်လည်းကောင်း ခွဲပြီးသော်လည်းကောင်း အခြေအနေပေါ်မူတည်ပြီးမွေးပါတယ်။
၂။အချင်းကွာတာကအခြေအနေအရမ်းဆိုးပြီး အာထရာဆောင်းရိုက်တဲ့အခါ သန္ဓေသားကအသက်မရှိတော့ဘူး နှလုံးမခုန်တော့ဘူး ဆိုရင်တော့ ချက်ချင်းဆေးသွင်းပြီးရိုးရိုးမွေးပါတယ်။
၃။အချင်းကွာတာကအခြေအနေအရမ်းဆိုးတယ်။ဒါပေမယ့် အာထရာဆောင်းရိုက်တဲ့အခါ သန္ဓေသားကအသက်ရှိသေးတယ် နှလုံးခုန်သေးတယ် သို့သော် မိခင်က မွေးဖို့ရန်ဗိုက်မနာသေးဘူးဆိုရင်တော့ ချက်ချင်း ဗိုက်ခွဲပြီးမွေးပါတယ်။
၄။အချင်းကွာတာကအခြေအနေအရမ်းဆိုးတယ်။ဒါပေမယ့်အာထရာဆောင်းရိုက်တဲ့အခါ သန္ဓေသားက အသက်ရှိသေးတယ် နှလုံးခုန်သေးတယ် မိခင်ကလည်းမွေးဖို့ဗိုက်နာပြီဆိုရင်တော့ ဆေးသွင်းပြီး ရိုးရိုးမွေးပါတယ်။
အဆုံးသတ်အနေနဲ့အကြံပေးချင်တာကတော့ ကိုယ်ဝန်အပတ်နှစ်ဆယ်နောက်ပိုင်းသွေးဆင်းတာဟာ အချင်းရှေ့ရောက်တာ၊အချင်းစောကွာတာ၊ချက်ကြိုးရှေ့ရောက်တာ၊ပိုးဝင်တာ၊သားအိမ်ခေါင်းကင်ဆာဖြစ်တာ၊သားအိမ်ခေါင်းမှာအလုံးကျိတ်ဖြစ်တာ စတဲ့စိုးရိမ်ရတဲ့အကြောင်းတွေကြောင့် ဖြစ်နိုင်ခြေများပါတယ်။
ဒါကြောင့် ကိုယ်ဝန်ဆောင်မိခင်များအနေနဲ့ ကိုယ်ဝန်အပတ်နှစ်ဆယ်(ငါးလနောက်ပိုင်း)သွေးဆင်းပါက ပေါ့ပေါ့ဆဆမနေဘဲ သွေးဆင်းတာနဲ့ နီးစပ်ရာဆေးရုံဆေးခန်းပြသပါလို့ အကြံပေးချင်ပါတယ်။
Dr. 528
