ဝမ်းပျက်ဝမ်းလျှောဖြစ်တဲ့အခါ လေထခြင်း၊ လေပွခြင်း၊ ဗိုက်အောင့်ခြင်း၊ ဝမ်းပျော့ပျော့ သို့မဟုတ် အရည်များမကြာခဏသွားခြင်းစတဲ့ ရောဂါလက္ခဏာများ ဖြစ်ပေါ်ခံစားရလေ့ရှိပါတယ်။ အစာအိမ်နှင့် အူလမ်းကြောင်းစနစ်ကို အဆင်ပြေသက်သာစေတဲ့ အစားအစာများကို သိရှိစားသုံးခြင်းနှင့် ဝမ်းပျက်ဝမ်းလျှောခြင်းကို ပိုမိုဆိုးရွားစေသော အစားအစာများကို ရှောင်ရှားခြင်းအားဖြင့် ဝမ်းပျက်ဝမ်းလျှောခြင်းဝေဒနာများကို အတိုင်းအတာတစ်စုံတစ်ရာအထိ သက်သာပျောက်ကင်းအောင် လုပ်ဆောင်နိုင်ပါတယ်။
ဝမ်းပျက်ဝမ်းလျှောဖြစ်လျှင် စားသင့်သောအစားအစာများ
အရည်များ
ဝမ်းပျက်ဝမ်းလျှောဖြစ်လျှင် အကြီးမားဆုံးရင်ဆိုင်ရနိုင်တဲ့ အန္တရာယ်တစ်ခုမှာ ရေဓါတ်ခန်းခြောက်ခြင်းဖြစ်ပါတယ်။ရေဓါတ်ခန်းခြောက်ခြင်းကိုကာကွယ်ရန်အတွက် ရေများများသောက်ခြင်းအပြင်၊ အုန်းရည်၊ စွပ်ပြုတ်ရည်၊ အရိုးပြုတ်ရည်ကဲ့သို့သော အရည်များသောက်ခြင်းဟာလည်း မဖြစ်မနေပြုလုပ်သင့်သော နည်းလမ်းတစ်ခုဖြစ်ပါတယ်။
ငှက်ပျောသီး
ငှက်ပျောသီးတွင် ဝမ်းလျှောခြင်းကြောင့် ခန္ဓာကိုယ်မှဆုံးရှုံးသွားသော သတ္တုဓါတ်တစ်မျိုးဖြစ်တဲ့ Potassium ဓါတ်များကြွယ်ဝပါတယ်။ ဒါ့အပြင် ခန္ဓာကိုယ်အတွက် အရေးကြီးသောအရည်များကို အူလမ်းကြောင်းမှ ပြန်လည်စုပ်ယူရာတွင် ကူညီပေးနိုင်သော အမျှင်ဓါတ်တစ်မျိုးဖြစ်တဲ့ Pectin လည်းပါဝင်ပါတယ်။
ကြေပျက်အောင် အလွယ်တကူ ခြေဖျက်နိုင်ခြင်းကြောင့် အစာခြေစနစ်အား ထိရောက်စွာအကူအညီပေးနိုင်သော ငှက်ပျောသီးကို ဝမ်းပျက်ဝမ်းလျှောရောဂါခံစားနေရတဲ့အချိန်တွင် စားသုံးသင့်သော အကောင်းဆုံးအစားအစာတစ်ခုအဖြစ် သတ်မှတ်ထားကြပါတယ်။
ထမင်း
ထမင်းတွင် ဝမ်းကိုမာစေသော ဂုဏ်သတ္တိရှိတဲ့အပြင် Carbohydrate ဓါတ်လည်းကြွယ်ဝတာကြောင့် အလွယ်တကူခြေဖျက်နိုင်ပါတယ်။ သို့ရာတွင် ထမင်းနဲ့အတူ နို့ထွက်ပစ္စည်းများ၊ အဆီများကို တွဲဖက်စားသုံးပါက ဝမ်းပျက်ဝမ်းလျှောခြင်းရဲ့လက္ခဏာရပ်များကို ပိုမိုဆိုးရွားစေပါတယ်။ ၎င်းတို့အစား ထမင်းဖြူကို ကြက်စွပ်ပြုတ်ရည်ဖြင့် စားသုံးခြင်းဟာ ဝမ်းပျက်ဝမ်းလျှောနေစဉ်ကာလအတွင်း အကောင်းမွန်ဆုံးသောနည်းလမ်းတွေထဲက တစ်ခု ဖြစ်ပါတယ်။
