Vitamin C လို့ဆိုလိုက်ရင် ကောင်းကျိုးတွေအများကြီးပေးနိုင်တဲ့ဗီတာမင်ဆိုတာ လူတိုင်းနီးပါး သိကြပါလိမ့်မယ်။ ဗီတာမင် စီ ရဲ့ အကျိုးပြုပုံတွေဟာလည်း အံ့မခန်းပဲဖြစ်ပါတယ်။ ကိုယ်ခန္ဓာအတွက် အဓိကကျတဲ့ လုပ်ငန်း အတော်များများမှာ ဗီတာမင် စီ ရဲ့ အထောက်အကူပြုမှုတွေပါဝင်ပါတယ်။
ဗီတာမင် စီ(Ascorbic acid) ရဲ့ အရေးပါပုံများ
- ခုခံအားကို မြင့်တက်စေခြင်း
ဗီတာမင်စီဟာ ခုခံအားစနစ်မှာပါဝင်တဲ့ သွေးဖြူဥဆဲလ်တွေ တိုးပွားလာအောင် လုပ်ဆောင်ပေးခြင်းဖြင့် ခုခံအားစနစ်ကို မြှင့်တင်ပေးပြီး ရောဂါပိုးတွေကို ကာကွယ်ပေးပါတယ်။ ဒါကြောင့် အခုလို ရောဂါတွေပေါများနေတဲ့ အချိန်မှာ ဗီတာမင်စီကြွယ်ဝတဲ့ အစားအစာတွေကို များများစားပေးသင့်ပါတယ်။
- ကင်ဆာရောဂါများကို ကာကွယ်ပေးခြင်း
ဗီတာမင် စီဟာ Antioxidant တစ်မျိုးလည်း ဖြစ်တဲ့အတွက် ဆဲလ်တွေ ဓာတ်တိုးပြီး ပျက်စီးခြင်းကို ဟန့်တားနိုင်တဲ့တာကြောင့် ကင်ဆာရောဂါ အချို့ကိုလည်း ကာကွယ်ပေးနိုင်ပါတယ်။
- ကော်လာဂျင်ကို ထုတ်လုပ်ပေးခြင်း
ကော်လာဂျင် ဟာ ပရိုတိန်းဓာတ်တစ်မျိုးဖြစ်ပြီး ခန္ဓာကိုယ်မှ တစ်သျှူးတွေကို ထိန်းသိမ်းပေးပြီး ပျက်စီးသွားတဲ့ တစ်သျှူးတွေကို အသစ်တစ်ဖန်ဖြစ်အောင် ပြန်လည်ပြုပြင်ပေးခြင်းဖြင့် အသားအရည်တင်းရင်းစေခြင်း၊ နုပျိုစေခြင်း စသည်တို့အတွက် အရေးပါ ပါတယ်။ ဗီတာမင်စီ များများစားသုံးပေးခြင်းဖြင့် အရွယ်တင်နုပျိုစေပါတယ်။
- သံဓာတ် စုပ်ယူမှုအားကောင်းစေခြင်း
သွေးအားကောင်းစေတဲ့ သံဓာတ်ဟာ အစားအသောက်တွေကဖြစ်စေ၊ သံဓာတ်အားဖြည့်ဆေးတွေမှ တစ်ဆင့်ဖြစ်စေ ခန္ဓာကိုယ်ထဲ ရောက်ရှိဖို့အတွက် အစာအိမ် အူလမ်းကြောင်းမှ ဗီတာမင် စီ ရဲ့ အကူအညီရှိမှသာ ဖြစ်နိုင်ပါတယ်။ ဒါကြောင့် ဗီတာမင် စီ ကြွယ်ဝတဲ့ အစားအစာတွေ စားသုံးပေးခြင်းဖြင့်လည်း သံဓာတ်အားနည်းခြင်းကို ကာကွယ်ပေးနိုင်ပါတယ်။
- အနာကျက်မြန်စေခြင်း
ဗီတာမင် စီဟာ ကော်လာဂျင် ထုတ်လုပ်မှုကို အားပေးတဲ့အတွက် အနာကျက်ဖို့အတွက် လိုအပ်တဲ့ ကော်လာဂျင်တွေကို ထုတ်လုပ်ပေးခြင်းဖြင့် အနာမြန်မြန်ကျက်စေပါတယ်။
- သွားဖုံးရောဂါများကို ကာကွယ်ပေးခြင်း
