ကလေးမွေးပြီး အချင်းမကျရင်
အမျိုးသမီးတချို့အနေနဲ့ ကလေးမွေးတယ်ဆိုတာဟာ ကလေးထွက်ရင် ပြီးပြီလို့ ထင်တတ်ကြပါတယ်။ ဒီလိုထင်တာဟာမှားပါတယ်။
ကလေးထွက်ပြီး အချင်းကျတော့မှသာ ကလေးမွေးတဲ့ဖြစ်စဉ်ဟာ ပြီးမြှောက်တယ်လို့ပြောလို့ရတာပါ။
အချင်း (Placenta) ဆိုတာ သန္ဓေသားနဲ့ သားအိမ်နဲ့ကို ဆက်သွယ်ပေးထားတာပါ။
အချင်းကနေပြီး ချက်ကြိုးထွက်တယ် အဲချက်ကြိုးကနေတဆင့် သန္ဓေသားအတွက်လိုအပ်တဲ့ အစာအာဟာရတို့ အောက်ဆီဂျင်တို့ကို ထောက်ပံပေးတယ်။ သန္ဓေသားကနေစွန့်ပစ်လိုက်တဲ့ အညစ်အကြေးတွေကလည်း ချက်ကြိုးကနေတဆင့် အချင်းရောက်တယ် အချင်းကနေအဲ့အညစ်အကြေးတွေကိုဖယ်ရှားပေးတယ်။
ပုံမှန်ဆိုရင် ကလေးမွေးပြီး မိနစ်သုံးဆယ်အတွင်းမှာ အချင်းဟာ သားအိမ်နံရံကနေကွာကျလာရပါမယ်။
ကလေးမွေးပြီးနောက်မိနစ်သုံးဆယ်ကြာတာတောင် အချင်းကကျမလာသေးရင်တော့ အချင်းကပ်တယ် (Retained Placenta) လို့ ခေါ်ပါတယ်။
ကလေးမွေးပြီးနောက်အချင်းကကျမလာဘဲ အချင်းကပ်တာဖြစ်တဲ့အခါမှာ မိန်းမကိုယ်ကနေ သွေးအများကြီးဆင်းတာ၊ အနံတအားနံ့တဲ့ အရည်တွေဆင်းတာ၊ ဗိုက်တအားနာတာ၊ ဖျားတာစသဖြင့် ဖြစ်ပြီး အသက်အန္တရာယ်စိုးရိမ်ရတဲ့ အခြေအနေတွေဖြစ်နိုင်ပါတယ်။
ဒါကြောင့်အိမ်မှာရွာမှာ လက်သည် သို့မဟုတ် သားဖွားဆရာမနဲ့ ကလေးမွေးပြီးနောက်နာရီဝက်(မိနစ်၃၀)နေလို့မှ အချင်းမကျဘူးဆိုရင် ချက်ချင်းနီးစပ်ရာဆေးရုံကိုသွားဖို့လိုပါတယ်။
ကလေးမွေးပြီးနောက် အချင်းကပ်တဲ့အခါမှာ ဆရာဝန်က ဆီးပိုက်တပ်တာတွေ၊ သားအိမ်ညှစ်အားကောင်းစေတဲ့ ထိုးဆေးထိုးတာ လုပ်ပြီး ချက်ကြိုးရှည်ထွက်လာမလာစောင့်ကြည့်ပါမယ်။
ရှည်ထွက်လာတယ်ဆိုရင် ချက်ကြိုးကိုတချက်ထိန်းပြီးဆွဲကြည့်ကာ အချင်းချကြည့်ပါမယ်။
ဒီလိုတကြိမ်ကြိုးစားကြည့်လို့မှမအောင်မြင်ရင်တော့ ခွဲခန်းဝင်ပြီး မေ့ဆေး၊ထုံဆေးသုံးကာ နှိုက်ထုတ်ရပါမယ်။
ခွဲခန်းဝင်ပြီးလုပ်သော်လည်းမရဘဲ အချင်းကတအားကပ်နေကာ သွေးဆင်းတအားများနေတယ်ဆိုရင်တော့ သွေးသွင်းပြီး၊သားအိမ်ထုတ်ရတာမျိုးထိ ဖြစ်နိုင်ပါတယ်။
ကလေးမွေးပြီးနောက် အချင်းကျမလာတာကို ဖြစ်စေတဲ့အကြောင်းတွေကတော့
၁။ ဆီးအိမ်တင်းနေတာ၊ ရေမွှာရေများတာ၊ ကလေးမွေးချိန်ကြာတာ၊ အမွှာကိုယ်ဝန်ဖြစ်တာ၊ ကလေးကတအားကြီးတာ၊ သားအိမ်ထဲမှာအသားလုံးရှိတာ စတဲ့ အကြောင်းတွေကြောင့် သားအိမ်က လုံလုံလောက်လောက်ညှစ်အားမရှိခြင်း(Uterine atony)
၂။ အချင်းက သားအိမ်နံရံထဲကို နက်နက်ရှိုင်းရှိုင်းတွယ်ကပ်နေခြင်း၊
၃။ အချင်းက သူ့ပုံမှန်ရှိရမည့်နေရာမှာမရှိဘဲ အချင်းရှေ့ရောက်ခြင်း၊ စသဖြင့်အကြောင်းရင်းတွေအများကြီးရှိပါတယ်။
အဆုံးသတ်အနေနဲ့အကြံပေးရရင်တော့ အချင်းကပ်ခြင်းဟာ အသက်အန္တရာယ်ရှိတဲ့ အခြေအနေတခုဖြစ်တာကြောင့် ကလေးမွေးပြီဆိုရင် ဆေးရုံမှာမွေးဖို့၊ မတတ်နိုင်လို့ အခက်အခဲရှိလို့ အိမ်မှာရွာမှာမွေးရင်လည်း ကလေးမွေးပြီး နာရီဝက်အကြာမှာ အချင်းမကျပါက နီးစပ်ရာဆေးရုံမြန်မြန်သွားဖို့ အကြံပေးတိုက်တွန်းချင်ပါတယ်။
Dr 528
