ကလေးများစိတ်ပိုင်းဆိုင်ရာ ပြဿနာများနှင့် DHA

စိတ်ပိုင်းဆိုင်ရာ ပြဿနာများသည် ကလေးများမကြာခဏကြုံတွေ့ရလေ့ရှိသော ကျန်းမာရေးဆိုင်ရာ ပြဿနာများထဲမှ တစ်ခုဖြစ်ပါသည်။

စိုးရိမ်စိတ်လွန်ကဲခြင်း၊ စိတ်ကျခြင်း စသည့်စိတ်ပိုင်းဆိုင်ရာပြဿနာများကို စနစ်တကျနည်းလမ်းမှန်စွာဖြင့် ကုသမှုပေးခဲ့ပါက ပျောက်ကင်းနိုင်သကဲ့သို့၊ ကောင်းမွန်သော ကုသမှုများမပေးနိုင်ခဲ့ပါက နောက်ဆက်တွဲပြဿနာအများအပြား ဖြစ်ပေါ်လာနိုင်ပါသည်။

ထိုသို့သော ကလေးများ၏ စိတ်ပိုင်းဆိုင်ရာပြဿနာများကို သက်သာပျောက်ကင်းအောင် ကုသပေးနိုင်သည့်နည်းလမ်းများစွာရှိပါသည်။

ထိုနည်းလမ်းများထဲတွင် ဖြည့်စွက်အာဟာရများဖြင့် ကုသခြင်းနည်းလမ်းသည်လည်း တစ်ခုအပါအဝင်ဖြစ်ပါသည်။

ကလေးများ၏ စိတ်ပိုင်းဆိုင်ရာတိုးတက်ကောင်းမွန်စေရန် အကူအညီပေးနိုင်သော အာဟာရဓါတ်များနှင့် အစားအစာများစွာရှိပါသည်။ ထိုအထဲတွင် Omega-3 Fatty Acids (DHA) သည်လည်း တစ်ခုအပါအဝင်ဖြစ်ပါသည်။

Omega-3 Fatty Acids (DHA) များသည် ကလေးများကို ကြီးထွားဖွံ့ဖြိုးမှုနှင့် သက်ဆိုင်သည့် ရုပ်ပိုင်းဆိုင်ရာကျန်းမာရေးအတွက် ကောင်းကျိုးများစွာ ပေးနိုင်ရုံသာမက စိတ်ပိုင်းဆိုင်ရာကျန်းမာရေးအတွက်လည်း ကောင်းကျိုးများစွာ ပေးစွမ်းနိုင်ပါသည်။

မကြာသေးမီနှစ်ပိုင်းများကပြုလုပ်သော လေ့လာတွေ့ရှိချက်များအရ Omega-3 Fatty Acids များချို့တဲ့ခြင်းသည် စိတ်ကျရောဂါ၊ စိုးရိမ်မှုလွန်ကဲသည့်ရောဂါနှင့် ADHD ရောဂါများနှင့် ဆက်စပ်မှုရှိနေကြောင်း တွေ့ရှိရပါသည်။

ကလေးများ စိတ်ပူပန်မှုလွန်ကဲခြင်းပြဿနာကို ပျှမ်းမျှအားဖြင့် ကလေး ၈ ယောက်တွင် ၁ ယောက် ကြုံတွေ့ရလေ့ရှိပါသည်။

ထိုပြဿနာကို ကောင်းမွန်စွာ ကုသမှုမခံယူခဲ့လျှင် ကျောင်းတွင်းဆိုင်ရာလုပ်ဆောင်ချက်များ ကျဆင်းလာခြင်း၊ ပတ်ဝန်းကျင်နှင့် အဆင်မပြေဖြစ်ခြင်းနှင့် စိတ်ကျခြင်းကဲ့သို့သော အခြားစိတ်ပိုင်းဆိုင်ရာ ပြဿနာများကို ဖြစ်ပေါ်လာစေနိုင်ပါသည်။

DHA သည် Serotonin  ပမာဏကို ထိန်းညှိပေးကာ အာရုံကြောဆဲလ်များ၏ကျန်းမာရေးကို ကောင်းမွန်စေခြင်းအားဖြင့် စိတ်ဖိစီးမှုနှင့် စိုးရိမ်ပူပန်မှုလွန်ကဲသည့် ရောဂါများကို လျှော့ချပေးနိုင်ကြောင်း တွေ့ရပါသည်။

ထို့ပြင် DHA သည် ဦးနှောက်ထဲတွင် အများအပြားစုဝေးတည်ရှိနေပြီး အာရုံကြောဆဲလ်များ၏ ပုံမှန်လုပ်ငန်းဆောင်တာများ လုပ်ဆောင်နိုင်စေရန် အကူအညီပေးပါသည်။

အကယ်၍ ထို DHA လျော့နည်းခဲ့ပါက ဦးနှောက်နှင့်အာရုံကြောဆဲလ်များကို ဝန်းရံထားသည့် ဓာတုဗေဒပစ္စည်းများ မလုံမလောက်ဖြစ်လာကာ အာရုံကြောဆဲလ်များ၏ လုပ်ဆောင်ချက်များကို အနှောင့်အယှက်အဟန့်အတား ဖြစ်လာစေပါသည်။

ထို့အခါ စာပေ၊ ဘာသာစကားစသည်တို့ကို သင်ယူမှုခက်ခဲလာခြင်းနှင့် သတင်းအချက်အလက် အသစ်များကို ဦးနှောက်အတွင်းတွင် လက်ခံထိန်းသိမ်းမှတ်သားထားနိုင်စွမ်း ကျဆင်းလာခြင်း စသည့်ပြဿနာများကို ကြုံတွေ့လာရနိုင်ပါသည်။

ထိုသို့ အများနည်းတူ တန်းတူရည်တူသင်ကြားမှုမလုပ်နိုင်ခြင်းများက ကလေးများကို စိုးရိမ်ပူပန်ခြင်းများ ပိုမိုများပြားလာစေပါသည်။

ထိုသို့ စိုးရိမ်ပူပန်မှုများ ပိုမိုများပြားလာခြင်းသည် သင်ကြားခြင်း၊ သင်ယူခြင်းဆိုင်ရာ စွမ်းဆောင်ရည်များကို ပိုမို ကျဆင်းလာစေပါသည်။

ဤနည်းအားဖြင့် မကောင်းသည့်သံသရာလည်ပတ်လာကာ တဖြည်းဖြည်းနှင့် စာသင်ကျောင်း၊ စာသင်ကြားခြင်းနှင့် ဆရာ၊ ဆရာမများကို ကြောက်ရွံသည့်စိတ်များ၊ စိုးရိမ်ပူပန်မှုလွန်ကဲသည့်စိတ်များ ကလေးများတွင် ပိုမိုကိန်းအောင်းလာနိုင်ပါသည်။

ထို့ကြောင့် DHA အပါအဝင် ကလေးများ၏ ကိုယ်စွမ်း၊ ဉာဏ်စွမ်းများကို တိုးတက်စေမည့် အစာအာဟာရများကို စုံလင်အောင် စီစဉ်ကျွေးမွေးပေးခြင်းအားဖြင့် ထူးချွန်ထက်မြက်သော သားငယ်၊ သမီးငယ်များဖြစ်လာစေရန် ပြုစုပျိုးထောင်သင့်ပါကြောင်း တင်ပြလိုက်ရပါသည်။

Author : Dr. မွန်