ကာကွယ်ဆေးထိုးပြီးရင် ကလေးဖျားမှာလား။ဆေးနဲ့တည့်ပါ့မလား။
အမေအများစုအနေနဲ့ မိမိကလေးကာကွယ်ဆေးထိုးရတော့မယ်ဆိုရင် ဆေးထိုးပြီးရင်ဖျားမှာလား ဆေးနဲ့တည့်မှတည့်ပါမလားဆိုတာတွေကို စဉ်းစားလေ့ရှိကြပါတယ်။တချို့မိဘတွေဆိုရင် မိမိကလေးဆေးထိုးပြီးရင်ဖျားမှာ ဆေးနဲ့မတည့်မှာ စသဖြင့် အစိုးရိမ်လွန် အကြောက်လွန်ပြီး အိမ်တိုင်ရာရောက် သို့မဟုတ် ရပ်ကွက်ထဲစီမံချက်နဲ့ ကာကွယ်ဆေးလာထိုးတဲ့အခါမှာ ရှောင်နေလေ့ရှိတတ်ပါတယ်။ဒီလိုလုပ်တာဟာ မှားပါတယ်။ကာကွယ်ဆေးတွေဆိုတာ အဖြစ်များတဲ့ရောဂါတွေ၊ဖြစ်လာရင်လည်းကုသဖို့ခက်ပြီး အသက်အန္တရာယ်ထိခိုက်တတ်၊နောက်ဆက်တွဲဆိုးကျိုးများတတ်တဲ့ရောဂါတွေကို မဖြစ်အောင်ကာကွယ်ပေးတဲ့ဆေးတွေပါ။ကျန်းမာရေးဝန်ကြီးဌာနကထုတ်ပြန်ထားတဲ့အတိုင်း ကာကွယ်ဆေးတွေကို သူ့အချိန်နဲ့သူထိုးဖို့လိုပါတယ်။တချို့ကာကွယ်ဆေးတွေကတကြိမ်နဲ့ပြီးပေမယ့် တချို့ဆေးတွေက နှစ်ကြိမ် သုံးကြိမ်ထိုးရတာမျိုးလည်းရှိပါတယ်။ဆေးအများစုကထိုးဆေးတွေဖြစ်ပြီး ပိုလီယိုကာကွယ်ဆေးကတော့ အစက်ချဆေးအနေနဲ့ရော ထိုးဆေးအနေနဲ့ရောရှိပါတယ်။ကာကွယ်ဆေးထိုးပြီးတဲ့အခါ ကာကွယ်ဆေးက ကိုယ်ခံအားစနစ်ကို သွားပြီး လှုံ့ဆော်သောကြောင့် ကိုယ်ခံအားစနစ်ကတန်ပြန်တုံ့ပြန်တဲ့အခါ ကိုယ်အပူချိန်တက်ပြီး ဖျားတာ နုံးတာ မှိန်းတာ ဖြစ်နိုင်ပါတယ်။ကာကွယ်ဆေးထိုးတဲ့နေရာမှာလည်း အနည်းငယ်နီရဲနေတာမျိုးဖြစ်နိုင်ပါတယ်။ကာကွယ်ဆေးထိုးပြီးနောက် ကလေးက ဖျားတာ၊မှိန်းတာဖြစ်လို့ရှိရင်ကလေးကို ပုံမှန်ကျွေးနေကျအတိုင်းဆက်ကျွေးတာအပြင် အရည်များများလည်းတိုက်ဖို့လိုပါတယ်။အရည်ဆိုတာ ရေတမျိုးတည်းကိုပဲဆိုလိုတာမဟုတ်ပါဘူး။စွပ်ပြုတ်ရည် ဆန်ပြုတ်ကျဲကျဲ နို့ အိုဗာတင်းတို့လို အာဟာရဖြစ်မယ့်အရည်တွေ များများတိုက်သင့်ပါတယ်။ ခြောက်လအောက်ကလေးဆိုရင်တော့ မိခင်နို့များများတိုက်ပေးပါ။ဘာလို့လဲဆိုတော့ ဖျားနေတဲ့အချိန်မှာ ချွေးထွက်မယ် နောက်ပီး ကလေးကအသက်ရှုမြန်နေတဲ့အခါ ခန္ဒာကိုယ်ထဲမှာရှိတဲ့ အရည်ဓါတ်တွေဟာ ပိုပြီးဆုံးရှုံးတဲ့အတွက် အရည်ခန်းခြောက်တဲ့ပြသာနာ ပိုဖြစ်နိုင်လို့ပါ။
