စိုးရိမ်ပူပန်ခြင်း၊ စိတ်ဖိစီးခြင်းသည် ကမ္ဘာပေါ်တွင် အဖြစ်များဆုံးသော ရောဂါများထဲမှ တစ်ခုအပါအဝင်ဖြစ်ပါသည်။ စိုးရိမ်ပူပန်မှုများကို ပြေပျောက်စေရန်အတွက် စိတ်ပိုင်းဆိုင်ရာကုထုံးများကို ခံယူနိုင်သကဲ့သို့ တရားထိုင်ခြင်း၊ လေ့ကျင့်ခန်းများလုပ်ခြင်း ၊ လူအများနှင့် ဆက်သွယ်ပြောဆိုဆက်ဆံခြင်းတို့ကို ပြုလုပ်နိုင်ပါသည်။ ထို့ပြင် အစားအစာများ၊ အာဟာရဓာတ်များကို စားသုံးခြင်းအားဖြင့်လည်း တစ်နည်းတစ်ဖုံ လျော့ကျစေနိုင်ပါသည်။
အောက်ပါ အာဟာရဓာတ်တို့သည် စိုးရိမ်စိတ်နှင့် စိတ်ဖိစီးမှုတို့ကို လျော့ကျစေသည့် အာဟာရဓာတ်များဖြစ်ကြပါသည်။
၁။ မဂ္ဂနီဆီယမ် ( Magnesium )
မဂ္ဂနီဆီယမ်သည် စိတ်ဖိစီးမှုများကို အလျင်အမြန် သက်သာစေနိုင်သော အစွမ်းသတ္တိရှိသည့်အပြင် သဘာ၀တွင်တွေ့ရသော ကြွက်သားများကို ပြေလျော့စေသော ဂုဏ်သတ္တိရှိပါသည်။ထို့ကြောင့် စိတ်ဖိစီးမှုများကိုပြေလျော့စေရန် အကူအညီပေးပါသည်။
မဂ္ဂနီဆီယမ်ကို ကြောက်ရွံ့ခြင်း၊ ဂနာမငြိမ်ဖြစ်ခြင်း ၊ စိတ်လှုပ်ရှားခြင်းများကို သက်သာပျောက်ကင်း အောင် ကူညီပေးနိုင်သည့် အာရုံကြောကိုပြေလျော့စေနိုင်သည့် သတ္တုဓာတ် အာဟာရ တစ်မျိုးအဖြစ်လက်ခံထားကြပါသည်။ မဂ္ဂနီဆီယမ်သည် ကယ်လ်ဆီယမ်နှင့်လည်း ဆက်နွယ်ပတ်သက်မှုများရှိသောကြောင့် မဂ္ဂနီဆီယမ်ကို ကယ်လ်ဆီယမ်နှင့်တွဲဖက် အသုံးပြုပေးခြင်းဖြင့် ပိုမိုကောင်းမွန်သော အကျိုးကျေးဇူးများရရှိသည်ကိုတွေ့ရပါသည်။
၂။ Melatonin
ခန္ဓာကိုယ်မှ Melatonin များကိုထုတ်လုပ်နိုင်ပါသည်။ သို့သော် အချို့သောသူများတွင် ထုတ်လုပ်မှုမလုံလောက်သည့်အခါ အိပ်စက်ခြင်းကို လျော့နည်းစေခြင်းနှင့် စိတ်ပြေလျော့ခြင်းများကို လျော့ကျစေနိုင်သည့်အပြင်စိတ်ဖိစီးမှုများကိုလည်း ဖြစ်စေနိုင်ပါသည်။
ထိုအခါမျိုးတွင် Melatonin ဖြည့်စွက်စာများကို စားသုံးနိုင်ပါသည်။ Melatonin သည် စိတ်ဖိစီးမှုခံစားမှုများကို လျော့နည်းစေသည့်အပြင် အိပ်စက်ခြင်းကို ပိုမိုတိုးတက်စေခြင်းနှင့် နေ့ညစည်းချက်မှန်မှုများကိုပါ ထိန်းညှိပေးနိုင်ပါသည်။
၃။ Vitamin B Complex
