ကလေး ၆ လ မပြည့်ခင် ထမင်းစောစောကျွေးမိရင်

ကလေး ၆ လ မပြည့်ခင် ထမင်းစောစောကျွေးမိရင်

မိမိကလေးများကို အသက် ၆ လမှ ထမင်းကျွေးရန်ဟု ဆရာဝန် ဆရာမများက မည်ကဲ့သို့သတိပေးတားဖြစ်ထားသော်လည်း ရှေးရိုးစွဲလူကြီးမိဘများနှင့် နေထိုင်သူများအဖို့ လိုက်နာရန် ခက်ခဲတတ်ကြပါတယ်။

အချို့မိဘများသည် မိမိမွေးဖွားလာသော ကလေးငယ်များ လစေ့ပေါင်ပြည့်သည်ကို တင်းတိမ်ရောင့်ရဲခြင်းမရှိဘဲ ထမင်းကျွေးမှသာ ကလေးငယ် ဝကစ်ကစ်ဖြစ်လာမည်ဟုဆိုကာ ထမင်းကျွေးရန် စိတ်စောနေကြပါတယ်။ မိခင်နို့တိုက်နေသည်ကို မိခင်နို့ကြောင့်ကလေးပိန်လှီနေပြီး ထမင်းကျွေးမှသာ အစာဝလင်သည်ဟု ထင်နေကြပါတယ်။ အချို့မိခင်များသည် ကလေးငယ် ၇ ရက်သားအရွယ်ပင် ဆိုသော်ငြားလည်း ထမင်းကို ပျားရည်နှင့် ကျွေးတတ်ကြပါတယ်။

ကလေးငယ်များ အသက် ၆ လမပြည့်မချင်း မိခင်နို့တိုက်ကျွေးရန်နှင့် မိခင်နို့မထွက်ပါက အသက် ၆ လအရွယ်နို့မူန့်ကိုသာ ရွေးချယ်တိုက်ကျွေးသင့်ပါတယ်။ ထိုအခါမျိုးတွင် မိခင်သည် နို့တိုက်ကျွေးစဉ်ကာလတလျောက် အာဟာရစုံလင်စွာရရှိရန် ဗီတာမင်ပြည့်ဝစေသော အစာအစားများ ရွေးချယ်စားသုံးရန် လိုအပ်ပါတယ်။

ကလေးအသက် ၆ လမတိုင်ခင် ထမင်းစောကျွေသောကြောင့် ဖြစ်နိုင်သောဆိုးကျိုးများ

အစာအမာစောကျွေးခြင်းကြောင့် ကလေးတွင် အာဟာရဆိုင်ရာပြဿနာများ၊ စိတ်ပိုင်ဆိုင်ရာပြဿနာများနှင့် ရုပ်ပိုင်းဆိုင်ရာပြဿနာစသည်တို့ကိုကြုံတွေ့ရနိုင်ပါတယ်။

– အာဟာရချို့တဲ့ခြင်း

မိခင်နို့တိုက်ကျွေးခြင်းကို အသက် ၆ လမတိုင်ခင် ရပ်ခြင်းသည် အာဟာရချို့တဲ့ခြင်းဖြစ်စေသည်။ မိခင်နို့သည်သာ ကလေးငယ်အတွက် အကောင်းဆုံးအာဟာရပင် ဖြစ်ပါတယ်။ အသက် ၆ လ အောက်ကလေးငယ်အတွက် ကြီးထွားကျန်းမာရန် လိုအပ်သော အာဟာရအားလုံးပါဝင်ပါတယ်။

မိခင်နို့မတိုက်ကျွေးနိုင်သေ ာကလေးငယ်များအတွက် မိခင်နို့နီးပါးထုတ်ထားသော နို့မူန့်ကိုတိုက်ပါ။ ကလေးငယ်ကို အစာစောကျွေးလျှင် အာဟာရရှိသော အစာများကိုသာ ရွေးချယ်ကျွေးသည်ဆိုသော်ငြားလည်း ကလေးငယ်ရဲ့ အစာအိမ်သည် သေးငယ်၍ မိခင်နို့နှင့်ယှဉ်လျှင် လုံလောက်စွာ ရရှိရန် ခက်ပါတယ်။

– အဝလွန်ခြင်း

ကလေးများကို အစာမာစောကျွေးခြင်းသည် ကလေးငယ်အဝလွန်ရောဂါ ရရှိစေနိုင်ပါတယ်။ သုတေသနပြုချက်အရ အစာစောကျွေးသော ကလေးငယ်သည် မကျွေးသောကလေးငယ်ထက် အသက် ၃ နှစ်အရွယ်တွင် အဝလွန်ခြင်းဖြစ်ရန် ခြောက်ဆပိုများပါတယ်။

