ကာကွယ်ဆေးမထိုးထားရင် ဒဏ်ရိုက်တဲ့ တိုင်းပြည်
” ဦးလေး မလာလို့ ဆရာကတောင် မေးနေသေးတယ် ” မောင်အေးသည် ဦးလူဌေးကို မြင်ကတည်းက လှမ်းပြောလိုက်သည်။
” ဆေးခန်းဆိုတာ ခဏခဏ လာကောင်းတဲ့နေရာ မဟုတ်ဘူး။ အိမ်မှာလည်း မြေးထိန်းနေရသေးတယ်။ သတင်းထူးလေးတွေ ဖတ်ပြီးရင်တော့ ဆရာနဲ့လာဆွေးနွေးချင်တာပေါ့ ”
” လာခဲ့ပါ။ ဆရာကလည်း မျှော်နေတတ်တယ်”
” လာတော့ လာချင်တာပေါ့။ မင်းတို့ဆရာက အားတာလည်း မဟုတ်ပဲနဲ့။ တစ်ခါတစ်လေကျရင်လည်း အားနာတယ်။ ”
” ဒီလိုမျိုးဆေးခန်းပိတ်ခါနီးဆိုရင်တော့ အားပါတယ် ”
” လာနိုင်အောင်ကြိုးစားမယ်ကွာ ” ဦးလူဌေးသည်ကား ဆေးခန်းသို့လာကာ ဆရာဝန်နှင့် ဆွေးနွေး ချင်ပါသည်။ သို့သော် အိမ်မှာကလဲ မြေးထိန်းနေရသေးသည်။
” အခုကရော နေမကောင်းလို့ လာပြတာလား။ ဆရာနဲ့ လာဆွေးနွေးတာလား ”
” ဒီအချိန်ကြီး လာမှတော့ မင်းဆရာနဲ့ လာဆွေးနွေးတာပေါ့ ” ဦးလူဌေး မောင်အေးကို မသိရကောင်းလားဟု ငေါက်လိုက်သည်။
” ရှေမှာ လူနာတွေ စောင့်ရဦးမယ်နော်။ ”
” ရတယ်။ လူနာတွေ အားလုံးကုန်မှ ဝင်မှာပေါ့ ။ ဒါမှ စကားအေးအေးဆေးဆေး ပြောလို့ရမှာ ”
အတန်ကြာသော် ” လူနာတွေကလည်း များလိုက်တာနော်။ ” ဦးလူဌေးသည် စိတ်မရှည်တော့ဘူးထင်သည်။
” ရာသီအကူးအပြောင်းကြောင့်လည်း ပါမှာပေါ့။ ကျွန်တော်တို့ ဆေးခန်းတော့ ဝက်သက် ရောဂါ ဖြစ်တဲ့ ကလေးတွေ လာတာ အရမ်းများတယ် ”
” ရပ်ကွက်ထဲမှာ ကလေးတွေရော လူကြီးတွေရော ဝက်သက်ရောဂါ ဖြစ်ကြတယ်နော်။ အိမ်က မြေးတွေတောင် ဝက်သက်ဖြစ်မှာ စိုးရိမ်နေတာ။ ”
” ကာကွယ်ဆေးထိုးထားတယ်မလား။ ”
” ကာကွယ်ဆေးတွေတော့မှန်မှန်ထိုးထားတာပေါ့။ ဒါကြောင့်လည်း ကလေးတွေ ဝက်သက် မဖြစ်တာ။ ။ ဒါပေမဲ့ သားအငယ်ကောင်တော့ တစ်လောက ဝက်သက် ဖြစ်သွားသေးတယ်။ မင်းတို့ဆေးခန်းတောင် လာသေးတယ် ”
” ဟုတ်ကဲ့”
” ရိုးရိုးဖျားတယ် ထင်တာ။ ပြီးမှ ဝက်သက်ဖြစ်နေတာ ။ ကလေးတွေကတော့ကာကွယ်ဆေး ထိုးထားလို့ ဘာမှမဖြစ်ကြဘူးကွာ”
” ဒါကြောင့်လည်း ကလေးတွေကို ကာကွယ်ဆေးကို ဂရုတစိုက်ထိုးပေးဖို့ နိုးဆော်နေရတာပေါ့။ ”
ဒေါက်တာ စိုးသန်းသည် ဆေးခန်းတွင်းမှ ထွက်လာသည်။
