သာမန်အချိန်တွေမှာ အဆုတ်ကျန်းမာရေးကို သတိပြုမိတာနည်းပေမယ့် အသက်ရှူကြပ်လာတာ၊ မောလာတာမျိုးဖြစ်လာရင်တော့ မိမိအဆုတ်ရဲ့အခြေအနေကို ပူပန်လာတတ်ကြပါတယ်။ ဒါကြောင့် မိမိအဆုတ်အမြဲအားကောင်းနေစေဖို့ မှန်ကန်တဲ့နည်းစနစ်တွေနဲ့ နေထိုင်ဖို့လိုအပ်ပါတယ်။ အဆုတ်အားကောင်းစေမယ့် နည်းလမ်းတွေကတော့
(၁) အသက်ရှူလေ့ကျင့်ခန်းပြုလုပ်ပါ။
အသက်ရှူလေ့ကျင့်ခန်းမှန်မှန်ပြုလုပ်တာဟာ အဆုတ်အားကောင်းစေဖို့ အလွယ်ကူဆုံးနဲ့ အထိရောက်ဆုံးနည်းလမ်းဖြစ်ပါတယ်။ အသက်ရှူလေ့ကျင့်ခန်းလုပ်တဲ့အခါ ရှူနိုင်သလောက်အဆုံးထိ ဖြေးဖြေးနဲ့မှန်မှန်ရှူသွင်းပြီးမှ တဖြည်းဖြည်းချင်းပြန်ရှူထုတ်ပေးရပါမယ်။ အသက်ဝဝရှူသွင်းတဲ့အခါ အဆုတ်မှာရှိတဲ့ လေအိတ်ငယ်တိုင်းကို အလုပ်လုပ်စေမှာဖြစ်တဲ့အတွက် အဆုတ်အားကောင်းလာစေပါတယ်။ ရှူသွင်း၊ ရှူထုတ် ၅စက္ကန့်စီခန့် ကြာမြင့်သင့်ပါတယ်။ တစ်နေ့ကို အသက်ရှူလေ့ကျင့်ခန်း အကြိမ် ၂၀ခန့် ပုံမှန်ပြုလုပ်ပေးနိုင်ရင် အဆုတ်အားကောင်းလာစေမှာဖြစ်ပါတယ်။
(၂) ဆေးလိပ်မသောက်ပါနဲ့။ ဆေးလိပ်ငွေ့ရှိတဲ့ ပတ်ဝန်းကျင်ကို ရှောင်ပါ။
ဆေးလိပ်ငွေ့အန္တရာယ်ဟာ အဆုတ်ကင်ဆာရောဂါဖြစ်စေနိုင်သလို အဆုတ်လေပြွန်ကျဥ်းခြင်း၊ အဆုတ်ဇကာပေါက်ဖြစ်ခြင်း စတဲ့ ကျန်းမာရေးပြဿနာတွေ ဖြစ်ပေါ်လာစေနိုင်ပါတယ်။ ဆေးလိပ်သောက်သူတွေအပြင် ဆေးလိပ်ငွေ့အမြဲရှူမိနေသူတွေဟာလည်း ထပ်တူအန္တရာယ်ရှိပါတယ်။ ဒါကြောင့်အဆုတ်အားကောင်းလိုတယ်ဆိုရင် ဆေးလိပ်ငွေ့ရှိတဲ့နေရာတွေကို အတတ်နိုင်ဆုံး ရှောင်ကြဥ်နေထိုင်ရမှာဖြစ်ပါတယ်။
(၃) လေထုညစ်ညမ်းမှု မရှိတဲ့နေရာမှာနေထိုင်ပါ။
ကားမီးခိုး၊ ဖုန်မှုန့်၊ အမှိုက်မီးရှို့ရင်ထွက်တဲ့အငွေ့၊ မီးစက်ကထွက်တဲ့အငွေ့၊ စက်ရုံ၊ အလုပ်ရုံကထွက်တဲ့အငွေ့ စတာတွေဟာ လေထုညစ်ညမ်းစေပြီး အဆုတ်ကျန်းမာရေးကိုထိခိုက်စေနိုင်ပါတယ်။ ဒါကြောင့် လေထုညစ်ညမ်းတဲ့နေရာတွေ မဖြစ်မနေသွားရမယ်ဆိုရင် နှာခေါင်းစည်း mask တပ်ဆင်ထားတာ အကောင်းဆုံးဖြစ်ပါတယ်။
