ကြီးချင်တဲ့ ဒုက္ခ
အခုခေတ်မှာ လူငယ်လူရွယ်တချို့ဟာ အင်တာနက်က အပြာရုပ်ရှင်တွေ၊ဖေ့ဘုတ်က လိင်ပိုင်းဆိုင်ရာဆေးနဲ့ပစ္စည်းတွေရောင်းတဲ့တရားမဝင်ပေ့(Page)တွေမှ ကြော်ငြာ အားကောင်းကောင်း အရေးအသားကောင်းကောင်းနဲ့ ရေးထားတာတွေကိုကြည့်ပြီး မိမိဟာမိမိ အားမလိုအားမရဖြစ်ကာ သူတို့ကြေငြာတာတွေကို စမ်းကြည့်တတ်ကြပါတယ်။အဲ့လိုစမ်းကြည့်တဲ့ထဲမှာ သောက်ဆေး၊လိမ်းဆေးတွေအပြင် ကြီးဆေးထိုးဆေးဆိုတာကို လက်တည့်စမ်း ထိုးပြီး ဆေးရုံရောက်ရောက်လာတဲ့ လူငယ်လူရွယ်တွေကို ခုနောက်ပိုင်း မကြာခဏတွေ့နေရပါတယ်။
ဒါကြောင့် ဒီတပတ်မှာ ကြီးဆေးထိုးခြင်းရဲ့ဆိုးကျိုးတွေကို ရေးသားတင်ပြချင်ပါတယ်။
၁။လိင်အင်္ဂါပုံစံမကျ၊ပုံစံပျက်သွားခြင်း
ကြီးဆေးထိုးတာကို အရပ်အခေါ်အရ သရီးစီစီထိုးတယ် သို့မဟုတ် ဆီလီကွန်ထိုးတယ်လို့ခေါ်ကြပါတယ်။
ကျွန်တော်တို့ရဲ့ လိင်အင်္ဂါကို ကြွက်သားတွေ၊သွေးကြောတွေ၊အာရုံကြောတွေနဲ့ဖွဲ့စည်းထားပါတယ်။
ကြီးဆေးထိုးတဲ့အခါမှာ ဆေးက လိင်တံထဲမှာခဲသွားတဲ့အတွက် လိင်အင်္ဂါအရွယ်အစားကကြီးလာပါတယ်။သို့သော် စမတ်ကျကျ အရွယ်အစားသေးကို ပုံကြီးချဲ့လိုက်တဲ့အတိုင်းအချိုးအစားမှန်မှန်ကြီးလာတာမဟုတ်ပါ။
ဘာလို့အဲ့လိုဖြစ်ရလဲဆိုတော့ ကျွန်တော်တို့မြန်မာနိုင်ငံမှာ ဒီလိုဆေးမျိုးတွေကိုတရားဝင်ခွင့်ပြုထားခြင်းမရှိတဲ့အတွက် မှောင်ခိုဈေးကွက်ကနေဝင်လာတဲ့အခါ ဆေးတွေကအရည်အသွေးလုံးဝမပြည့်မှီတဲ့အပြင် ထိုးပေးတဲ့သူတွေကလည်း ဆရာဝန်တွေ ကျွမ်းကျင်ပညာရှင်တွေမဟုတ်လို့ပါ။
ဒါကြောင့်ကြီးဆေးထိုးတဲ့အခါမှာကြီးတော့ကြီးလာပေမယ့် ပုံစံပျက်ပြီး ပုံမကျ ပန်းမကျဖြစ်ပြီးကြီးလာတာပါ။
၂။လိင်အင်္ဂါမှာအာရုံခံစားမှုမရှိတော့ခြင်း
စီလီကွန်ထိုးခြင်းဟာ လိင်တံမှာရှိတဲ့ သွေးကြောတွေ၊အာရုံကြောတွေကိုလည်း ထိခိုက်ပျက်စီးစေနိုင်ပါတယ်။