ဒုတိယအချက်အနေနဲ့ကတော့ ကလေးတွေဖျားတဲ့အခါမှာ ရာသီဥတုနဲ့သင့်တော်မယ့်အဝတ်အစားများကိုပဲဝတ်ဆင်ပေးပါ။ရာသီဥတုကအေးလို့ သို့မဟုတ် လေတွေတအားတိုက်လို့ ဖျားတဲ့ကလေးကိုအနွေးထည်ဝတ်ပေးတာမျိုးကရပါတယ်။သို့သော် ရာသီဥတုကပူအိုက်တဲ့အခါမျိုးမှာဆိုရင်တော့ ဖျားတဲ့ကလေးကို အဝတ်ထူတွေဝတ်ပေးတာ၊စောင်အထပ်ထပ်ခြုံပေးတာ၊ကလေးငယ်လေးတွေဆိုရင် အဝတ်ထူထူဖြင့်ထုတ်ထားတာမျိုးတွေကိုမလုပ်ပါနဲ့။ကလေးက အဖျားကြီးတဲ့အခါ (အဖျားက ၁၀၂ ဒီဂရီဖာရင်ဟိုက်ထက်ပိုတဲ့အခါ)ရေပတ်တိုက်ပေးပါ (သို့မဟုတ်) ရေချိုးခန်းထဲမှာ ရေခပ်သွက်သွက်ချိုးပေးပါ။ရေခဲတုံးလေးများကို ပလတ်စတစ်အိတ်တွင်ထည့်ပြီး နဖူး၊လည်ပင်း၊ဂျိုင်း၊ပေါင်ခြံစသည့် သွေးကြောကြီးများရှိသောနေရာများမှာလည်း ကပ်ပေးနိုင်ပါတယ်။ပါရာစီတမော ကို အသက်အရွယ်အလိုက်သင့်တော်သော ဆေးအချိန်အဆ အကြိမ်ရေအတိုင်း ပါးစပ်မှတိုက်တာ သို့မဟုတ် စအိုမှ (အရပ်အခေါ် ဒုံးကျည်,ဂြိုလ်တု)ထည့်တာ လုပ်နိုင်ပါတယ်။သို့သော် Antibiotics ခေါ် ပိုးသေဆေး၊ပဋိဇီဝဆေးများကိုတော့ ဆရာဝန်နဲ့ပြသထားခြင်းမရှိဘဲ မိမိသဘောနဲ့ မတိုက်ကျွေးရပါ။ဒီလိုအိမ်မှာ ပြုစုနေရင်းနဲ့ ကလေးကအဖျားအပူချိန်ကျမသွားဘဲ ပိုပိုမြင့်တက်လာတာအဖျားက နှစ်ရက်၊သုံးရက် ကြာသော်လည်းမပျောက်တာသို့မဟုတ်အစာလုံးဝမ၀င်တာကလေးက လန်းဆန်းမှုမရှိဘဲ တအားမှိန်းလွန်းတာ၊အီနေတာအန်တာ၊ဗိုက်နာတာ၊အသက်ရှုကျပ်တာ စသဖြင့် ဖြစ်လာရင်တော့ နီးစပ်ရာဆေးရုံ၊ဆေးခန်း အမြန်ပြဖို့လိုပါတယ်။အများအားဖြင့်တော့ ကာကွယ်ဆေးထိုးပြီးဖျားတာမှိန်းတာက