မျက်နှာလေးကို မြင်တာနဲ့ ရင်ထဲအေးသွားတဲ့ အကြည်ဓါတ်လေးဖြစ်ဖို့က မင်းသား၊မင်းသမီး တစ်ယောက်လို ရုပ်ရည်ချောမောနေဖို့ မလိုအပ်ပါဘူး။ မျက်နှာလေး အပြစ်အနာမရှိ ကြည်လင်လှပနေဖို့ ခန္ဓာကိုယ် အတွင်းအပြင်ကို သေချာဂရုစိုက်ပေးရုံနဲ့ ဖြစ်နိုင်တဲ့အရာတစ်ခုပဲ ဖြစ်ပါတယ်။ ခန္ဓာကိုယ်ရော စိတ်ပါကျန်းမာ ကြည်လင်နေမှသာ မျက်နှာမှာ အကြည်ဓါတ်လေး ရနိုင်မှာဖြစ်တဲ့အတွက် အစာအာဟာရ သင့်တင့်မျှတစွာစားခြင်း၊ ကိုယ်အလေးချိန် မျှတအောင်ထိန်းခြင်း၊ အိပ်ရေးဝအောင် အိပ်စက်ခြင်းတို့ ပြုလုပ်ပေးရပါမယ်။ စိတ်ပူပန်မှု၊ စိတ်ဖိစီးမှုများ ကင်းဝေးမှ စိတ်ရောလူပါ ကြည်လင်တဲ့အသွင် ရရှိနိုင်မှာဖြစ်ပြီး စိတ်ဖိစီးမှုမများအောင် ကြိုးစားသင့်ပါတယ်။
မြင်သူငေးတဲ့ အကြည်ဓါတ်လေး ဖြစိနိုင်ဖို့ မိတ်ကပ်ထူထူ ပြင်ဆင်ခြယ်သခြင်းထက် skin care အရေပြားအလှအပ ထိန်းသိမ်းမှုကို ပိုအလေးပေး ပြုလုပ်ဖို့ လိုအပ်ပါတယ်။ ညဖက်အိပ်ယာဝင်တဲ့အခါ သနပ်ခါး၊ မိတ်ကပ်၊ အညစ်အကြေးများကို ပြောင်စင်အောင် မိတ်ကပ်ဖျက်ဆေး၊ မျက်နှာသန့်စင်ဆေး အသုံးပြုပြီး double cleansing အဆင့်၂ဆင့်ဖြင့် မျက်နှာသန့်စင် ပေးသင့်ပါတယ်။ မျက်နှာသစ်ပြီးတိုင်း ချွေးပေါက်ကို သန့်စင်ပေးသော toning solution အသုံးပြုပေးခြင်း၊ အစိုဓါတ်ဖြည့်ပေးသည့် hyaluronic ကဲ့သို့ ဒြပ်ပေါင်းပါဝင်တဲ့ serum သို့မဟုတ် essence အသုံးပြုပေးခြင်းဖြင့် အရေးအကြောင်း ကင်းစင်ပြီး ကြည်လင်တောက်ပသော အရေပြား ရရှိစေနိုင်ပါတယ်။
အစိုဓါတ်ထိန်း အလှဆီ moisturizing cream အနည်းဆုံး တစ်နေ့၂ကြိမ် ပုံမှန် လိမ်းပေးခြင်းက အရေပြားကို အစိုဓါတ်ဖြည့်ပေးပြီး အသားအရေ ခြောက်သွေ့ ပျက်စီးတာကို ကာကွယ်နိုင်ပါတယ်။ အရေပြားကို စိုပြေတောက်ပစေသော face oil ကို နေ့ခင်းဖက် အသားအရေ ထိန်းသိမ်းသော skincare အဆင့်တွင် ထည့်နိုင်ပါတယ်။ မျက်နှာကို နှိပ်နယ်ပေးခြင်းဖြင့် သွေးလည်ပါတ်မှု ကောင်းမွန်ပြီး အသားအရေ စိုပြေကြည်လင်စေပါတယ်။ ဗီတာမင်စီနှင့် အခြားအက်ဆစ်အပျော့စား ပါဝင်သော ပစ္စည်းများကို နည်းလမ်းမှန်ကန်စွာ သုံးခြင်းကလည်း အသားအရေ ကြည်လင်စေတဲ့ နည်းတစ်ခု ဖြစ်ပါတယ်။
အရေပြားအပေါ်ယံလွှာကို ဖယ်ရှားပေးသော exfoliation ကို ပြုလုပ်ပေးခြင်းဖြင့် အရေပြားဆဲလ်အဟောင်းများ ဖယ်ရှားပေးပြီး တောက်ပသော အသားအရေကို ရရှိစေနိုင်ပါတယ်။ ထို့ကြောင့် အသားအရေနှင့် သင့်လျော်သောအပျော့စား mild exfoliants ( face scrub) အသုံးပြုပြီး ဆဲလ်အသေများကို ပုံမှန်ဖယ်ရှားပေးသင့်ပါတယ်။
နေရောင်ခြည်ဒါဏ်ဟာ အသားအရေ မွဲခြောက်ပျက်စီးစေတာကြောင့် နေရောင်တိုက်ရိုက် မထိအောင် အကာအကွယ် အသုံးပြုခြင်း၊ Sun Protection Factor- SPF ပါဝင်သော နေရောင်ကာလိမ်းဆေးကို အမြဲပုံမှန်လိမ်းပေးခြင်းကလည်း နေရောင်ခြည်ဓါတ်ကြောင့် အရေပြားညိုမည်း ပျက်စီးမှု မဖြစ်အောင် ကာကွယ်နိုင်ပါတယ်။ရေများများသောက်ခြင်း၊ ကိုယ်လက်လှုပ်ရှား ပုံမှန်ပြုလုပ်ပေးခြင်း၊ သင့်တော်မှန်ကန်သော အသားအရေ ထိန်းသိမ်းမှု ပုံမှန်ပြုလုပ်ပေးခြင်းဟာ အသားအရေ ကြည်လင်ဖို့ အဓိကကျတဲ့အရာ ဖြစ်ပါတယ်။
အရေပြားအတွက် အထောက်အကူပေးသော ပရိုတင်း၊ ဗီတာမင်စီ၊ ဗီတာမင်အီး၊ ဓါတ်တိုးဆန့်ကျင်သတ္တိရှိ အစားအသောက်များ၊ ကော်လာဂျင် ဖြည့်စွက်ဆေးများ သောက်ခြင်းဖြင့်လည်း အရေပြား ကြည်လင်လှပစေရန် ကူညီပံ့ပိုးပေးပါတယ်။ အရေပြား ထိခိုက်ပျက်စီးနိုင်တဲ့ပြင်းထန်တဲ့ဓါတုပစ္စည်း ပါဝင်ပစ္စည်းများသုံးခြင်းကို ရှောင်ကျဉ်ပြီး အသားအရေ ထိန်းသိမ်းမှုကို ပြုလုပ်ပြီး မြင်သူငေးတဲ့ အကြည်ဓါတ်လေး ဖြစ်နိုင်ပါတယ်။
Author: Dr.Yee Mon
