ချောမွတ်ဝင်းပတဲ့အသားအရေကို ထိန်းသိမ်းမယ်ဆိုရင်

အသားအရေလေး ချောမွတ်ဝင်းပမှုကို ပိုင်ဆိုင်ဖို့ဆိုတာ လူတိုင်း၏စိတ်ကူးဆန္ဒတစ်ခု ဖြစ်မည်မှာ အသေအချာပဲဖြစ်ပါတယ်။ အသားဖြူခြင်း၊ လတ်ခြင်း၊ ညိုခြင်း မတူညီသောအသားအရောင်မရွေး ချောမွတ်ဝင်းပသည့်အနေအထားရအောင် ထိန်းသိမ်းနိုင်သော အသားအရေစောင့်ရှောက်မှု နည်းလမ်းများစွာရှိပါသည်။

ပထမဆုံးအဆင့်အနေဖြင့် အရေပြားရှိ ချွေးပေါက်များတွင် အဆီ၊ဖုန်မှုန့်၊ အညစ်အကြေးများ ပိတ်ဆို့မနေစေရန် အပျော့စားမျက်နှာသစ်ဆေးရည် သို့မဟုတ် ဆပ်ပြာဖြင့် တစ်နေ့လျှင် နံနက်၊ညတစ်ကြိမ်စီ သန့်စင်ပေးပါ။ မိတ်ကပ်၊သနပ်ခါး၊ နေရောင်ကာများလိမ်းထားသည့်မျက်နှာကို သင့်လျော်သော မိတ်ကပ်ဖျက်ဆေး၊ မျက်နှာသန့်စင်ဆေးရည်ဖြင့် ညအိပ်ရာမဝင်ခင် ချွေးပေါက်များအထိ သန့်စင်ပေးပါ။ ထိုသို့သန့်စင်ပေးခြင်းဖြင့် အရေပြားအတွင်းထိ အညစ်အကြေးများ ဖယ်ရှားပေးပြီး ချွေးပေါက်ပိတ်ဆို့ပြီး အဆီဖု၊ ဝက်ခြံများထွက်ခြင်းကို သက်သာစေနိုင်သည်။

အရေပြားအပေါ်ယံလွှာရှိ ဆဲလ်အသေအဟောင်းများကို Physical Exfoliant သို့မဟုတ် Chemical Exfoliant ပုံမှန်အသုံးပြုပြီး ဖယ်ရှားပေးပါ။ ကြေးချွတ် Scrub ကဲ့သို့ Physical Exfoliant ကို တစ်ပတ် ၂-၃ ကြိမ် အသုံးပြုပေးနိုင်သည်။ အရေပြားကို တိုက်စားမှု အနည်းငယ်ပြင်းသော Peeling-chemical Exfoliant များကို တစ်ပတ်လျှင် တစ်ကြိမ်ခန့်အသုံးပြုပေးခြင်းက ခြောက်သွေ့သော၊ထိခိုက်လွယ်သော အရေပြားပိုင်ရှင်များအတွက်ပါ သင့်တော်ပါသည်။

အရေပြားကို အထက်ပါအတိုင်း အတွင်းပိုင်းထိ သန့်စင်ပြီးလျှင် အရေပြား၏ အစိုဓာတ်ကို ထိန်းပေးနိုင်ရန် မိမိအသားအရေနှင့် သင့်လျော်သောအစိုဓတ်ထိန်းခရင်မ် Moisturizer တစ်မျိုးမျိုးကို မနက်၊ ညတစ်နေ့နှစ်ကြိမ် အသုံးပြုပေးပါ။ အရေပြားခြောက်သွေ့ပြီး အစိုဓာတ်မရှိလျှင် အရေပြားတောက်ပမှုမရှိ ကြမ်းတမ်းပြီး အရေးအကြောင်းများ ပို၍ဖြစ်ပေါ်စေနိုင်ပါသည်။