Vitamin B Complex သည် စိတ်အခြေအနေကို မြင့်မားတည်ငြိမ်စေရန် အကူအညီပေးနိုင်ကြောင်း လက်ခံထားကြပါသည်။ ထို့ကြောင့် Vitamin B Complex ကို အားဆေးအတော်များများတွင် ထည့်သွင်းဖော်စပ်ထားသည်ကို တွေ့ရှိရပါသည်။
Vitamin B Complex တွင်
• Thiamine ( ဗီတာမင် B1 )
• Riboflavin (ဗီတာမင် B2)
• Niacin (ဗီတာမင် B3)
• Panthothenic acid ( ဗီတာမင် B5 )
• Pyridoxine ( ဗီတာမင် B6)
• Biotin
• Folic acid နှင့်
• Cobalamin (ဗီတာမင် B12) တို့ပါဝင်ကြပါသည်။
၎င်းဗီတာမင်ဓာတ်များအားလုံးသည် စိတ်တည်ငြိမ်အောင်ထိန်းသိမ်းပေးကာ စိုးရိမ်စိတ်နှင့် စိတ်ဖိစီးမှုများကို လျော့ချပေးနိုင်စွမ်းရှိကြပါသည်။
၄။ ငါးကြီးဆီ
ငါးကြီးဆီတွင် နှလုံးကျန်းမာရေးကို အထောက်အကူပြုနိုင်သည့်အပြင် စိတ်အခြေအနေကိုပါ တည်ငြိမ်ကောင်းမွန်စေနိုင်သည့် Omega -3 fatty acid ပါဝင်သည်။ Omega -3 သည် ဦးနှောက်နှင့် အာရုံကြောစနစ်၏ အခြေခံအုတ်မြစ်တစ်ခုဖြစ်သည်။ ထို့ကြောင့် Omega -3 စားသုံးခြင်းအားဖြင့် ဦးနှောက်၏ ဇီ၀ကမ္မဖြစ်စဥ်မှန်ကန်စေနိုင်ပြီး စိတ်ဖိစီးမှုနှင့် စိုးရိမ်စိတ်များကို လျော့ကျစေနိုင်ပါသည်။
၅။ Probiotics
Probiotics ဆိုသည်မှာ အူလမ်းကြောင်းတွင်ရှိသော အကျိုးပြုဘက်တီးရီးယားများဖြစ်ပါသည်။ Probiotics သည် အစာချေဖျက်မှု၊ အာဟာရဓာတ်များကိုစုပ်ယူမှုနှင့် ခန္ဓာကိုယ်၏ ခုခံအားစနစ်ကို အထောက်အကူပြုနိုင်စွမ်းရှိသည့် ဓာတ်တစ်မျိုးဖြစ်ကြောင်း လက်ခံထားကြပါသည်။ ထို့ပြင် Probiotics သည် ဦးနှောက်နှင့် အာရုံကြောကျန်းမာရေးအတွက်လည်း အကျိုးကျေးဇူးပေးနိုင်ကြောင်း တွေ့ရှိလာကြပါသည်။ ကာလရှည်ကြာစွာ စိတ်ဖိစီးမှုများကို လျော့ကျစေရန်နှင့် စဉ်းစားတွေးခေါ်မှုဆိုင်ရာ ဦးနှောက်၏ လုပ်ဆောင်ချက်များ တိုးတက်စေရန် Probiotics များက အကူအညီများစွာပေးနိုင်ကြောင်း တွေ့ရှိရပါသည်။
စိုးရိမ်စိတ်နှင့် စိတ်ဖိစီးမှုများကို တရားဓမ္မပြုလုပ်ခြင်းများအပါအဝင် အတွေးအခေါ်များပြောင်းလဲခြင်း၊ နေထိုင်မှုပုံစံများ ပြောင်းလဲခြင်းများအပြင် အစာအာဟာရဓါတ်များကို ဖြည့်စွက်စားသုံးခြင်းနည်းလမ်းများကို အသုံးပြု၍ ဖြေလျော့နိုင်ပါစေကြောင်း ဆန္ဒပြုအပ်ပါသည်။
Author Dr. CK
