မိခင်လောင်းများအနေဖြင့် မိမိလွယ်ထားသော ကိုယ်ဝန်အတွက် သားသားလား မီးမီးလား သိချင်သူများရှိသကဲ့သို့၊ ကလေးလေး ကိုယ်အင်္ဂါစုံရဲ့လား? ဘယ်အချိန် နှလုံးခုန်မလဲကအစ ရင်ခုန်စိတ်လူပ်ရှားမူအပြည့်ဖြင့် သိချင်ဇောများကြပါတယ်။
ကိုယ်ဝန်ဆောင်ရက်စတွက်ရာမှာ အမျိုးသမီးရဲ့ နောက်ဆုံးရာသီလာတဲ့ ပထမဦးဆုံးရက်က စတင်တွက်ချက်ပါတယ်။ ကိုယ်ဝန်ပတ် ၄၀ ခန့်လွယ်ထားရပါတယ်။ ကိုယ်ဝန်လွယ်ထားရတဲ့ကာလကို ၃ ပိုင်းပိုင်းပြီး အမည်တပ်သတ်မှတ်လေ့ ရှိပါတယ်။ ပထမ၊ ဒုတိယနဲ့ တတိယပိုင်းဆိုပြီး တစ်ပိုင်းလျှင် ၃ လစီ သတ်မှတ်ထားပါတယ်။ မိခင်တွေ အလွယ်တကူနားလည်စေရန် လအပိုင်းအခြားလိုက် တလအတွင်းကြီးထွားမှုကို ဗဟုသုတအဖြစ်မှတ်သားရန် ရေးသားပေးလိုက်ပါတယ်။
(1) ပထမလ
မမျိုးဥနဲ့ သုက်ပိုးတွေ့ရှိကာ သန္ဓေအောင်မြင်ပြီးနောက် သန္ဓေသားလောင်းဟာ ရေမြှုပ်ကဲ့သို့ကာရံထားတဲ့ အိတ်အတွင်းစတင်ကြီးထွားစဉ် ကာလဖြစ်ပါတယ်။ မိခင်နဲ့ဆက်သွယ်ရန် အချင်းဖြစ်ပေါပြီး မျက်နှာနှင့် နှလုံးအဖြစ်ကြီးထွားရန် ကနဦးအစပိုင်းကာလလည်းဖြစ်ပါတယ်။ ပထမတစ်လပြီးနောက် သန္ဓေသားလောင်းဟာ တစ်လက်မရဲ့ ၄ ပုံ ၁ ပုံခန့် ရှည်လျားနေပါတယ်။
(2) ဒုတိယလ
ကိုယ်ဝန် ၂ လအချိန်မှာ ကလေးမျက်နှာအသွင်အပြင်ဖွံဖြိုးလာပြီး ခြေချောင်း၊ လက်ချောင်း၊ မျက်စိစတင်ကြီးထွားရန် အစပျိုးတဲ့ကာလပင် ဖြစ်ပါတယ်။ ဦးနှောက်နဲ့ အစာအိမ်လမ်းကြောင်း၊ အရိုးစတာတွေလည်း အစပျိုးကြီးထွားချိန် ဖြစ်ပါတယ်။ ကိုယ်ဝန် ၂ လမှာ သန္ဓေသားလောင်းဟာ ၁ လက်မခန့်နဲ့ ၁/၃၀ အောင်စခန့်ရှိနေပါပြီ။
(3) တတိယလ
ကိုယ်ဝန်ဆောင် ၃ လချိန်မှာ ကလေးဟာ ခြေလက်တွေ ပီပီပြင်ပြင်ကြီးထွားလာပါပြီ။ ကျား/ မခွဲခြားရန်မလွယ်ကူပေမဲ့ မျိုးပွားအင်္ဂါ စတင်ကြီးထွားချိန် ဖြစ်ပါတယ်။ ၃ လပြည့်တာနဲ့ ကလေးလေးဟာ အင်္ဂါစုံလင်ပြီး သွေးလည်ပတ်စတင်ကာ ဆီးလမ်းကြောင်း စတင်အလုပ်လုပ်ပြီး အသည်းမှလည်း သည်းခြေအရည်စတင်ထုတ်ချိန် ဖြစ်ပါတယ်။ ကလေးဟာ ၄ လက်မအရှည်ရှိပြီး တစ်အောင်စ အလေးချိန်သို့ ကြီးထွားလာပါပြီ။