– မိခင်နှင့် ကလေးစိတ်ပိုင်းဆိုင်ရာ နွေးထွေးမှုလျော့ခြင်း

မိခင်နို့သည်သာ အကောင်းဆုံးဟုဆိုရာတွင် အာဟာရသည်သာမက မိခင်နှင့် ကလေးကြား နို့တိုက်ခြင်းကြောင့် နွေးထွေးသောချစ်ခြင်းကိုလည်း ဖြစ်စေပါတယ်။ အစာကျွေးစောခြင်းကြောင့် နို့တိုက်ခြင်းကို လျော့စေကာ မိခင်နှင့် စိတ်ပိုင်ဆိုင်ရာနွေးထွေးမှု လျော့စေပါတယ်။

– အစာနင်ခြင်းနှင့် သီးခြင်း

ကလေးငယ်သည် ထိုင်နိုင်၊ ဝါးနိုင်၊ မျိုချနိုင်သောအရွယ် အသက် ၆ လအရွယ်မတိုင်ခင် ကျွေးပါက ကလေးငယ်ရဲ့ ပါးစပ်နှင့် မေရိုးသည် ကောင်းစွာ မဖွံဖြိုးသေးပါ။ မျိုချရန်ခက်ခဲခြင်းကြောင့် အစာနင်ခြင်းနှင့် အစာသီးခြင်း၊ အဆုတ်ထဲရောက်ခြင်းစသည်တို့ကို ဖြစ်စေကာ အသက်အန္တရာယ် ထိခိုက်စေနိုင်ပါတယ်။

– ကိုယ်ခံအားနည်းခြင်းနှင့် ပိုးကူးစက်ခြင်း

ကလေးငယ်များရဲ့ ကိုယ်ခံအားသည် အလွန်နည်းနေသောကြောင့် အစာစောကျွေးလျှင် ပိုးကူးစက်ရန် လွယ်ကူပါတယ်။

အစာတွင် မသန့်ရှင်းသောကြောင့် မမြင်နိုင်သော ပိုးမွှားများပါလာကာ ကူးစက်ရောဂါများ ပိုမိုဖြစ်လွယ်ပါတယ်။ ရောဂါများတိုက်ထုတ်နိုင်သော ဓာတ်များမပေါ်သေးသောကြောင့်
ပြင်းထန်သော ကူးစက်ရောဂါအဆင့်သို့ အမြန်ရောက်လွယ်ပါတယ်။ မိခင်နို့သည် ပိုးမွှားမပါရှိခြင်းနှင့် ရောဂါတိုက်ထုတ်နိုင်သော ဓာတ်များပါရှိခြင်းသည် အလွန်တန်ဖိုးရှိလှပါတယ်။

– ဓာတ်မတည့်ခြင်း

မိခင်နို့တိုက်ကျွေးခြင်းသည် ကလေးငယ်ဓာတ်မတည့်မှုကို ကာကွယ်ပြီး အစာစောကျွေးခြင်းကြောင့် ကလေးငယ်သည် ဓာတ်မတည့်မှုဆိုင်ရာပြဿနာများ ရင်ဆိုင်ရနိုင်ပါတယ်။

– အစာအိမ်လမ်းကြောင်း ရောဂါများ ရရှိခြင်း

ကလေးငယ်ရဲ့ တံထွေးတွင် ကာဗွန်ဟိုက်ဒရိတ်ကို ချေဖျက်နိုင်သော ပစ္စည်းများမပါဝင်ခြင်းကြောင့် အသက် ၆ လမတိုင်ခင်ကျွေးပါက အစာကောင်းစွာမခြေဖျက်နိုင်ဘဲ အစာမကြေခြင်းနှင့် အခြားသော အစာအိမ်နှင့် အူလမ်းကြောင်းပြဿနာများ ဖြစ်လာနိုင်ပါတယ်။ အာဟာရစုပ်ယူမှုအားနည်းခြင်း၊ အူလှုပ်ရှားမှုနှေးခြင်းကြောင့် အန်ခြင်းနှင့် အူပိတ်ခြင်းစသည်တို့ကို ခံစားရနိုင်ပါတယ်။

– ကျောက်ကပ်

အသက် ၆ လမပြည့်သေ ာကလေးငယ်များတွင် အစာတွင်ပါလာနိုင်သော ဆိုဒီယမ်ဓာတ်ကို စုပ်ယူမူမပြုနိုင်သောကြောင့် ကျောက်ကပ်နှင့်ဆိုင်သော ရောဂါဖြစ်ပွားနိုင်ပါတယ်။
ထို့ကြောင့်အသက် ၆ လမတိုင်ခင် အစာမာစောကျွေးခြင်းသည် ကလေးငယ်အတွက် ကောင်းကျိုးထက် ဆိုးကျိုးများသာ ဖြစ်စေနိုင်ပြီး ကလေးငယ်ကျန်းမာရေးအတွက် အထူးအရေးကြီးတာမို့ သိရှိထားရန်လိုအပ်ပါတယ်။

Dr. ပြည့်ရှင်း