သားအိမ်ဆိုတာ လူသားမျိုးဆက်ပွားများတည်တံဖို့အတွက် အဓိကကျတဲ့ အမျိုးသမီးအင်္ဂါတစ်ခုပါ။
လူဖြစ်လာမယ့်သန္ဓေသားလေးဟာ သားအိမ်ထဲမှာ စပြီးအခြေပြုကြီးထွားရပါတယ်။ သားအိမ်ရောင်တယ်ဆိုတာက တကယ်တော့ သားအိမ်ကိုအတွင်းကနေအုပ်ထားတဲ့ အလွှာ endometruim ရောင်တာပါ ။
သားအိမ်ရောင်တာဟာအများအားဖြင့်အသက်အန္တရာယ်မစိုးရိမ်ရပေမယ့် သိသိချင်းကုဖို့လိုပါတယ်။ ကုရင်လည်းပျောက်နိုင်ပါတယ်။ မကုဘဲထားမယ်ဆိုရင် တော့ သားအိမ်ရောင်တာကတဆင့် တင်ပဆုံခွက်မှာရှိတဲ့ အင်္ဂါတွေရောင်တာ ၊သားအိမ်မှာပြည်တည်တာ ၊နောက်ပိုင်းကလေးရဖို့ခက်တာ ၊ဆိုးရင် သွေးထဲကိုရောဂါပိုးရောက်သွားပြီး ရှော့ခ်(Septic shock)ရတာတွေဖြစ်နိုင်ပါတယ် ။
သားအိမ်ဘာလို့ရောင်တာလဲ ။
ပိုးဝင်လို့ပါ။ ဘယ်လိုအခြေအနေတွေမှာဝင်လည်းဆိုရင် လိင်ဆက်ဆံရာကနေတဆင့်ပိုးဝင်ခြင်း (ဥပမာ ဂနို) ၊ တီဘီပိုးဝင်ခြင်း ၊ ကလေးမွေးရာကနေတဆင့်ပိုးဝင်ခြင်း ၊ ကလေးဖျက်ချရာကနေတဆင့်ပိုးဝင်ခြင်း၊ သားဆက်ခြားပစ္စည်းထည့်ရာမှတဆင့်ပိုးဝင်ခြင်းစတာတွေကြောင့်ဖြစ်နိုင်ပါတယ်။ သားအိမ်ခေါင်းရောင်တာ(cervicitis)ကနေတဆင့်လည်း ပိုးဆက်ဝင်ပြီး သားအိမ်ရောင်(Endometritis)ကိုလည်းဖြစ်စေနိုင်ပါတယ် ။
ရောဂါလက္ခဏတွေကတော့ အချိန်အခါမဟုတ်ဘဲသွေးဆင်းတာ၊ အဖြူဆင်းတာ၊ ဗိုက်မှာအလုံးပေါ်တာ၊ ဝမ်းချုပ်တာ၊ ဖျားတာ ၊တင်ပဆုံကိုက်တာနာတာ ၊ ခါးနာတာ စတာတွေဖြစ်နိုင်ပါတယ်။
ဒီလက္ခဏာတွေဖြစ်ရင်တော့ သားအိမ်ရောင်တာဟုတ်မဟုတ် စိတ်ရှင်းအောင် ဆရာဝန်ဆီသွားပြီး အောက်ပါစမ်းသပ်မှုတွေလုပ်နိုင်ပါတယ်။
-သွေးစစ်တာ
-သားအိမ်ကနေအသားစယူစစ်တာ
-သားအိမ်ခေါင်းကအကျိအချွဲကိုယူပြီးစစ်တာ(အထူးသဖြင့် လိင်ဆက်ဆံရာကနေကူးတဲ့ပိုးအတွက်ပါ)
-ဆင်းတဲ့အဖြူကိုယူစစ်တာ
-မှန်ပြောင်းကြည့်တာ (laparoscopy procedure) စတာတွေလုပ်နိုင်ပါတယ်။
ဘယ်လိုကုမလဲ ။
အကြမ်းအားဖြင့်တော့ ပိုးသတ်ဆေး(Antibiotics) ပေးပြီးကုပါတယ်။တကယ်လို့ လိင်ဆက်ဆံရာကနေဝင်တဲ့ပိုး(Gonorrhoea နဲ့ Chlamydia)ဆိုရင်တော့ကိုယ်ရဲ့ဆက်ဆံဖော်(Partner)ပါကုဖို့လိုပါတယ် ။တအားအခြေအနေဆိုးရင်တော့ ဆေးရုံတက်ပြီး ကုသမှုခံယူရပါမယ်။ .
သားအိမ်မရောင်အောင်ဘယ်လိုကာကွယ်မလဲ ။
ပိုးဝင်လို့ဖြစ်တာဆိုတော့ ပိုးမဝင်အောင်ကာကွယ်ဖို့အရေးကြီးပါတယ် ။မိန်းမကိုယ်ကို သေချာသန့်ရှင်းပါ။ အတွင်းပိုင်းအထိရသလောက်သန့်ရှင်းရပါမယ်။ ဆီးသွားပြီးတိုင်းနဲ့ အိမ်ထာင်ရှိရင်တော့ အမျိုးသားနဲ့အတူနေပြီးတိုင်းမျိုးမှာပါ ။သန့်စင်ပြီးတိုင်းမှာခြောက်သွေ့အောင်အဝတ်သန့်သန့်နဲ့သုတ်ပါ ။သန့်စင်ဆေးရည်တွေအလွန်ကျွံမသုံးမိပါစေနဲ့။
အတွင်းခံတင်းကျပ်တာတွေမဝတ်ရပါ။ ချည်သားကို သုံးပါ ။အတွင်းခံကို ဆပ်ပြာနဲ့သေချာလျော်ပါ ။နေပူလှန်း မီးပူတိုက်ပြီးမှသုံးပါ ။ဝမ်းချုပ်မခံပါနဲ့။ ရေများများသောက်ပါ ။ဆီးများများသွားပါ ။အိမ်သာတက်ပြီးသန့်ရှင်းရေးလုပ်ရင် လက်က မိန်းမကိုယ်ကနေ စအိုဘက်ကိုပဲ(ဦးတည်ရာတစ်ဖက်တည်းပဲသွားပါ) ။ စအိုဘက်ကနေ မိန်းမကိုယ်ဆီ လက်ကပြန်လာတာမျိုးလုံးဝမလုပ်ပါနဲ့ ။ မိမိကဆက်ဆံဖော်များရင်သော်လည်းကောင်း ၊သို့မဟုတ် မိမိရဲ့ဆက်ဆံဘက်က
ဆက်ဆံဖော်များရင်သော်လည်းကောင်း ကွန်ဒုံးသုံးသင့်ပါတယ် ။
Author: Dr.528
