မိခင်နို့ချိုတိုက်ကျွေးခြင်း

ကလေးမွေးပြီးစ မိခင်တွေမှာ အမေနို့တိုက်ကျွေးပုံနဲ့ပက်သက်ပြီး တချို့လည်းသေသေချာချာသိကြတယ်။ တချို့လည်းမသိကြဘူး။ သားဦးမိခင်တွေ က    တော့ သေချာမသိတတ်ကြဘူး။ဆေးရုံတွေမှာ မွေးတဲ့ သူတွေအဖို့တော့ အစပိုင်းရက်တွေမှာ သက်ဆိုင်ရာ ဆရာမတွေက သင်ပေးတတ်ကြတယ်။ ဆေးရုံကပြန်ဆင်းပြီးတဲ့ အခါတွေရယ် ကိုယ့်အိမ်မှာ မွေးတဲ့သူတွေရယ် မှာ အခက်အခဲ နည်းနည်းပါးပါးကြုံရတတ်ကြတယ်။

မွေးပြီးစကနေ ကလေးအသက် ၆ လ ပြည့်တဲ့ အထိ မိခင်နို့တစ်မျိုးတည်းကို သေသေချာချာ ဂရုတစိုက်တိုက်ပေးဖို့လိုပါတယ်။ ဘာလို့လဲ နို့ဗူးတိုက်တော့   ရော မရဘူးလား။ ရေရော နည်းနည်းပါးပါးတိုက်တာပဲ မရဘူးလား ဆိုပြီး မေးစရာရှိပါတယ်။ မတိုက်ရပါဘူး။ မွေးစကလေးတွေရဲ့ ကိုယ်တွင်းအင်္ဂါတွေက အခုမှ စပြီးအလုပ်လုပ်တာပါ။ အဲလိုအခါမှာ အမေနို့ အပြင် တခြားအစားတွေက အူတွေရဲ့ လှုပ်ရှားမှုကို ပင်ပန်းစေပါတယ်။ ကိုယ်ဝန်တောက်လျှောက်မှာလည်း ဒီအမေရဲ့ ကိုယ်ထဲမှာ နေထားပြီး မွေးစမှာလည်း အမေနို့ပဲတိုက်ခြင်းက ဓာတ်မတည့်တာတွေကို နည်းစေပါတယ်။ အမေနို့မှာ     အာဟာရဓာတ်အပြည့်အဝပါပါတယ်။ ရေဓာတ်လည်းပါပါတယ်။ အပြင်ကနေရေထပ်တိုက်ဖို့မလိုပါဘူး။

တချို့သော ကလေးတွေ မွေးတဲ့ အခါ အကြောင်းအမျိုးမျိုးကြောင့် အမေနို့မစို့ရတတ်ဘူး။ အဲ့ဒီ့အခါတော့ မဖြစ်မနေ နို့ဗူးကူရပါတယ်။ နို့ဗူးကူရတဲ့အခါမှာ လည်း နို့မှုန့်ဖျော်တဲ့အခါ ထင်သလိုဖျော်တိုက်လို့မရပါဘူး။ ပျစ်လွန်းတဲ့အခါတွေမှာ ကလေးတွေရဲ့ အူတွေက အရမ်းအလုပ်လုပ်ရပါတယ်။ မလိုလား တဲ့     ပြဿနာတွေ အူခေါက်တာတွေ ဖြစ်လာစေတတ်တယ်။ နို့မှုန့်တိုက်တဲ့အခါမှာ ပေးထားတဲ့ formula အတိုင်းဖျော်ရပါတယ်။ ဆားနည်းနည်းသကြားနည်း နည်းလည်း ထည့်လို့မရပါဘူး ။

တကယ်တမ်းကတော့ ကိုယ်ဝန်ဆောင်စဉ်အခါတည်းက ကိုယ်ဝန်ဆောင် မိခင်လောင်းတွေက မိမိတို့ရဲ့ နို့သီးခေါင်းကို အထဲကို ဝင်နေတာမရှိအောင် ဆွဲထုတ်ထုတ်ပေးရမယ်။ ရေချိုးတဲ့ အခါ သေချာဆေးကြောပြီး နို့သီးခေါင်းကိုညှစ်ညှစ်ကြည့်ပေးရမယ်။ နို့သီးခေါင်းကို ညှစ်ကြည်လို့ပြောတဲ့အခါ ရင်သားတစ်ခုလုံးအုံလိုက်ကြီး ညှစ်စရာမလိုပါဘူး။ နို့သီးခေါင်း ပတ်လည်မှာရှိတဲ့ areola လို့ခေါ်တဲ့အမဲဝိုင်းကို ညှစ်ပေးရင် ရပါတယ်။

