မျက်စိကို ကြည်လင်စေပြီး မျက်စိအားကောင်းစေသောအစားစာများ
“မျက်စိအဆုံး၊နားအရှုံး”၊ မျက်စိဟာ စိတ်ရဲ့ပြတင်းပေါက် စသဖြင့် မျက်စိရဲ့အရေးကြီးပုံကိုတင်စားပြောထားတာတွေရှိပါတယ်။
မျက်စိအမြင်မကောင်းတာ၊ချို့တဲ့တာတွေဖြစ်ပါက အာရုံငါးပါးထဲက တပါးကို ပြည့်ဝစွာခံစားနိုင်မည်မဟုတ်ပါ။
ဒါ့အပြင်နေ့စဉ်သွားလာလှုပ်ရှားရာမှာလည်း အခက်တွေ့နိုင်ပါတယ်။
ဒါကြောင့် အလွန်နူးညံ့ပြီး အလွန်အရေးပါတဲ့ မျက်စိကို သေချာစွာဂရုစိုက်ဖို့လိုပါတယ်။
မျက်စိကြည်လင်ပြီး မျက်စိအားကောင်းဖို့အတွက် လိုအပ်တဲ့အာဟာရဓါတ်တွေကို နေ့စဉ်စားသုံးပေးဖို့လိုပါတယ်။
လူငယ်ပိုင်းအရွယ်နဲ့လူလတ်ပိုင်းအရွယ်တွေမှာ ဆိုရင် ဂိမ်းဆော့များတာ၊စာဖတ်များတာ၊တီဗွီအကြည့်များတာ စတဲ့အကြောင်းတွေကြောင့် အဝေးမှုန်ခြင်းဖြစ်ပြီး မျက်စိအမြင်မကြည်လင်မှု ဖြစ်တာများပါတယ်။
အဝေးမှုန်ခြင်းကြောင့်မျက်စိအမြင်မကြည်လင်မှုခံစားနေရသော လူငယ်နဲ့လူလတ်ပိုင်းအရွယ်များအနေဖြင့် ဗီတာမင်အေ များများပါသော အစားအစာများကို များများစားပေးသင့်သည်။
အထူးသဖြင့် မုန်လာဥနီကို နေ့စဉ် သို့မဟုတ် မကြာခဏစားသုံးပေးဖို့လိုပါတယ်။
မုန်လာဥနီမှာ ကာဘိုဟိုက်ဒရိတ်၊ဆယ်လူလို့စ်၊ဗီတာမင်အေ၊ဘီ၊စီ၊ကယ်လ်ဆီယံဓါတ်၊သံဓါတ်၊ဘီတာကယ်ရိုတင်းဓါတ်တွေ ကြွယ်ဝစွာပါပါတယ်။
မုန်လာဥနီမှာ ကြွယ်ဝစွာပါတဲ့ ဘီတာကယ်ရိုတင်းဓါတ်ဟာ မျက်စိအမြင်အာရုံကြည်လင်ဖို့အတွက် များစွာအထောက်ကူပြုပါတယ်။ကြက်မျက်သင့်ရောဂါ ခံစားနေရသူတွေ၊ကွန်ပြူတာနဲ့အလုပ်လုပ်နေရတဲ့သူတွေဆိုရင် မုန်လာဥနီများများစားပေးသင့်ပါတယ်။
ဟင်းသီးဟင်းရွက်မကြိုက်သူများအနေနဲ့တော့ မုန်လာဥနီအစား ဝက်အသည်းကိုမကြာမကြာစားပေးနိုင်ပါတယ်။
ဝက်အသည်းမှာလည်း ဗီတာမင်အေ ကြွယ်ဝစွာပါတဲ့အတွက် မကြာမကြာစားပေးရင် မျက်စိအားကို ကောင်းစေနိုင်ပါတယ်။
ဝက်အသည်းရောမုန်လာဥနီရော မစားသူများဆိုရင်တော့ ငါးကြီးဆီကိုတနေ့တလုံးပုံမှန်သောက်နိုင်ပါတယ်။
အမြင်အာရုံကြည်လင်ပြီးအားကောင်းဖို့ရန် ဒါတွေအပြင် Vitamin C ပါဝင်တဲ့ အရည်ရွှမ်း အသီးအနှံတွေနဲ့ Vitamin E ပါဝင်တဲ့ မြေပဲစေ့၊သစ်ကြားသီး၊နေကြာစေ့၊နှမ်း အစရှိတဲ့အစေ့အဆံတွေကိုလည်း များများ စားသုံးပေးဖို့ လိုပါမယ်။
ဓာတ်တိုး ဆန့်ကျင် ဂုဏ်သတ္တိ ရှိတဲ့ ဗီတာမင်တွေဟာ အသက်အရွယ်ရချိန်မှာ ဖြစ်တတ်တဲ့ မျက်စိရောဂါတွေဖြစ်နှုန်းကို အတိုင်းအတာတခုထိလျော့ကျစေပါတယ်။
လတ်ဆတ်တဲ့ အသီးအနှံများ၊ဟင်းသီးဟင်းရွက်များ၊ ငါးတို့ကနေ ရရှိနိုင်တဲ့ ဗီတာမင်စီ၊ အေ၊ အီး၊ ဖောလစ်အက်စစ်၊ ဆီလီနီယမ်နဲ့ ဇင့်ဓာတ်တွေဟာ သင့်ရဲ့မျက်စိကျန်းမာရေးအတွက် ကောင်းစွာ အကျိုးပြုပါတယ်။
အသက်ရလာတဲ့အချိန်မှာတော့ သွေးတိုး၊ဆီးချို စတဲ့ရောဂါတွေဖြစ်လာပြီး သွေးကြောတွေမာလာကာ အနီးမှုန်လာတာများပါတယ်။
ဒါကြောင့်အသက်ကြီးလို့ အနီးမှုန်ဖြစ်ရင် သွေးတိုး၊ဆီးချိုစတဲ့ရောဂါတွေရှိမရှိစစ်ဆေးပြီး ရှိပါက ထိုရောဂါတွေကိုအဓိကထားကုသရပါမယ်။
အသက်ကြီးလာတဲ့အခါ သွေးကြောတွေမာလာတာ ဖြစ်နိုင်ခြေနည်းအောင် ကြွက်နားရွက်မှို၊တရုတ်နံနံ၊ကြက်သွန်မိတ်၊ရှောက်သီး စတဲ့အစားစာများကိုများများစားပေးသင့်ပါတယ်။
ဒါ့ပြင် ဆူးပန်းစေ့၊ဂန္ဓာမာပန်း၊ဒန်ကျွဲစေ့လိုအစေ့များအား ရေနွေးဖြင့်စိမ်ပြီးသောက်တာမျိုးလည်းလုပ်နိုင်ပါတယ်။
Dr သီတာနွယ်(အမရပူရ)