” အပြင်မှာပဲထိုင်မယ်။ အပြင်လေက ပိုပြီးအေးတယ် ” ဦးလူဌေးနှင့် မျက်နှာချင်းဆိုင်တွင် ဝင်ထိုင်လိုက်သည်။ ဒေါက်တာ စိုးသန်းသည် တော်တော်လေးကို ပင်ပန်းနေပုံပေါက်သည်။
” ဆရာလည်း ပင်ပန်းနေပြီ ” ဦးလူဌေး စကားစလိုက်သည်။
” ကဲ ဘာသတင်းတွေများ ထူးသေးလဲ”
” BBC ကနေ သတင်းတစ်ပုဒ်ပါလာတယ်ဆရာ။ ဆရာဖတ်ပြီးသွားပြီလား ”
” သတင်းတွေက အများကြီးပဲ ဘာသတင်းကို ပြောတာလဲ ”
” အီတလီနိုင်ငံမှာ ကလေးငယ်တွေကို ကာကွယ်ဆေးထိုးဖို့အတွက် Law အသစ်တစ်ခု ပြဌာန်းလိုက်တယ်ဆိုတဲ့ သတင်းလေ ”
” ဟုတ်တယ် ကျွန်တော် တွေ့မိတယ်။ ”
“ကျွန်တော် ဒီသတင်းကို ဖတ်ရတော့ သိပ်အားရတာပဲ ဆရာရယ်။ Law တစ်ခု ထွက်ပြီးတော့ကို ကလေးငယ်တွေကို ကာကွယ်ဆေးထိုးဖို့ လုပ်ရတယ်ဆိုတော့ သူတို့ဆီမှာလည်း ကျွန်တော်တို့ဆီမှာလို ကာကွယ်ဆေးထိုးစရာ မလိုဘူးဆိုတဲ့ အယူအဆတွေ ရှိနေလို့ပေါ့နော် ”
“ဟုတ်တယ်ဗျာ။ ကျွန်တော်တို့ဆီမှာလည်း ကာကွယ်ဆေးထိုးစရာမလိုဘူးဆိုပြီး Facebook လို Social media မှာ လျှောက်ရေးတဲ့သူတွေရှိတော့ နားယောင်တဲ့သူတွေက နားယောင်တာပေါ့။ အဲဒီအတွက် ကလေးငယ်တွေမှာ ကူးစက်ရောဂါတွေဖြစ်ပွားပြီး မလိုအပ်ပဲ အသက်သေဆုံးရတာပေါ့ ”
” ဘာသတင်းလဲ ဆရာ။ ဆရာတို့က ဖတ်ပြီးပြီဆိုပေမဲ့ ကျွန်တော်မသိသေးတဲ့အတွက် ကျွန်တော့်ကို ပြောပြပါဦး” မောင်အေးသည် စိတ်ဝင်စားလာသည်။
” အီတလီနိုင်ငံမှာဆိုရင် အသက်ခြောက်နှစ်အောက် ကလေးငယ်တွေ မူကြိုတက်မယ်ဆိုရင် ကလေးတွေကို ကာကွယ်ဆေးထိုးထားကြောင်း အထောက်အထားတွေပြရမယ်။ ကာကွယ်ဆေး ထိုးထားကြောင်း အထောက်အထားမပြနိုင်ရင် မူကြိုထားလို့မရဘူး။ ”
” ကောင်းလိုက်တဲ့ အစီအစဉ်။ ” မောင်အေးသည် အားရဝမ်းသာစွာ ထောက်ခံသည်။
” အသက် ခြောက်နှစ်ကျော်လို့ ကျောင်းကြီးတက်မယ်ဆိုရင်တော့ သူတို့နိုင်ငံက သတ်မှတ်ထားတဲ့ ကာကွယ်ဆေးထိုးထားတဲ့ အထောက်အထား ပြစရာမလိုဘူး။ ကလေးတိုင်းကျောင်းတက်ခွင့် ရှိတယ်။ ကာကွယ်ဆေးမထိုးထားလို့ ကျောင်းမတက်ရဘူးလို့တော့ မပြဌာန်းထားဘူး။ ဒါပေမဲ့ မိဘတွေ ဒဏ်ငွေဆောင်ရမယ်။ ”
” ဒဏ်ငွေကများလား ဆရာ ”
