မေမေတစ်ယောက် အထူးသဖြင့် စံပြမေမေတစ်ယောက် ၊ သားသမီးတွေရော ပတ်ဝန်းကျင်ကပါ အမေကောင်းတစ်ယောက်အဖြစ်သတ်မှတ်ခံရဖို့အတွက်ဆိုရင် စိန်ခေါ်မှုတွေအများကြီးရှိတယ်လို့ ဆိုကြပါတယ်။
ဘယ်လိုစိန်ခေါ်မှုတွေလဲ ကြည့်လိုက်ရအောင်။
စိန်ခေါ်မှုတွေက ဘာလဲဆိုတာ သိတဲ့နောက်မှာ ဘယ်လိုရင်ဆိုင်ကျော်လွှားမလဲဆိုတာကိုပါ နည်းနည်းလေး ပြောပြချင်ပါသေးတယ်။
(၁)
အမေတစ်ယောက်ကို အကြီးဆုံးစိန်ခေါ်နေတဲ့ အနီးကပ်ဆုံး စိန်ခေါ်သူကတော့ “သူမကိုယ်တိုင်” ပါပဲ။
“အမေဆိုတာ တခါတုန်းက သမီးပါပဲ” ဆိုတဲ့စကားလေးလိုပါပဲ။
သမီးတစ်ယောက်အဖြစ် မိမိဖြတ်သန်းခဲ့တဲ့ ငယ်ဘဝရဲ့ ကောင်းခြင်းဆိုးခြင်းတွေ၊ ပျော်စရာ၊ နာကျည်းစရာ၊ စိတ်ခွန်အားဖြစ်စရာ၊ စိတ်ဒဏ်ရာရစရာ စသည် စသည် အားလုံးက ကလေးဘဝနဲ့အတူ ပျောက်ကွယ်သွားတာတော့ မဟုတ်ပါဘူး။
ဒီအရာတွေအားလုံးက မှတ်ဉာဏ်နဲ့ စိတ်နှလုံးသား ဝိဉာဏ်ထဲမှာ တစ်သက်တာလုံး ခိုအောင်းပြီး ပါလာပါတယ်။
မိခင်တစ်ယောက်ဟာ သူငယ်ငယ်က ထိန်းကျောင်းခံခဲ့ရတဲ့ Parenting Style က မိမိသားသမီးထိန်းကျောင်းမှုအပေါ်အများကြီးလွှမ်းမိုးမှုရှိပါတယ်။
“ငါ့တုန်းက ဘယ်လို” “ငါ့သားသမီးကျရင် ဒီလိုဖြစ်စေရမယ်” “ဒီလိုမဖြစ်စေရဘူး”ဆိုတဲ့အတွေးမျိုး လူတော်တော်များများမှာရှိတတ်ပါတယ်။
ဒါပေမဲ့ စိတ်ပညာရဲ့ ထူးဆန်းအံ့အားသင့်စရာ အချက်တစ်ချက်ကိုပြောရရင် မိဘတော်တော်များများဟာ မိမိမကြိုက်ခဲ့တဲ့ ထိန်းကျောင်းမှုပုံစံမျိုးကိုပဲ မိမိသားသမီးတွေကို ပြန်ပေးမိနေတတ်ပါတယ်။
ဒီတော့ ဒီစိန်ခေါ်မှုအတွက်ဆိုရင် မေမေတွေအနေနဲ့ မိမိစိတ်၊ မိမိငယ်ဘဝ၊ မိမိသားသမီးကို ထိန်းကျောင်းရာမှာ အခက်အခဲဖြစ်နေတဲ့အရာတွေကို ကိုယ်တိုင်နားလည်ဖို့လိုပါတယ်။
