မိခင်နို့ချို တိုက်ကျွေးရင် ကလေးအတွက်သာမက မိခင်အတွက်ပါ ကျန်းမာရေးသုခနဲ့ ပြည့်စုံပါတယ်။ဘယ်လို ကျန်းမာရေးသုခတွေလဲ ဆိုတာ သိချင်ကြမယ် ထင်ပါတယ်။ မိခင်နို့တိုက်ကျွေးရင် အောက်ပါ ကျန်းမာရေးသုခများနဲ့ပြည့်စုံပါတယ်။
-မိခင်နို့တိုက်ကျွေးတဲ့အခါ မိခင်နဲ့ မိမိကလေး အကြည့်ချင်းဆုံသဖြင့် ပီတိသောမနာသဖြစ်ကာ မိခင်မှာ စိတ်ဘဝင် ရွှင်လန်းချမ်းမြေ့ရပါတယ်။
-ကလေးက မိခင်နို့ကို စို့တဲ့အခါ အောက်ဆီတိုစင် ဆိုတဲ့ ဟော်မုန်းလ် ထွက်လာကာ မိခင်နဲ့ ကလေးကြား ယုံကြည်မှုတိုးလာစေကာ ကြောက်ရွံ့မှုတွေကို လျော့နည်းစေပါတယ်။
-ထို အောက်ဆီတိုစင်သည် မိခင်ရဲ့ သားအိမ်ညှစ်အားကို အားပေးသဖြင့် မီးဖွားပြီးသွေးသွန်တာကို လျော့နည်းစေပါသေးတယ်။
-မိခင်နို့ထဲမှာ မပြည့်ဝတဲ့ ဖက်တီးအက်ဆစ် Poly unsaturated fatty acid ပါတဲ့အတွက် အင်ဆူလင်အာနိသင်ကျလို့ ဖြစ်တဲ့ ဆီးချိုသွေးချိုနဲ့ အဝလွန်ခြင်း ၊ သွေးတိုးခြင်းများကို ကလေးငယ်မှာ မဖြစ်အောင် ကာကွယ်ပေးပါတယ်။
-ထို့အပြင် ထို မပြည့်ဝတဲ့ ဖက်တီးအက်ဆစ်သည် ကလေးရဲ့ ဉာဏ်ရည်ဉာဏ်သွေးကိုလည်း တိုးတက်စေပါတယ်။
-နို့ဦးရည်မှာ အန်ဒေါဖင်း Endorphine ပါတဲ့အတွက် မီးဖွားစဉ် ကြုံခဲ့ရတဲ့ စိတ်ဖိစီးမှုဒဏ်တွေကို လျော့နည်းစေပါတယ်။
-မိခင်နို့မှာ ကလေးအတွက် လိုအပ်တဲ့ အင်မျူနိုဂလိုဗျူလင် Immunoglobulin A နဲ့ တခြား ခုခံအားဓာတ်တွေ ပါတဲ့အတွက် ကလေးကို ရောဂါပိုးများ ကူးစက်မှုမှ ကာကွယ်ပေးပါတယ်။
-မိခင်နို့မှာပါတဲ့ အက်ဆစ်ဓာတ်တွေကြောင့် ကလေးရဲ့ အူလမ်းကြောင်းမှာ လိုအပ်တဲ့ လက်တိုဘက်ဆီလိုင် lactobacilli လို့ခေါ်တဲ့ ဘတ်တီးရီးယားပိုးတွေ ပုံမှန်ရှင်သန်နိုင်အောင် ကူညီပေးပါတယ်။ ဒါမှ ကလေးဝမ်းမှန်လာမှာပါ။
-မိခင်နို့တိုက်ကျွေးရင် ဝမ်းပျက်ဝမ်းလျော ဖြစ်နှုန်း ၊နမိုးနီးယားဖြစ်နှုန်းတွေနည်းကာ ကလေး သေပျောက်နှုန်းလည်း ကျဆင်းလာနိုင်ပါတယ်။
-မိခင်နို့မှာ ကလေးအတွက် လိုအပ်တဲ့ အငန်ဓာတ် စိုဒီယမ် ကလိုရိုက်ဓာတ်၊ပိုတက်စီယမ် နဲ့ ကယ်လ်စီယမ်ဓာတ်များ သင့်တင့်လျောက်ပတ်တဲ့ ပမာဏပါပါတယ်။
-မိခင်နို့တိုက်ကျွေးခြင်းဖြင့် ကလေးမှာ အမျိုးအစား ၁ သွေးချို ဆီးချိုရောဂါ ၊ အဆစ်အမြစ်ရောင်နာ ၊အစားအသောက် စတဲ့ ဓာတ်မတည့်ရောဂါများ ဖြစ်ပွားနိုင်ခြေ လျော့နည်းစေပါတယ်။
-မိခင်မှာလည်း ရင်သားနဲ့ ပတ်သက်တဲ့ ပြဿနာများ ဖြစ်တဲ့ ရင်သားနာခြင်း ရောင်ခြင်း၊ရင်သားတင်းခြင်း ၊ပြည်တည်ခြင်း စတာတွေ အဖြစ်နည်းသွားပါတယ်။
-ဒါ့အပြင် မိခင်မှာ ကလေးကို နို့ချိုတိုက်ကျွေးခြင်းဖြင့် အဝမလွန်စေတဲ့ အကျိုးကျေးဇူး ရပါတယ်။
-ထို့အပြင် ကလေးကို နို့တိုက်နေသောမိခင်တို့မှာ ကိုယ်ဝန်ရနိုင်ခြေနည်းတယ်လို့ဆိုကြပါတယ်။
Author : ခေတ်သစ် ဇီဝက
