သားသားမီးမီးတို့ရဲ့ ကျန်းမာရေးအပေါ် ဗီတာမင် ဒီ ရဲ့ ကောင်းကျိုးများ

သားသားမီးမီးတွေ ကျန်းကျန်းမာမာ ကြီးထွားဖွံဖြိုးလာဖို့ဆိုတာ မိဘတွေရဲ့ ပြုစုပျိုးထောင်မှုနဲ့ သက်ဆိုင်နေပါတယ်။ ဒါကြောင့် အာဟာရပြည့်ဝအောင် ကျွေးမွေးဖို့က အရေးအကြီးဆုံးပါပဲ။ မိဘတွေအနေနဲ့ ကလေးတွေအတွက် အရေးကြီးတဲ့ Vitamin D ရဲ့ အကြောင်းကိုလည်း သိထားသင့်ဖို့လိုအပ်ပါတယ်။

Vitamin D ဆိုသည်မှာ-

Vitamin D ဟာ ကလေးတွေကြီးထွားဖွံဖြိုးဖို့ လိုအပ်တဲ့ ဗီတာမင်တစ်မျိုးဖြစ်ပါတယ်။ Vitamin D ကို နေရောင်ခြည်နဲ့ အစားအသောက်တွေကနေရရှိတယ်ဆိုတာ လူအများစု သိရှိပြီး ဖြစ်ပါတယ်။

Vitamin D ဟာ ကိုယ်ခန္ဓာအတွက် အရေးကြီးတဲ့ သတ္တုဓာတ်တွေဖြစ်တဲ့ Calcium, magnesium နဲ့ phosphate တွေကို အူလမ်းကြောင်းမှတစ်ဆင့် သွေးကြောထဲသို့စုပ်ယူရာမှာ အကူအညီပေးပါတယ်။ Vitamin D  မှာ နှစ်မျိုးရှိပါတယ်။ D2 (ergocalciferol) ကို အစားအသောက်တွေက ရရှိပြီး D3 (cholecalciferol)ကို  နေရောင်ခြည်မှ ရရှိပါတယ်။

Vitamin D ရဲ့ကောင်းကျိုးများ

• အရိုးနှင့် သွားများကို သန်မာစေခြင်း

               အရိုးတည်ဆောက်ဖို့ လိုအပ်တဲ့ ကယ်ဆီယမ်ဓာတ် စုပ်ယူမှုကို အားပေးတဲ့ အတွက်ကြောင့် ကယ်ဆီယမ် များများစုပ်ယူနိုင်လေလေ အရိုးတွေ ကြီးထွားသန်မာဖို့ အားပေးလေ ဖြစ်ပါတယ်။

• ခုခံအားကောင်းစေခြင်း

Vitamin Dဟာ ခုခံအားအတွက် လိုအပ်တဲ့ ဆဲလ်တွေ များပြားလာအောင် လုပ်ဆောင်ပေးတဲ့ ဟော်မုန်းအနေနဲ့ ဆောင်ရွက်ပေးတဲ့ အတွက် ခုခံအားကို မြင့်တင်စေနိုင်ပါတယ်။ အချို့လေ့လာတွေ့ရှိချက်တွေအရ ပန်းနာရင်ကြပ်ရောဂါတွေကိုပါ သက်သာ စေနိုင်တယ်လို့ သိရှိရပါတယ်။

ကလေးတွေမှာ Vitamin D ချို့တဲ့နေရင် ကြီးထွားမှုနှေး‌ကွေးကြီးထွားမှုနှေး‌ကွေးခြင်း၊ rickets လို့ခေါ်တဲ့  အရိုးပျော့ရောဂါခံစားရခြင်း၊ ကယ်ဆီယမ်ဓာတ်ချို့တဲ့ခြင်း စသည်တို့ဖြစ်နိုင်တဲ့ အတွက် ကလေးတွေ ကြီးထွားဖွံဖြိုးနေချိန်မှာ Vitamin D ဓာတ် မချို့တဲ့အောင် ဂရုစိုက်သင့်ပါတယ်။

Vitamin D ကြွယ်ဝသော အစားအစာများမှာ-

• နွားနို့ နှင့်နို့ထွက်ပစ္စည်းများ
• ငါး၊ ပုစွန်စသည့် ပင်လယ်စာများ
• အသည်းကလီစာများ
• ကြက်ဥအနှစ်
• မှိုများ စသည်တို့ဖြစ်ပါတယ်။

Vitamin Dကြွယ်ဝဖို့ဆိုရင် အစားအသောက်တစ်ခုထဲနဲ့က မလုံလောက်ပါဘူး။ နေရောင်ခြည်ကိုလည်း လုံ‌လုံလောက်လောက် ရရှိသင့်ပါတယ်။ ကလေး အသက်တစ်နှစ်အောက် အတွက် လိုအပ်တဲ့  Vitamin D ပမာဏဟာ တစ်နေ့ကို 400 IU ရှိပြီး တစ်နှစ်အထက် ကလေးတွေအတွက်ကတော့ 600 IU ဖြစ်ပါတယ်။

(ပြုတ်ပြီးသား ကြက်ဥ တစ်လုံးတွင် 30 IU ပါဝင်ပြီး နွားနို့ 250 ml တွက် 100 IU vitamin D ပါဝင်ပါသည်) ဒါကြောင့် အစားချေးများတဲ့ ကလေးတွေအတွက် အလုံအလောက်ရရှိဖို့ ခက်ခဲပါတယ်။ နေရောင်ခြည်က ရရှိတဲ့ Vitamin Dဟာလည်း ကလေးကို နေရောင်ကာခရင်မ် လိမ်းပေးထားရင် စုပ်ယူမှုအားနည်းတဲ့အတွက် မလုံလောက်နိုင်ပါဘူး။ ဒါ‌‌ကြောင့် ကလေးဆရာဝန်များက Vitamin Dပါဝင်တဲ့ အားဆေးတွေကို တိုက်ဖို့ အကြုံပြုကြပါတယ်။

ဒါပေမယ့် Vitamin Dကို အလွန်အကျွံ သောက်သုံးမိရင် ဆိုးကျိုးတွေဖြစ်ပေါ်လာစေနိုင်တဲ့အတွက် ဆရာဝန်ညွှန်ကြားတာထက်ပိုပြီး ကလေးကို မတိုက်သင့်ပါဘူး။

ခြုံငုံပြောရရင် Vitamin D ဟာ အရိုးများ သန်မာစေခြင်း၊ ကယ်ဆီယမ်စုပ်ယူမှုကို အားပေးခြင်း၊ ခုခံအားကောင်းစေခြင်းတို့ကြောင့် ကလေးတွေ ကျန်းမာရေးအတွက် အလွန်အရေးပါတဲ့ ဗီတာမင်ဖြစ်ကြောင်း တင်ပြလိုက်ရပါတယ်။

Author : Dr. Aye Myat