အမျိုးသမီးတွေရဲ့ ကိုယ်ခန္ဓာဟာာ အချိန်မရွေး ပြောင်းလဲနိုင်ပါတယ်။ ရောဂါလက္ခဏာတစ်ခု ခံစားရလျှင် အဆိုပါ လက္ခဏာဟာ ကင်ဆာလားဆိုတာ နောက်ဆက်တွဲစဉ်းစားစရာပါ။
ဒါကြောင့် အမျိုးသမီးများအတွက် လစ်လျှူမရှုသင့်တဲ့ ကင်ဆာလက္ခဏာအကြောင်း ရေးသားပေးလိုက်ပါတယ်။
(1) ရင်သားပြောင်းလဲမှုများ
ရင်သားအကျိတ်တိုင်းကတော့ကင်ဆာမဟုတ်ပါ။ သို့သော် ရင်သားပြောင်းလဲမှုကိုတော့ သေချာစစ်ဆေးသင့်ပါတယ်။ အရေပြားပြောင်းလဲလာခြင်း၊ နို့သီးခေါင်းနဲ့ အရည်ထွက်ခြင်း စတာတွေဖြစ်ပါက သေချာစစ်ဆေးကြည့်ဖို့လိုပါတယ်။
(2) လေပွခြင်း
လေပွခြင်းဟာ သာမန်ဖြစ်လေ့ရှိသော လက္ခဏာတစ်ခုပါ။ တစ်ပတ်နှစ်ပတ်ထိ ဖြစ်နိုင်ခြေရှိပါတယ်။ သို့သော် အချိန်ကြာလာတဲ့အခါ လေပွခြင်းအပြင် သွေးထွက်ခြင်းနဲ့ အလေးချိန်ကျဆင်းခြင်းဟာ ပြဿနာတစ်ခု ဖြစ်လာနိုင်ပါတယ်။ လေပွခြင်းဟာ အစာအိမ်နဲ့ အူလမ်းကြောင်းကင်ဆာတွေရဲ့ လက္ခဏာတစ်ခု ဖြစ်ပါတယ်။ အခြားဖြစ်နိုင်ခြေရှိတဲ့ လက္ခဏာများပေါ်မူတည်၍ ကွန်ပျူတာဓာတ်မှန်ရိုက်ခြင်း၊ အသားစစစ်ခြင်းနှင့် မှန်ပြောင်းကြည့်ခြင်းတို့ဖြင့် ရောဂါရှာဖွေသင့်ပါတယ်။
(3) ပုံမှန်မဟုတ်ဘဲ ရာသီလာခြင်း
ရာသီတစ်လနှစ်ခါလာခြင်း၊ ပုံမှန်မဟုတ်ဘဲလာခြင်းသည် အကြောင်းရင်းကအများကြီးပါ။ အဆိုပါအကြောင်းရင်းထဲမှာ သားအိမ်ကင်ဆာကိုလည်း လစ်လျူမရှုသင့်ပါ။ ဒါကြောင့် အမျိုးသမီးများ ရာသီသွေးပုံမမှန်ခြင်းကိုလည်း ဂရုစိုက်ပါ။
(4) အရေပြားပြောင်းလဲခြင်း
အရေပြားပေါ်တွင် မူမမှန်အစက်အပြောက်တွေ့ခဲ့လျှင် သတိထားပါ။ အရေပြားကင်ဆာဟုတ်မဟုတ် အသားစ ယူစစ်ကြည့်ပါ။
(5) ဆီးထဲသွေးပါခြင်း သို့မဟုတ် ဝမ်းထဲပါခြင်း
ဆီးထဲသွေးပါခြင်းသည် ဆီးအိမ်ကင်ဆာဖြစ်နိုင်သလို ဝမ်းထဲပါခြင်းသည် လိပ်ခေါင်း သို့မဟုတ် အူမကြီးကင်ဆာအထိ ဆိုးရွားပါတယ်။ မပေါ့ဆသင့်ပါ။
(6) အကျိတ်ကြီးခြင်း
ကိုယ်ခန္ဓာတွင် အကျိတ်များရေရှည်ကြီးပါက သွေးကင်ဆာ ပြန်ရေကြောအကျိတ်ကင်ဆာထိ ဖြစ်နိုင်ပါတယ်။
(7) အစာမျိုရခက်ခြင်း
အစာမျိုရခက်ခြင်းသည် အခြားသောအကြောင်းရင်းများရှိသော်လည်း အန်ခြင်း ကိုယ်အလေးချိန်ကျခြင်းများဖြစ်ပါက လည်ချောင်းကင်ဆာ အစာအိမ်ကင်ဆာများကို သတိထားသင့်ပါတယ်။
(8) ကိုယ်အလေးချိန်ကျခြင်း
အကြောင်းရင်းမရှိ ကိုယ်အလေးချိန်ကျခြင်းဟာ ကင်ဆာအချို့ရဲ့ လက္ခဏာတစ်ခုဖြစ်ပါတယ်။
(9) ရင်ပူခြင်း
အစာအစားများကြောင့် ရင်ပူခြင်းဟာ ခဏတာဖြစ်ပေမဲ့ ရေရှည်ဖြစ်ပါက အစာအိမ်နှင့် အူလမ်းကြောင်းကို စစ်ဆေးသင့်ပါတယ်။
(10) ပါးစောင်အနာ
ကွမ်းစားသူဆေးလိပ်သောက်သူများတွင် ပါးစပ်အနာဖြစ်ခြင်းနှင့် ထူးခြားမူရှိခြင်းသည် အထူးအရေးကြီးပါတယ်။ ပါးစောင်ကင်ဆာ ဖြစ်နိုင်ပါတယ်။
(11) ဖျားခြင်းနာခြင်း
ပုံမှန်ဖျားခြင်း ကိုက်ခဲခြင်းသည် ကုသမူခံယူလျှင် ပျောက်ကင်းနိုင်ပေမဲ့ နာတာရှည်ဖြစ်လာခဲ့မူ ကင်ဆာရဲ့ ဇစ်မြစ်ကို ရှာဖွေသင့်ပါတယ်။
(12) ချောင်းဆိုးခြင်း
ချောင်းဆိုးခြင်းသည် ရက်ရှည်ဖြစ်လာပါက အဆုတ်လမ်းကြောင်းအတွက် အထူးအရေးကြီးပါတယ်။ အဆုတ်ကင်ဆာကို သေချာရှာဖွေကုသသင့်ပါတယ်။
Author: Dr. Pyae Shin