ဆေးထိုးလို့လိင်အင်္ဂါကကြီးလာပေမယ့်လည်း အာရုံကြော၊သွေးကြောတွေပျက်စီးသွားတဲ့အခါ သွေးအရောက်နည်းပြီး အာရုံခံစားမှုမရှိတော့တဲ့အတွက် လိင်တံထောင်မတ်ခြင်းမပြုနိုင်တော့ပါ။
ဒီအခါမှာသေးပေါက်ဖို့ကလွဲရင် ဘာမှအသုံးမဝင်တဲ့ လိင်တံဖြစ်သွားမှာပါ။
၃။လိင်အင်္ဂါတဝိုက်အနာဖြစ်ခြင်း
စီလီကွန်ထိုးဆေးနဲ့မတည့်တဲ့အခါ သို့မဟုတ် အပ်မသန့်လို့၊ဆေးထိုးပေးတဲ့သူကတကိုယ်ရည်သန့်ရှင်းမှုမရှိလို့ ဆီးပိုးဝင်တဲ့အခါမှာ ဆေးထိုးပြီးနောက် ယားတာ၊အနာဖြစ်တာတွေဖြစ်နိုင်ပါတယ်။
ဒါ့အပြင် ဆေးကမတော်တဆ ဝှေးစေ့နဲ့ဆီးခုံထဲရောက်သွားရင် အဲ့နေရာတွေမှာအလုံးအကြိတ်တွေဖြစ်နိုင်ပါတယ်။
၄။ကင်ဆာဖြစ်တာ
စီလီကွန်ထိုးခြင်းရဲ့အဆိုးဆုံးဘေးထွက်ဆိုးကျိုးတခုကတော့ ကင်ဆာဖြစ်နိုင်တာပါ။စီလီကွန်နဲ့ဆဲလ်တွေတစ်သျှူးတွေနဲ့တိုက်ရိုက်ထိတာကြာလာရင်ရေရှည်မှာကင်ဆာဖြစ်နိုင်ပါတယ်။ဒါကြောင့် အမျိုးသမီးတွေရင်သားထဲစီလီကွန်ထည့်တဲ့အခါမှာ ကျွမ်းကျင်ခွဲစိတ်ဆရာဝန်က အသားနဲ့တိုက်ရိုက်မထိတွေ့အောင် အကာအိတ်လေးတွေနဲ့ စနစ်တကျထည့်ပေးတာပါ။
ဒါတွေကတော့ ကြီးဆေးထိုးခြင်းရဲ့ဆိုးကျိုးအန္တရာယ်တွေပါ။တချို့တွေက ထိုးခါစမှာ ဖြစ်တာရှိသလို တချို့ကျလည်း ထိုးပြီးတနှစ် နှစ်နှစ်လောက်ကြာမှဖြစ်ပါတယ်။အချိန်စောတာနဲ့နောက်ကျတာပဲကွာပေမယ့်ထိုးသမျှလူတိုင်းအားလုံးနီးပါး ဒီဆိုးကျိုးတွေဖြစ်လေ့ရှိပါတယ်။ဘာလို့လဲဆိုတော့ အပေါ်မှာတခါပြောခဲ့သလို ဆေးတွေကအရည်အသွေးမပြည့်မှီတဲ့အပြင် ထိုးပေးတဲ့သူတွေကလည်း ကျွမ်းကျင်ပညာရှင်တွေမဟုတ်လို့ပါ။
ကြီးဆေးထိုးတာဟာဘေးထွက်ဆိုးကျိုးတအားများပြီး ပြန်လည်ကုသတဲ့အခါမှာလည်း ကုန်ကျစရိတ်တအားများကာ နဂိုအတိုင်းပြန်ဖြစ် ပြန်ကောင်းဖို့ကလည်းမလွယ်ပါဘူး။
ဒါကြောင့် အဆုံးသတ်အနေနဲ့အကြံပေးချင်တာက လူငယ်လူရွယ်များအနေနဲ့ အင်တာနက်ကြည့်ပြီး ဖေ့ဘုတ်က အရေးအသားကောင်းကောင်းနဲ့ကြော်ငြာထားတာတွေကြည့်ပြီး သူများမြှောက်ပေးတိုင်းကြီးဆေးထိုးတာမျိုးလုံးဝမလုပ်ဖို့အကြံပေးချင်ပါတယ်။
Dr 528