မိမိကိုယ်တိုင်မဖြေရှင်းနိုင်တာတွေအတွက် ကျွမ်းကျင်သူတွေကို မေးမြန်းဖို့နဲ့ မိမိသားသမီးရဲ့ ပျော်ရွှင်မှုကသာ အရေးအကြီးဆုံးဖြစ်တယ်ဆိုတာကို နားလည်ထားဖို့ လိုပါတယ်။
မိမိမဖြစ်ခဲ့တဲ့ မိမိလိုချင်ခဲ့တဲ့အရာကို အစားထိုးဖို့ မိမိသားသမီးလေးတွေ ဒီကမ္ဘာပေါ်ရောက်လာတာမဟုတ်ဘူးဆိုတာ အမြဲသတိရှိဖို့လိုပါတယ်။
သူတို့လေးတွေ ကိုယ်ပိုင်အိပ်မက်၊ ကိုယ်ပိုင်ဘဝနဲ့ လွတ်လွတ်လပ်လပ် အမှီအခိုကင်းကင်း ကြီးပြင်း ပျံသန်းသွားနိုင်ဖို့က စံပြမေမေတစ်ယောက်ရဲ့ ရည်မှန်းချက်ဖြစ်ရပါမယ်။
(၂)
မေမေတစ်ယောက်အတွက် နောက်ထပ် စိန်ခေါ်မှုကြီးတစ်ခုကတော့ “မေမေတွေ” ပါပဲ။
တိတိကျကျပြောရရင်တော့ မိမိပတ်ဝန်းကျင်က တခြားသော မေမေတွေပါ။
အမေဆိုတာလည်း လူသားတွေဖြစ်တဲ့အတွက် စိတ်ထားမျိုးစုံ ၊ ပုံစံမျိုးစုံ ၊ လူနေမှုအဆင့်အတန်းမျိုးစုံ ရှိနေတတ်ပါတယ်။
“သူကတော့ သူ့သားသမီးကို ဒီလိုထားတယ်” “သူကတော့ ဒါလုပ်ပေးနိုင်တယ်” “သူကတော့ ဒီကျောင်းမှာထားနိုင်တယ်” “သူကတော့ ဒီလိုစနစ်တကျကျွေးမွေးနိုင်တယ်” ဆိုတဲ့ အတွေးတွေက စိန်ခေါ်မှုတွေအဖြစ် မေမေတွေကို စိတ်ဖိစီးစေပါတယ်။
ဒါကြောင့် မေမေအချင်းချင်း ပိုဖေးမဖို့လိုပါတယ်။
မေမေအချင်းချင်းမှာလည်း စေတနာကြောင့်ဖြစ်စေ၊ ကြွားဝါချင်စိတ်ကြောင့်ဖြစ်စေ “ကျမတော့ ဘယ်လိုလုပ်ပေးတာ ၊ ဒါမျိုးလေးလုပ်ပေးကြည့်ပါလား”
ဆိုတာမျိုး ဘယ်တော့မှမပြောမိပါစေနဲ့။
တကယ်စေတနာပါပါ လမ်းညွှန်မယ်ဆိုရင်တောင် ရင်းနှီးနွေးထွေးမှု စာနာနားလည်မှု မြင်သာထင်သာရှိပါစေ။
မိမိအတွက် ဘာမှမဟုတ်တဲ့ စကားလေးတစ်ခွန်းက နောက်မေမေတစ်ယောက်အတွက် ထိခိုက်မှုကြီးတစ်ခုဖြစ်သွားစေတတ်ပါတယ်။
မိခင်တစ်ယောက်ရဲ့ စိတ်ဓာတ်ပြိုလဲမှုက သားသားမီးမီးတွေရဲ့ အနာဂတ်ပျောက်ဆုံးမှုဆိုတာအမြဲသတိရှိပေးပါ။
ကလေးတိုင်းရဲ့ ဘဝကို လှပစေဖို့ဆိုရင် မေမေတိုင်းဟာလည်း မိမိသားသမီးအတွက် အကောင်းဆုံးလုပ်ဆောင်ပေးနေသူတွေပဲဆိုတဲ့ ကိုယ့်ကိုယ်ကိုယုံကြည်မှုရှိဖို့လိုပါတယ်။