(4) စတုတ္ထလ
၄လမှာ သင့်ကလေးနှလုံးခုန်သံကို နားထောင်တဲ့ကိရိယာဖြင့် ကြားနေရပါပြီ။ မျက်နှာအနေအထားပြည့်စုံပြီး ခြေလက်လှုပ်ရှားမှု စတင်နေချိန်ဖြစ်ပါတယ်။ အာရုံကြောများ ကောင်းစွာအလုပ်လုပ်ပြီး ကျား/မခွဲခြား၍ ရနိုင်ချိန်လည်းဖြစ်ပါတယ်။ ကလေးဟာ ၆ လက်မရှည်ပြီး ၄ အောင်စအလေးချိန်ရောက်နေပါပြီ။
(5) ပဉ္စမလ
ကိုယ်ဝန်ဆောင်ချိန် ၅ လဟာ ကလေးလေးစတင်လှုပ်ရှားခြင်းကို မိခင်မှခံစားသိနိုင်ချိန် ဖြစ်ပါတယ်။ ဆံပင်မှအစအရေပြားစတဲ့ အသေးစိတ် အင်္ဂါများဖွံ့ဖြိုးလာပါတယ်။ အရပ်မှာ ၁၀ လက်မရှည်ပြီး တစ်ပေါင်မှ တစ်ပေါင်ခွဲခန့် အလေးချိန်ရှိလာပါပြီ။
(6) ဆဌမလ
ကိုယ်ဝန် ၆ လမှာ ကလေးလေးဟာ အသားအရေအရောင်နဲ့ ခြေရာလက်ရာထင်ရှားလာပြီး မျက်လုံးပွင့်လာပါပြီ။ အသံကို တုံပြန့်နိုင်စွမ်းရှိလာပါပြီ။ ကိုယ်ဝန် ၆ လမှာ ၁၂ လက်မရှည်ပြီး၂ ပေါင်အလေးချိန်ထိ ကြီးထွားလာပါပြီ။
(7) သတ္တမလ
ကိုယ်ဝန်ဆောင် ၇ လမှာ ကလေးဟာ ကောင်းစွာကြီးထွားပြီး တုံ့ပြန်မှုအား ကောင်းလာပါတယ်။ လစေ့တဲ့ ကလေးအဖြစ်သို့ ရောက်ရှိကာ ၁၄ လက်မအရှည်ရှိပြီး ၄ ပေါင်ထိ ဖွံဖြိုးလာပါပြီ။
(8) အဌမလ
ကိုယ်ဝန်ဆောင်ကာလ ၈ လမြောက်မှာ ကလေးဟာ လှုပ်ရှားမှုအားကောင်းကာ ဦးနှောက်ကောင်းစွာ အလုပ်လုပ်နေပါပြီ။ အဆုတ်မှာမူ ဖွံဖြိုးဆဲအခြေအနေသာ ရှိပါသေးတယ်။ ၁၈ လက်မနဲ့ ၅ ပေါင်ခန့်သို့ ကြီးထွားလာပါပြီ။
(9) နဝမလ
ကိုယ်ဝန်ဆောင်ကာလ ၉ လမှာ အဆုတ်ကောင်းစွာဖွံ့ဖြိုးပြီး မွေးဖွားရန် အသင့်အနေအထားအဖြစ် မွေးလမ်းကြောင်းသို့ ရောက်ရှိနေပါပြီ။ မိခင်တင်ပါးဆုံကွင်းအတွင်း ကလေးခေါင်းရောက်ရှိနေပါပြီ။ ကလေးဟာ ၂၀ လက်မခန့်နဲ့ ၇ ပေါင်အလေးချိန် ရှိနေပါပြီ။
Author: Dr. Pyae Shin