စိုးရိမ်ရတဲ့အခြေအနေကိုမရောက်တတ်ဘဲ ကာကွယ်ဆေးထိုးပြီး နှစ်ရက်လောက်ဆို သက်သာပျောက်ကင်းသွားတတ်ပါတယ်။နောက်တချက်အနေနဲ့ပြောရရင် ကာကွယ်ဆေးနဲ့မတည့်တာကဖြစ်တော့ဖြစ်နိုင်ပေမယ့် အလွန့်အလွန်ရှားပါတယ်။ဆေးတည့်မတည့်ကလည်း ဒီအတိုင်းသိဖို့မလွယ်ပါဘူး။ဆေးသုံးကြည့်မှပဲသိနိုင်တာပါ။ကာကွယ်ဆေးထိုးပြီး မျက်နှာနဲ့နှုတ်ခမ်းတွေဖောရောင်လာတာ၊အသက်ရှုကြပ်လာတာ၊အနီကွက်အင်ပျဉ်တွေထလာတာတွေရှိရင်တော့ ကာကွယ်ဆေးနဲ့မတည့်တာဖြစ်နိုင်ပြီး ချက်ချင်းနီးစပ်ရာဆေးခန်းဆေးရုံပြဖို့လိုပါတယ်။ကာကွယ်ဆေးထိုးပြီး ဒီလိုတွေဖြစ်ဖူးတဲ့ကလေးတွေဆိုရင် နောက်တကြိမ်ကာကွယ်ဆေးထိုးတဲ့အခါမှာ ဆေးမထိုးခင် ဆေးထိုးပေးမယ့်သူကို ဒီအကြောင်းကို ဖြစ်တုန်းကဆေးမှတ်တမ်းနဲ့တကွ ပြောပြဖို့လိုပါမယ်။
အဆုံးသတ်အနေနဲ့အကြံပေးချင်တာက မိမိကလေးကို ကာကွယ်ဆေးထိုးရင်ဖျားမှာ မတည့်မှာကြောက်ပြီး မထိုးဘဲနေပါက ဖြစ်လာမယ့်ဆိုးကျိုးကကြီးမားပါတယ်။ဆေးထိုးပြီးဖျားတာ၊ဆေးမတည့်တာတွေက ထိုးတဲ့ကလေးတိုင်းမဖြစ်တတ်သလို ဖြစ်လာရင်လည်း အဲ့ဒါတွေက ကုသလို့ရပြီး နောက်ဆက်တွဲဆိုးကျိုးမရှိတတ်ပါ။ဒါပေမယ့် ကာကွယ်ဆေးမထိုးဘဲနေမယ်ဆိုရင် အဖြစ်များပြီး ပြင်းထန်တဲ့ရောဂါပိုးဝင်ရောက်ကူးစက်လွယ်ပြီး ရောဂါနဲ့ရောဂါနောက်ဆက်တွဲဆိုးကျိုးတွေကို ကလေးကခံစားရနိုင်ပါတယ်။ဥပမာအနေနဲ့ဆိုရင် ဆေးမတည့်မှာ ဖျားမှာကြောက်ပြီး ပိုလီယိုကာကွယ်ဆေးမထိုးထားဘူးဆိုရင် ကလေးကပိုလီယိုပိုးဝင်ကာ ပိုလီယိုရောဂါဖြစ်ပြီး တသက်လုံးဒုက္ခိတ ဖြစ်ပွားတာမျိုးဖြစ်နိုင်ပါတယ်။ဒါကြောင့်မိဘများအနေနဲ့ ကာကွယ်ဆေးထိုးလို့ဖျားမှာ၊ဆေးမတည့်မှာကို တအားစိုးရိမ်လွန်ပြီး ကာကွယ်ဆေးမထိုးဘဲနေတာမျိုးမလုပ်ဘဲ မိမိကလေးကို သူ့အသက်အရွယ်သူ ထိုးရမယ့်ကာကွယ်ဆေးတွေအားလုံး ထိုးပေးသင့်ပါကြောင်း အကြံပြုချင်ပါတယ်။
Dr 528