အရေပြား၏ အလှကိုပျက်ဆီးစေသည့် ဝက်ခြံ၊ တင်းတိပ်၊ နေလောင်ဒဏ်၊ အမဲစက်တို့ကို ဖြစ်စေနိုင်သည့် နေရောင်ခြည်နှင့် ခရမ်းလွန်ရောင်ခြည်ဒဏ်မှ ကာကွယ်ရန် Sun Protection Factor- SPF ပါဝင်သည့် နေရောင်ကာလိမ်းဆေးကို ပုံမှန်လိမ်းပေးပါ။ အပြင်မထွက်ခင်နာရီဝက်အလို ကြိုလိမ်းပေးရုံမက အိမ်မှာနေစဉ်လည်းလိမ်းပေးရပါမည်။ နေရောင်အောက်တွင် အချိန်ကြာကြာနေရသောအခါ နေရောင်ကာလိမ်းဆေးကို ထပ်လိမ်းပေးရန်လိုအပ်ပါသည်။

ချောမွတ်ဝင်းပသည့် အသားအရေကို ရရှိနိုင်ရန် နေ့စဉ်အသုံးပြုသော အလှကုန်ပစ္စည်းများတွင် Vitamin C ၊ Vitamin B3- Niacinamide စသည့် ပါဝင်ပစ္စည်းများပါသည့် အလှကုန်များကို အသုံးပြုပေးပါ။ အရေပြားကို ရေဓာတ်နှင့်အစိုဓာတ်ဖြည့်တင်းပေးသည့် မျက်နှာပေါင်းတင်ကပ်ခွာ Face Mask ကို အသုံးပြုပေးခြင်းဖြင့် အသားအရေကို ချောမွတ်ဝင်းပစေနိုင်သည်။ ထို့ပြင် မျက်နှာ၏ သွေးလည်ပတ်မှုကောင်းမွန်စေရန် ညင်သာစွာ နှိပ်နယ်ပေးခြင်းကို ပြုလုပ်ပေးသင့်ပါသည်။

အထက်ပါအသားအရေ ထိန်းသိမ်းမှုနည်းလမ်းများအပြင် ဆီကြော်၊ တာရှည်ခံ အစားအစာများ ရှောင်ကြဉ်ခြင်း၊ အာဟာရမျှတစွာ စားသုံးပေးခြင်း၊ ဓာတ်တိုးဆန့်ကျင်မှု Antioxidants ကြွယ်ဝသည့် လတ်ဆတ်သော အသီးအနှံများ စားပေးခြင်း၊ ခန္ဓာကိုယ်အတွက် ရေဓာတ်လုံလောက်အောင် တနေ့လျှင် ရေ ၂-၃ လီတာ သောက်ပေးခြင်း၊ အိပ်ရေးဝအောင် ညအိပ်ချိန်ပုံမှန်အိပ်ခြင်း၊ ခန္ဓာကိုယ်သွေးလည်ပတ်မှု ကောင်းမွန်အောင် ကိုယ်လက်လှုပ်ရှားမှု ပုံမှန်ပြုလုပ်ပေးခြင်းတို့ကလည်း အသားအရေလေး ချောမွတ်ဝင်းပမှု ရရှိအောင် ကူညီပေးနိုင်ပါသည်။

အကယ်၍ ဝက်ခြံ၊တင်းတိပ်၊ မှဲ့ခြောက်၊ အမည်းစက်၊ အမာရွတ်ကဲ့သို့ အရေပြားပြဿနာများကို ကြုံတွေ့ရလျှင် တတ်ကျွမ်းနားလည်သော အရေပြားအထူးကု၊ အလှအပဆိုင်ရာ ဆရာဝန်များနှင့် ဆွေးနွေးတိုင်ပင်ပြီး လိုအပ်သော ဆေးကုသမှု၊ လိမ်းဆေး၊ ဆဲလ်သေခွာကုသနည်း၊အလင်းရောင်၊ နှုန်းလွန်အသံလှိုင်းနှင့် လေဆာကုထုံးစသည့် နည်းလမ်းများသုံး၍ ကုသမှုခံယူသင့်ပါသည်။

Author: Dr. Yee Mon