HMB နှင့် ကြွက်သား ဆုံးရှုံးမှုကို ကာကွယ်ခြင်း

အားကစားတွေ နေ့စဥ်ပုံမှန်လုပ်နေလျက်နဲ့ ကြွက်သားတွေထင်သလောက်မကြီးထွားမသန်မာလာဘူးဆိုရင် သင့်မှာလိုအပ်နေတာ HMB ဆိုတဲ့ဓာတ်တစ်မျိုးဖြစ်ပါလိမ့်မယ်။ ပရိုတင်းအားဖြည့်စာတွေအကြောင်းကို လူတော်တော်များများကြားဖူးကြမှာဖြစ်ပေမယ့် HMB ကရရှိတဲ့ကြွက်သားကျန်းမာရေးကောင်းကျိုးတွေကိုတော့ လူတွေသိပ်သတိမထားမိကြပါဘူး။

•HMB ကခန္ဓာကိုယ်အတွက်ဘာကောင်းကျိုးရလဲ?

HMB ဆိုတာ ကြွက်သားဆုံးရှုံးမှုပမာဏကို လျှော့ချပေးပြီး ကြွက်သားတွေကျန်းမာကြံ့ခိုင်စေဖို့အတွက် အထောက်အကူပြုပေးတဲ့ဓာတ်တစ်မျိုးဖြစ်ပါတယ်။ ဒါ့အပြင် သွေးတွင်းအဆီဓာတ်လျော့ကျစေခြင်း၊ ကိုယ်ခံအားကောင်းမွန်စေခြင်း၊ ခံနိုင်ရည်ရှိလာခြင်း၊ အနာအကျက်မြန်စေခြင်း စတဲ့ကောင်းကျိုးများစွာလည်း ရရှိစေပါတယ်။

•HMB ကိုလူ့ခန္ဓာကိုယ်တွင်းမှာ ထုတ်လုပ်နိုင်လား?

စားသုံးလိုက်တဲ့အစားစာတွေထဲမှာပါဝင်တဲ့ ပရိုတင်းဓာတ်တွေထဲမှအချို့ကို ခန္ဓာကိုယ်ထဲရောက်တဲ့အခါမှာ အမိုင်နိုအက်စစ်တစ်မျိုးဖြစ်တဲ့ Leucine အဖြစ်ပြောင်းလဲဖြိုခွဲပါတယ်။ ရရှိလာတဲ့leucine ထဲကမှပမာဏအနည်းငယ်ကတော့ HMB အဖြစ်သို့ ထပ်ဆင့်ပြောင်းလဲပါတယ်။ တစ်နေ့ကို HMB ၀.၅ဂရမ်ခန့်သာ ခန္ဓာကိုယ်တွင်းမှာထုတ်လုပ်ပါတယ်။

•HMB ကိုဘယ်လိုအစားအစာတွေကနေရနိုင်လဲ?

HMB ကို ရေခူ၊ ပန်းဂေါ်ဖီ၊ ထောပတ်သီး၊ အသား၊ ကြက်ဥ၊ နွားနို့စတဲ့ ပရိုတင်းဓာတ်ကြွယ်ဝတဲ့ အစားအစာတွေကနေရနိုင်ပါတယ်။

•HMB ပမာဏတစ်နေ့ဘယ်လောက်လိုလဲ?

တစ်နေ့ကို ၃ ဂရမ်လောက်ရရှိဖို့လိုပါတယ်။ သို့ပေမယ့် အစားအစာကနေ HMB ၁.၅ဂရမ်ခန့်ရနိုင်ဖို့ အတွက်ဆိုရင်တောင် ကြက်ဥအလုံး ၅၀ခန့် စားသုံးနိုင်ဖို့လိုပါတယ်။ ပရိုတင်းပမာဏ အလွန်မြင့်မားတဲ့ အစားအစာတွေကို စားသုံးမှသာ ခန္ဓာကိုယ်မှ HMB ပမာဏအနည်းငယ်ကို ထုတ်လုပ်ရရှိနိုင်မှာဖြစ်ပါတယ်။ ဒါကြောင့် HMB ကိုလုံလောက်စွာရရှိနိုင်ဖို့ အစားအစာတွေအပြင် ပြင်ပမှဖြည့်စွက်စာများသောက်သုံးကြရတာဖြစ်ပါတယ်။

•HMB ကကြွက်သားဆုံးရှုံးမှုကို ဘယ်လိုကာကွယ်ပေးတာလဲ?

လူ့ခန္ဓာကိုယ်အတွင်းမှာရှိတဲ့ ကြွက်သားပရိုတင်းတွေဟာ နေ့စဥ်နဲ့အမျှ တည်ဆောက်ခြင်း၊ ဖြိုခွဲခံရခြင်းတို့ တစ်လှည့်စီဖြစ်ပေါ်နေတာဖြစ်ပါတယ်။ တည်ဆောက်တဲ့ပမာဏနဲ့ ဖြိုခွဲခံရတဲ့ပမာဏဟာ မျှတနေဖို့လိုပါတယ်။ လူတစ်ယောက်ဟာ အသက်အရွယ်ကြီးမြင့်လာရင်၊ ဖျားနာပြီးလှုပ်ရှားမှုနည်းလာရင် သို့မဟုတ် နာတာရှည်ရောဂါဖြစ်လာရင် ကြွက်သားပရိုတင်းဖြိုခွဲခံရတဲ့ပမာဏဟာ တည်ဆောက်တဲ့ပမာဏထက် သိသိသာသာပိုမိုများပြားလာပါတယ်။ ရလဒ်အနေနဲ့ ကြွက်သားအားနည်းပြီး ကောင်းစွာမလှုပ်ရှားနိုင်တာ၊ အမောမခံနိုင်တာ စတာတွေကြုံတွေ့လာရပါတယ်။ HMBကတော့ ကြွက်သားပရိုတင်းတည်ဆောက်ခြင်းကို အားပေးပြီး ဖြိုခွဲခြင်းကိုတားဆီးပေးခြင်းအားဖြင့် ကြွက်သားဆုံးရှုံးမှုမဖြစ်အောင် ကာကွယ်ပေးပါတယ်။

HMB ပမာဏလုံလောက်စွာပါဝင်တဲ့ဖြည့်စွက်စာသောက်သုံးခြင်းနဲ့အတူ နေ့စဥ်ကိုယ်လက်လှုပ်ရှားမှုပုံမှန်ပြုလုပ်ပေးပါက ကြွက်သားကျန်းမာကြံ့ခိုင်ရေးအတွက် များစွာအထောက်အကူပြုစေမှာဖြစ်ပါတယ်။