အမေနို့ကစတိုက်တိုက်ချင်းမှာသိပ်မထွက်တတ်ဘူး။ ဒါပေမယ့် ဆက်တိုက်နေရပါမယ်။ မထွက်လို့ နို့ဗူး ပြောင်းတိုက်မယ်ဆိုပြီး လုပ်လို့မရပါဘူး။ အမေနိူ့က များများတိုက်မှများများညှစ်ပေးမှ များများထွက်မှာပါ။ နို့တိုက်တဲ့အခါ တစ်ခါတိုက်တိုင်းနှစ်ဖက်လုံးမျှနေအောင်တိုက်ပါ။ တချို့တွေကျတော့ ဒီတစ်ကြိမ်ဒီဘက်ရင်သားကတိုက်ပြီး နောက်တစ်ကြိမ် နောက်ရင်သားတစ်ဖက်က တိုက်ပါတယ်။ ဒါလည်းလက်ခံပါတယ်။ တစ်လှည့်စီတော့ ပြောင်းတိုက်ပေးရမှာပါ။ ဒါမှ နို့လည်းမခဲတော့ဘူး။ ရင်သားမှာလည်း အလုံးအကျိတ် မဖြစ်တော့ဘူး။ ကလေးငယ်တွေအတွက်လည်း တစ်ဖက်တည်းသာ တောက်လျောက်နို့စို့နေရရင် ခေါင်း တစ်ခြမ်းစောင်းတာတွေ အကြောကပ်တာတွေ ဖြစ်စေတတ်ပါတယ်။ ဒါကြောင့်နို့တိုက်တဲ့ အခါ ရင်သားနှစ်ဖက်လုံးမျှတိုက်ပါ။

နို့တစ်ခါတိုက်ရင် ဘယ်လောက်ကြာရမလဲတော့ပုံသေမရှိပါဘူး။ နို့တင်းနေတာကနေ ပျောကျ့သွားတဲ့အထိတိုက်ရပါတယ်။ နို့အစို့သန်တဲ့ကလေးတွေဆို နာရီဝက်လောက်တိုက်ရုံနဲ့ နို့က ပျော့ကျသွားနိုင်ပါတယ်။ တချို့တော့ တစ်နာရီလောက်ကြာတတ်တယ်။ နို့တိုက်ပြီးတဲ့ အခါ ကလေး ကို ခေါင်းဘက်ပိုင်းကိုနည်းနည်း ပိုမြှင့်ပြီး ချီပေးဖို့တော့လိုပါတယ်။

နို့တိုက်တဲ့ အခါ ပုံစံအနေအထားမှန်ဖို့လိုပါတယ်။ ပုံစံမမှန်တဲ့ အခါ နို့တစ်ခါတစ်ခါတိုက်တဲ့ နာရီဝက် တစ်နာရီ အချိန်ကို မခံနိုင်ပါဘူး။ ကြာလာတာနဲ့ အမျှ ခါးတွေနာလာတတ်ပါတယ်။ နို့တိုက်မိခင်ကထိုင်နေတဲ့အခါ မတ်မတ်နေပါ။ကလေးကို ပွေ့ချီတဲ့အခါ ခေါင်းဘက်ပိုင်းကိုပိုမြှင့်ထားပါ။ ကလေးကို တံတောင်ဆစ်နဲ့ လက်ဖျံနေရာမှာ အလိုက်သင့် ထိန်းပေးထားပါ။ကလေးမျက်နှာက နို့တိုက်မိခင်ဘက်ကိုအနည်းငယ်စောင်းထားပါ။ ကလေးရဲ့ ပါးစပ်က နို့တိုက်မိခင်ရဲ့ နို့သီးခေါင်းရော ဘေးပတ်လည်းကအမဲဝိုင်း areola ရော ကို ငုံထားမိပါစေ။ နောက်လက်တစ်ဖက်က ကလေးခေါင်းကို လက်ဖဝါးနဲ့ ထိန်းပေးထားပါ။ ဒီလိုပုံစံဆို ကလေးလည်းသက်တောင့်သက်သာဖြစ်ပါတယ်။ နို့တိုက်မိခင်လည်း သက်တောင့်သက်သာဖြစ်ပါတယ်။ နို့တိုက်တဲ့ အခါ ကလေးကို ပေါင်ပေါ် တင်ထားပြီ ရှေ့ကိုကုန်းပြီးမတိုက်ပါနဲ့။ ကလေးအတွက်လည်း မကောင်းသလို နို့တိုက်မိခင်အတွက်လည်း မကောင်းပါဘူး။ ကြာကြာမတိုက်နိုင်တော့ဘူး။