” ယူရိုငွေ ၅၀၀ ၊အမေရိကန် ဒေါ်လာ ဆိုရင် ၅၆၀ ပေးဆောင်ရမယ်လို့ သတ်မှတ်လိုက်တယ်။ သူတို့ဆီမှာလည်း ဝက်သက်ရောဂါတွေ ဖြစ်ပွားနှုန်း အရမ်းမြင့်တက်နေတယ်တဲ့”
” ကျွန်တော်တို့ တစ်နိုင်ငံထဲ ဝက်သက်ရောဂါ ဖြစ်နေတာ မဟုတ်ဘူးပေါ့နော်။ ” မောင်အေး လေသံက ပျော်ရွှင် သွားပုံရသည်။
” ဝက်သက်က နိုင်ငံတော်တော် များများမှာဖြစ်ပွားနှုန်းအရမ်းကို မြင့်တက်နေတာ ”
” ကျွန်တော်တို့ နိုင်ငံမှာလည်း ဒီလိုမျိုး ဥပဒေတွေ ထွက်လာရင် ကောင်းမှာပဲနော်” ဦးလူဌေးသည် သူ့ဆန္ဒကို ထုတ်ဖော်ပြောသည်။
” သူတို့နိုင်ငံမှာတောင် ဒီဥပဒေတစ်ခုထွက်ဖို့ မူကြမ်းကို အရှေ့အစိုးရ လက်ထပ်ကတည်းက မူကြမ်းကို တင်သွားခဲ့ပြီးသား။ အခုအစိုးရလက်ထပ်မှာမှ ပြဌာန်းနိုင်တာ။ ဥပဒေတစ်ခုထွက်ဖို့ အကြာကြီး ကြိုးစားရတာ။ အချိန်ယူရတာပါ။ ကျွန်တော်တို့ဆီမှာတော့ ရွှေပြည်တော် မျှော်တိုင်းဝေးပေါ့”
ဒေါက်တာ အောင်နိုင်စကားကြောင့် ဦးလူဌေးသည် ဝမ်းနည်းသွား၏။ သို့သော် မိမိ မတတ်နိုင်သော ကိစ္စများသာ။
” ကျွန်တော်တို့ဆီမှာလည်း ဥပဒေတွေမရှိပေမဲ့ ပညာပေးအစီအစဉ်တွေတော့ အမြဲလုပ်နေတာပဲလေ။ ကျွန်တော်ဆို ဆေးခန်းလာသမျှကလေး ကာကွယ်ဆေးထိုးဖို့ တိုက်တွန်းနေတာပဲ ” မောင်အေးသည် သူ့လုပ်ရပ်ကို အလွန်ဂုဏ်ယူနေပုံရသည်။
” ဒီနှစ် measles အဖြစ်များတာကလည်း ကာကွယ်ဆေးမထိုးခဲ့တဲ့ အကျိုးဆက်တွေပေါ့”
ဒေါက်တာ စိုးသန်းသည် တွေးတွေးစစနှင့် ပြောလိုက်သည်။
ဦးလူဌေးသည် နာရီကို ငုံ့ကြည့်လိုက်သည်။
“ပြန်ဦးမယ် ဆရာ။ ဆရာလည်းနားရဦးမယ်။ အိမ်က အမေကြီးကလည်း ကလေးမထိန်းပဲ အပြင်ထွက်နေတယ်ဆိုပြီး အော်နေဦးမယ် ”
” ဟုတ်ကဲ့ပါဗျာ ”
ဦးလူဌေးသည် သွက်လက်စွာပင် ဆေးခန်းထဲမှ ထွက်သွားခဲ့သည်။ မောင်အေးသည် ဆေးခန်းပိတ်ရန် ပြင်လိုက်သည်။
အဝေးမှ ကာလသားတစ်စု၏ တေးသီချင်းသီဆိုသံကို တရေးရေးကြားနေရသည်။
လေနုအေးလေးက တိုက်ခတ်လျှက်။
ကောင်းကံတွင် တိမ်တို့ ကင်းစင်လျှက် ကြယ်သာယာတို့ လင်းလက်နေ၏။
ဒီလိုပဲ ကမ္ဘာ လောကကြီးသာယာပါစေလို့ ဒေါက်တာစိုးသန်း ဆုတောင်းကာ အိမ်သို့ ခြေဦးလှည့်လိုက်သည်။
Dr. အေးချမ်းမိုး