(၄) ပူဖောင်းမှုတ်ပါ။
ပူဖောင်းမှုတ်ခြင်းကလည်း အသက်ရှူလေ့ကျင့်ခန်းကဲ့သို့ပင် အဆုတ်အားကောင်းစေနိုင်မယ့် လေ့ကျင့်ခန်းတစ်မျိုးဖြစ်ပါတယ်။
(၅) အိမ်သန့်ရှင်းရေးမကြာခဏပြုလုပ်ပေးပါ။
ကော်ဇောတွေ၊ အိပ်ရာခင်းတွေမှာ ဖုန်မှုန့်နဲ့ပိုးမွှားတွေ အမြောက်အမြား ကပ်ငြိနေနိုင်တာကြောင့် အသက်ရှူလမ်းကြောင်းနဲ့အဆုတ်ကို ထိခိုက်စေနိုင်ပါတယ်။ ဒါကြောင့် ကော်ဇော၊ အိပ်ရာခင်းစတာတွေကို အနည်းဆုံးတစ်ပတ် ၃ကြိမ်ခန့် သန့်ရှင်းရေးပြုလုပ်သင့်ပါတယ်။
(၆) ရေများများသောက်ပါ။
ရေများများသောက်ပြီး ရေဓါတ်ပြည့်ဝနေမှသာ ခန္ဓါကိုယ်ကျန်းမာရေးကောင်းမွန်စေမှာဖြစ်သလို အဆုတ်လည်း ကောင်းမွန်စွာအလုပ်လုပ်နိုင်မှာဖြစ်ပါတယ်။
(၇) လှုပ်လှုပ်ရှားရှားနေထိုင်ပါ။
လေ့ကျင့်ခန်းမှန်မှန်ပြုလုပ်ပေးခြင်းဟာ အဆုတ်ကိုသန့်စင်ပေးရာရောက်သလို အဆုတ်ကိုကျန်းမာသန်စွမ်းစေနိုင်ပါတယ်။
(၈) ရေနွေးငွေ့ရှူပါ။
ရေနွေးငွေ့ရှူခြင်းဟာ အဆုတ်နဲ့အသက်ရှူလမ်းကြောင်းတစ်လျှောက်မှာရှိတဲ့အချွဲတွေကို ပျော်သွားစေနိုင်ပြီး အသက်ရှူခြင်းကို ပိုမိုလွယ်ကူစေနိုင်ပါတယ်။ ရေနွေးငွေ့ရှူရာမှာ အပူမလောင်စေဖို့ ပူခြစ်နေတဲ့ ရေနွေးမျိုးမသုံးမိအောင် သတိပြုရပါမယ်။
(၉) ဇင့်ဓါတ်ပါဝင်သော အစားအစာများကို စားသုံးပါ။
ဇင့်ဓါတ်ပါဝင်တဲ့ အစားအစာတွေဖြစ်တဲ့ ထောပတ်သီး၊ ငှက်ပျောသီး၊ ဖရုံစေ့၊ အမဲသား၊ ကြက်ဥ စတာတွေကို စားသုံးပေးရပါမယ်။ ဇင့်ဓါတ်ဟာ အဆုတ်ရောင်ရမ်းပိုးဝင်ခြင်းတွေကို သက်သာစေနိုင်သလို အဆုတ်ကျန်းမာရေးကိုလည်း များစွာအထောက်အကူဖြစ်စေပါတယ်။
အဆုတ်ကျန်းမာအားကောင်းစေဖို့အတွက်ဆိုရင် အထက်ပါနည်းလမ်းတွေအတိုင်း နေ့စဥ်လိုက်နာနေထိုင်ပေးရမှာဖြစ်ပါတယ်။ အသက်ရှူစဥ် တရွှီရွှီမြည်တာ၊ အသက်ရှူစဥ်နာကျင်တာ၊ ချောင်းအဆက်မပြတ်ဆိုးတာ၊ အသက်ရှူကြပ်တာ စတာတွေခံစားနေရရင် အဆုတ်ကျန်းမာရေးအတွက် စိုးရိမ်ရတာကြောင့် ဆရာဝန်နဲ့တိုင်ပင်ပြသသင့်ပါတယ်။
Author : Dr.Aye Myat Mon