ကလေးနို့တိုက်ပြီးတဲ့အခါ လေထုတ်ပေးဖို့လိုတတ်ပါတယ်။ ကလေးငယ်လေးတွေတော့ ခေါင်းကိုအသာလေးမြှင့်ပြီးချီထားတာမျိုးဖြစ်ဖြစ် လက်ပေါ်မှာ မှောက်ရက်အနေအထားဖြစ်ဖြစ် ထားပြီး ကျောကို အသာလေးပွတ်ပေးပါ။ ကလေးခေါင်းခိုင်လာတဲ့အခုမှာတော့ နို့တိုက်ပြီးတဲ့ အခါ ခေါင်းကိုထိန်းပြီး ထောင်ချီ  ပြီး လမ်းလျှောက်ပေးပါ လေတက်သွားအောင်ပါ။

လေမတက်တဲ့ အခါ လေမထုတ်ပေးဖြစ်တဲ့ အခါ ကလေးတွေက လေထိုးလေအောင့်ခံစားရတတ်တယ်။ ကလေးတွေ နို့စို့နေတဲ့ အခါမှာ လေလည်းအ     နည်းနဲ့အများတော့ဝင်သွားတာကြောင့်ပါ။ လေတွေများတဲ့ အခါ ဗိုက်တွေတင်းလာမယ်။ နို့ပြန်အန်မယ် ကလေးအီနေတတ်ပါတယ်။ မွေးစကလေးတွေကို နှစ်နာရီ ခြားတော့ နို့တိုက်ပေးရပါတယ်။ အိပ်နေလည်း နှိုးတိုက်ပေးပါ။ နို့တိုက်မိခင်ကတော့ပင်ပန်းပါလိမ့်မယ်။ ကလေးအိပ်တုန်းလိုက်အိပ်ပါ နားပါ။ ကလေးတွေက မွေးစလေးတွေမှာနို့တိုက်ပြီးပြန် အိပ်ပျော်တတ်ကြတယ် ။နို့သေချာမဝင်တဲ့အခါလည်း ဖြစ်တတ်တယ်။ သူ့ကိုနှိုးနှိုးပြီးနို့ပျော့တဲ့အထိတိုက်ပါ       ဖြေးဖြေးချင်းတိုက်ပါ။ လပိုင်းအရွယ်လောက်ရောက်တဲ့အခါတော့ သုံးနာရီခြားလောက်လည်း တိုက်လို့ရပါတယ်။

ကလေးတွေနို့တိုက်ပါများတော့ လျှာတွေမှာ အဖြူတွေဖြစ်တတ်တယ်။ လျှာကြီးထူနေသလိုဖြစ်တတ်တယ်။ သန့်ရှင်းတဲ့ gauze စ လေးကို ရေကျက်အေး  စိမ်ပြီး ဖြေးဖြေးပွတ်ပေးလို့ရပါတယ်။ကလေးနိုတိုက်နေတဲ့ မိခင်က တစ်နေ့ကို ရေအနည်းဆုံးလေးဗူသောက်ရပါမယ်။ အစားအကုန်စားရပါမယ်။ အပူအ  စပ်ကလွဲလို့ တခြားရှောင်စရာမလိုပါဘူး။ ဒါမှ နို့ထွက်အားကောင်းပါမယ်။ ကိုယ်ဝန်ဆောင်အားဆေးဖြစ်ဖြစ် တခြားအားဆေးဖြစ်ဖြစ် ဆက်သောက်နေရပါမယ်။ နို့မတိုက်ခင်မှာလည်း ရင်သားနှစ်ဘက်လုံးကို ရေနဲ့သေချာဆေးကြောပေးဖို့ လိုပါတယ်။
အရေးကြီးဆုံးကတော့ အမေနို့တစ်မျိုးတည်းကိုသာ ကလေးအသက် ၆လ အထိသေချာတိုက်ကျွေးပေးကြဖို့ဖြစ်ပါတယ်။

Author: Dr. CST