ကလေးတစ်ယောက်သည် Ice – cream စားပြီးနောက် သို့မဟုတ် နွားနို့တစ်ခွက်သောက်ပြီးနောက် ဝမ်းဗိုက်မအီမသာဖြစ်ခဲ့လျှင် Lactose သကြားနှင့် ဓာတ်မတည့်ခြင်းကြောင့် ဖြစ်ပါသည်။
ထိုသို့ဖြစ်ရခြင်းမှာ Lactose သကြားကို ခြေဖျက်သည့် သဘာဝ အင်ဇိုင်းတစ်မျိုးဖြစ်သော Lactase အား အစာလမ်းကြောင်းမှ မထုတ်လုပ်နိုင်သောကြောင့် ဖြစ်ပါသည်။
Lactose သကြားသည် နို့၊ ရေခဲမုန့် နှင့် ချိစ်အပျော့စား စသည့် ကလေးများ နှစ်သက်သည့်အစားအစာ အများအပြားတွင် တွေ့ရှိရသောသကြားတစ်မျိုးဖြစ်ပါသည်။
အချို့သောမုန့်များ၊ သကြားလုံးများ၊ ဆော့စ်များနှင့် တစ်ခါတစ်ရံ မိမိမထင်မှတ်ထားသော အစားအစာများ၌ပင် Lactose သကြားပါဝင်တတ်ပါသည်။
မိခင်၏နို့ရည်နှင့် ကလေးများသောက်သုံးရန် ထုတ်လုပ်ထားသည့် နို့မှုန့်များတွင်လည်း Lactose သကြား ပါဝင်တတ်ပါသည်။
Lactose သကြားသည် ရိုးရှင်းသည့် သကြားမော်လီကျူး နှစ်မျိုးဖြစ်သည့် Glucose နှင့် Galactose နှစ်ခုဖြင့် ပေါင်းစပ်ဖွဲ့စည်းထားခြင်း ဖြစ်ပါသည်။
ထိုသကြားနှစ်မျိုး၏ ပေါင်းစပ်မှုကို အူလမ်းကြောင်း၏ နံရံများတွင် တွေ့ရှိရသော Lactase ဆိုသည့် အင်ဇိုင်းဖြင့် ဖြိုခွဲ၍ ခန္ဓာကိုယ်မှ စုပ်ယူခြင်းဖြစ်ပါသည်။
သို့ရာတွင် Lactose သကြားနှင့် မတည့်ခြင်း ဖြစ်ပွားနေသော ကလေးများတွင် Lactase အင်ဇိုင်း၏ စွမ်းဆောင်ရည်များ ကျဆင်း၍ အကျိုးမရှိဖြစ်လာကာ Lactose သကြားကို အူသိမ်အတွင်းတွင် ခြေဖျက်၍ စုပ်ယူရန် မတတ်နိုင်တော့ပါ။
ထိုအခါ Lactose သကြားများသည် အူသိမ်မှ အူမကြီးအတွင်းသို့ရောက်ရှိသွားပြီး ထို အူမကြီးအတွင်းတွင် ဘက်တီးရီးယားများ၏ ကစော်ဖောက်ခြေဖျက်ခြင်းကြောင့် ကာဗွန်ဒိုင်အောက်ဆိုက်၊ ဟိုက်ဒရိုဂျင်များနှင့် ဝမ်းလျှောခြင်းကို ဖြစ်စေနိုင်သော အခြားဘေးထွက်ပစ္စည်းများ ထွက်ပေါ်လာကြပါသည်။
လက္ခဏာရပ်များ
Lactose သကြားနှင့် မတည့်သော ကလေးငယ်များသည် Lactose သကြားပါဝင်သော အစားအစာများ ပိုမိုစားသုံးလေလေ ရောဂါလက္ခဏာရပ်များ ပိုမိုပေါ်ပေါက်လေလေဖြစ်ပါသည်။
အောက်ပါတို့သည် Lactose သကြားမတည့်ခြင်းနှင့် ပတ်သက်၍ ပေါ်ပေါက်တတ်သည့် ရောဂါလက္ခဏာများဖြစ်ကြပါသည်။
အထူးသဖြင့် နို့ထွက်ပစ္စည်းများ စားသုံးပြီးသောအခါ ဝမ်းသွားခြင်း၊ ဝမ်းလျှောခြင်း၊ လေပွခြင်း၊ အရည်ဝမ်း သွားခြင်း၊ လေဝမ်းမကွဲသော ဝမ်းသွားခြင်း၊ ဗိုက်အောင့်ခြင်း၊ ပျို့ခြင်း၊ အရေပြားပေါ်တွင် အနီကွက်များ ဖြစ်ပေါ်လာခြင်း၊ မကြာခဏ ခြေလက်အေးစက်ခြင်း စသည်တို့ ဖြစ်ကြပါသည်။
တစ်ခါတစ်ရံ Lactose သကြားနှင့် မတည့်ခြင်းပြဿနာကို နို့နှင့်ဓာတ်မတည့်ခြင်းပြဿနာနှင့် ရောထွေးမှားယွင်းတတ်ပါသည်။
ထိုပြဿနာနှစ်ခုလုံးတွင် တွေ့ရသည့် ရောဂါလက္ခဏာများမှာ ဆင်တူလေ့ရှိသော်လည်း ၎င်းတို့နှစ်ခုသည် မတူညီသည့် အကြောင်းရင်းနှစ်ရပ်ကြောင့် ဖြစ်ပွားရခြင်းဖြစ်ပါသည်။
နို့နှင့် ဓာတ်မတည့်ခြင်းသည် ကလေးအသက် တစ်နှစ်အတွင်း ဖြစ်ပွားလေ့ရှိသော ပြင်းထန်သည့် ခုခံအားစနစ်ဆိုင်ရာ တုံ့ပြန်မှုတစ်ခုဖြစ်ပါသည်။
Lactose သကြားနှင့် မတည့်ခြင်းသည် မွေးကင်းစကလေးများနှင့် လမ်းလျှောက်တတ်စကလေးများတွင် ဖြစ်ပွားလေ့မရှိပေ။
Lactose သကြားနှင့် မတည့်သည့် လက္ခဏာရပ်များသည် အသက်ကြီးသောကလေးများနှင့် မြီးကောင်ပေါက်အချိန်တွင် စတင် ပေါ်ပေါက်တတ်ပြီး အရွယ်ရောက်ပြီးအချိန်တွင် ပိုမိုသိသာထင်ရှားလာပါသည်။
ရောဂါလက္ခဏာရပ်များကြောင့် နေရထိုင်ရ မအီမသာ ဖြစ်နိုင်သော်လည်း Lactose သကြားနှင့် မတည့်ခြင်းသည် ရေရှည်ဖြစ်ပွားခြင်းမရှိသည့် ကြီးစွာစိုးရိမ်ရန်မလိုအပ်သော ပြဿနာတစ်ခု ဖြစ်ပါသည်။
Lactose သကြားပါဝင်သော အချို့သော အစားအစာများကို ရှောင်ရှားခြင်းအားဖြင့် ရောဂါလက္ခဏာများကို မဖြစ်ပွားစေရန် တားဆီးနိုင်ကြောင်း တင်ပြလိုက်ရပါသည်။
Author : Dr. မွန်