ဒီကိုယ့်ကိုယ်ကို ယုံကြည်မှုကပဲ မိမိသားသမီးတွေရဲ့ နောက်မျိုးဆက်အတွက်ပါ အကောင်းဆုံးထိန်းကျောင်းမှုပုံစံတစ်ခုကို အမွေအဖြစ်ပေးခဲ့နိုင်စေမှာ ဖြစ်ပါတယ်။
(၃)
မေမေတွေအတွက် နောက်ထပ်စိန်ခေါ်မှုတစ်ခုကတော့ အနီးဆုံးမှာရှိနေတဲ့ “ဖေဖေ”တွေပါပဲ။
ဖေဖေတစ်ယောက်ဟာ အကောင်းဆုံး ပံ့ပိုးသူတစ်ယောက်ဖြစ်နိုင်သလို အဆိုးဆုံး စိန်ခေါ်သူတစ်ယောက်လည်း ဖြစ်သွားနိုင်ပါတယ်။
မေမေတွေအနေနဲ့ အကောင်းဆုံးပံ့ပိုးနေတဲ့ ဖေဖေတစ်ယောက်ကို ကျေးဇူးတင်အသိအမှတ်ပြုပေးဖို့လိုသလို အကူအညီမရတဲ့ အပြစ်ပဲတင်တတ်တဲ့ စိတ်ဆင်းရဲစရာပဲပေးနေတဲ့ ဖေဖေတွေဖြစ်နေခဲ့ရင်လည်း လစ်လျှူရှုပြီး မိမိရဲ့ အကောင်းဆုံးပုံစံကို မပျက်မယွင်း မိမိသားသားမီးမီးတွေကို ဆက်ပေးသွားဖို့လိုပါတယ်။
ဖေဖေတွေအနေနဲ့လည်း အပေါ်မှာပြောခဲ့တဲ့ စိန်ခေါ်မှုတွေကို နားလည်ပေးဖို့လိုပါတယ်။
သားသားမီးမီးတွေအတွက် အကောင်းဆုံးဖေဖေဆိုတာ ကလေးတွေအပေါ်ကြင်နာနေရုံနဲ့ မဖြစ်သွားပါဘူး။
စံပြဖေဖေဆိုတာ မေမေတွေအပေါ်ဘယ်လောက်အကောင်းဆုံးဆက်ဆံလဲ ဘယ်လောက် မေမေတွေကို ပြုံးပျော်စေလဲဆိုတာနဲ့ပဲဆုံးဖြတ်ရပါတယ်။
အပေါ်မှာပြောခဲ့တဲ့ စိန်ခေါ်မှုတွေအပြင် နေ့စဉ်ဘဝမှာလည်း မေမေတွေအနေနဲ့ အိမ်ထောင်မှုတာဝန်တွေ၊ နေ့စဉ်ကြုံတွေ့နေကျ အခက်အခဲတွေ၊ သားသားမီးမီးတွေရဲ့ ကျန်းမာရေးပြဿနာတွေ စသည်ဖြင့် တခြားသောစိန်ခေါ်မှုမျိုးစုံကလည်း စောင့်ကြိုနေကြပါသေးတယ်။
ဘာပဲဖြစ်ဖြစ် ဘယ်စိန်ခေါ်မှုကိုမဆို ကျော်လွန်နိုင်ဖို့ ရင်ဆိုင် အောင်မြင်နိုင်ဖို့ လက်နက်ကတော့ မေမေတွေဆီမှာ ရှိနှင့်ပြီးသားဆိုတာ ဘယ်တော့မှမမေ့ပါနဲ့။
မိမိကိုယ်ကိုယုံကြည်ပါ။
သင်ဟာ အကောင်းဆုံးမေမေတစ်ယောက်ပါ။
မေတ္တာဖြင့်
Dr ဖြိုးဝေလင်း