ကြက်စွပ်ပြုတ်ရည်
ကြက်စွပ်ပြုတ်ရည်တွင် ဆုံးရှုံးသွားသောသတ္တုဓါတ်ဆားများကို ပြန်လည်ဖြည့်တင်းပေးနိုင်သော အာဟာရဓါတ်များပါဝင်ကြောင်းတွေ့ရှိရပါတယ်။ ဒါ့အပြင် ကြက်စွပ်ပြုတ်ရည်ခပ်နွေးနွေး တစ်ပန်းကန်က အစာအိမ်တွင် ခံစားနေရသော ဝေဒနာများကို သက်သာစေပြီး နေသာထိုင်သာ ပိုမိုရှိလာစေရန် ကူညီပေးနိုင်ပါတယ်။
ဒိန်ချဉ်
ဝမ်းပျက်ဝမ်းလျှောဖြစ်နေစဉ် နို့ထွက်ပစ္စည်းများကို ရှောင်ရှားသင့်သော်လည်း ထိုအထဲတွင် ဒိန်ချဉ်မပါဝင်ပါ။ ဒိန်ချဉ်တွင် အူလမ်းကြောင်းအတွင်းနေထိုင်သော အကျိုးပြု ဘက်တီးရီးယားပေါင်းများစွာ ပါဝင်ပါတယ်။ ဒါ့ကြောင့် အဆိုပါ မိတ်ဆွေဘက်တီးရီးယားများရဲ့ အရေအတွက်ကို မြှင့်တင်ပေးခြင်းအားဖြင့် ဝမ်းပျက်ဝမ်းလျှောခြင်းကို ပျောက်ကင်းသက်သာစေနိုင်ပါတယ်။
သို့သော် သကြားဟာ အစာအိမ်နှင့် အူလမ်းကြောင်းတွင် Gas များကို အလွန်အကျွံဖြစ်ပေါ်စေပြီး လေပွခြင်းနှင့် ဝမ်းလျှောခြင်းများကို ဖြစ်စေနိုင်သဖြင့် မိမိစားသုံးမယ့် ဒိန်ချဉ်တွင် သကြားနှင့် အခြားသော ပြုပြင်စီမံထားသည့်အချိုဓါတ်များ ပါဝင်မှုပမာဏနည်းပါးစေရန် ဂရုစိုက်ရမှာဖြစ်ပါတယ်။
အားကစားသမားများ သောက်သုံးသည့်အချိုရည်များ
အားကစားသမားများသောက်သုံးသောအချိုရည်များဟာလည်း ဝမ်ပျက်ဝမ်းလျှောခြင်းကြောင့် ခန္ဓာကိုယ်မှ ဆုံးရှုံးသွားသောဓါတ်ဆားများကို ပြန်လည်ဖြည့်တင်းပေးနိုင်ပါတယ်။ သို့ရာတွင် ဒိန်ချဉ်ကဲ့သို့ပင် သကြားနှင့်အခြားပြုပြင်စီမံထားသောအချိုဓါတ်များ ပါဝင်မှုပမာဏနည်းပါးသော အချိုရည်များကို သေချာစွာရွေးချယ်ဝယ်ယူရန် လိုအပ်ပါတယ်။ သို့မဟုတ်ပါက ဝမ်းပျက်ဝမ်းလျှောခြင်းလက္ခဏာရပ်များကို ပိုမိုဆိုးရွားစေပါလိမ့်မယ်။
အထက်ပါအစားအစာများကို စားသုံးပေးခြင်းအားဖြင့် ဝမ်းပျက်ဝမ်းလျှောခြင်းကို သက်သာပျောက်ကင်းအောင် ကုသရာတွင် အကူအညီတစ်စုံတစ်ရာရရှိမှာ ဖြစ်ပါတယ်။
Author: Dr. မွန်