ကလေးတွေ အဖြစ်များတဲ့ သွားဖုံးမှာ သွေးယိုတာ၊ ရေစီးကမ်းပြိုလိုက်ခြင်းကဲ့သို့သော သွားဖုံးရောဂါတွေ (Scurvy) ဟာ ဗီတာမင် စီ ချို့တဲ့တာကြောင့် ဖြစ်တတ်ပါတယ်။ ဗီတာမင် စီဟာ ကော်လာဂျင်ထုတ်လုပ်မှုကို အားပေးတာ ကြောင့် သွေးတိတ်တာကို မြန်စေပြီး သွားဖုံးရောဂါနှင့် သွေးအားနည်းခြင်းတွေကို ကာကွယ်ပေးပါတယ်။
ဗီတာမင် စီဟာ လူ့ကိုယ်ခန္ဓာမှ တိုက်ရိုက်ထုတ်လုပ်နိုင်ခြင်းမရှိသောကြောင့် ဗီတာမင် ကြွယ်ဝသော အစားအစာများ စားသုံးပေးခြင်း၊ ဗီတာမင် စီ အားဆေးများ သောက်သုံးပေးခြင်းတို့ မှသာ ဗီတာမင် စီ ကို လုံလုံလောက်လောက် ရရှိမှာဖြစ်ပါတယ်။
ဗီတာမင် စီကြွယ်ဝသော အစားအစာများ
- Citrus fruits တွေဖြစ်တဲ့ အရည်ရွှမ်းသော အသီးအနှံများဖြစ်သည့် လိမ္မော်သီး၊ သံပုရာသီး၊ ရှောက်ချိုသီး၊ ကျွဲကောသီး၊ မာလကာသီး စသည့် အသီးများ။
- အခြားအသီးအနှံတွေဖြစ်တယ့် သင်္ဘောသီး၊ သခွှားမွှေး၊ စတော်ဘယ်ရီသီး၊သရက်သီး၊ ခရမ်းချဉ်သီး စသည့်အသီးများ။
- ပန်းဂေါ်ဖီစိမ်း၊ ဂေါ်ဖီထုပ်၊ ငရုပ်ပွ၊ မုန်လာရွက်၊ ဟင်းနုနယ်ရွက် နှင့် အခြားအစိမ်းရောင် ဟင်းသီးဟင်းရွက်များ။
- အာလူးနှင့် ကန်စွန်းဥများ။
စသည့် အစားအစာတွေမှာ Vitamin C အကြွယ်ဝဆုံးပါဝင်ပါတယ်။
တစ်နေ့ကို လိုအပ်တဲ့ Vitamin C ပမာဏဟာ အမျိုးသားတစ်ယောက်အနေနဲ့ 90 mg ဖြစ်ပြီး အမျိုးသမီး ဆိုရင် 75 mg ရအောင် စားသင့်ပါတယ်။ ကိုယ်ဝန်ဆောင်နှင့် နို့တိုက် မိခင်တွေအတွက်ကတော့ 80-120mg ဖြစ်ပြီး ကလေးတစ်ယောက်အတွက် 15-75mg လိုအပ်ပါတယ်။ (လိမ္မော်သီး တစ်လုံးမှာ Vitamin C 50mg ပါဝင်ပါတယ်။)
ဒါပေမယ့် ဗီတာမင် စီကို လိုတာထက်ပိုပြီး စားသုံးမိရင်လည်း ဆီးကျောက်တည်တာမျိုး ဖြစ်တတ်တာကြောင့် အလွန်အကျွံ မစားသုံးသင့်ဖို့လဲ သတိထားရပါမယ်။
ဗီတာမင် စီ ချို့တဲ့ရင် ဘာတွေခံစားရမလဲ?
- မောပန်း လွယ်ခြင်း၊ နုန်းခြင်း။
- အနာကျက်နှေးနေခြင်း။
- သွေးတိတ်ရန် အချိန်ကြာမြင့်ခြင်း။
- အရေပြားပေါ်တွင် သွေးခြေဥ သကဲ့သို့ အညိုကွက်စွဲခြင်း၊ နှာခေါင်း သွေးလျှံခြင်းနှင့် သွားဖုံးသွေးယိုခြင်း။
- မကြာခဏ ဖျားလွယ်ခြင်း။
စသည်တို့ကို ခံစားရနေပြီဆိုရင် ဗီတာမင် စီ ကိုပိုမိုစားသုံးပေးဖို့ လိုအပ်နေပါပြီ။
သည်လို အရေးကြီးတဲ့ အချက်တွေကြောင့် ဗီတာမင် စီကြွယ်ဝတဲ့ အစားအစာတွေကို နေ့စဉ်ပုံမှန်စားသုံးပေးဖို့ လိုအပ်ပါတယ်။
Author : Dr. Aye Myat
