လူသားတို့သည် အာရုံငါးပါးကို အသုံးပြုပြီးပြီး လောကကြီးနဲ့ပါတ်ဝန်းကျင်ရှိ အရာဝတ္ထုများကို ထိတွေ့ခံစား ရှင်သန်နေထိုင်ကြပါသည်။ ထိုအမြင်၊ အကြား၊ အနံ့၊ အရသာ၊ အထိအတွေ့ အာရုံများအနက် သက်ရှိ၊ သက်မဲ့ အရာဝတ္ထုများကို ကြည့်ရှုပြီး ဦးနှောက်မှမှတ်သား သင်ယူမှုပြုလုပ်ရန် အမြင်အာရုံသည် အရေးပါပါသည်။ မနက်အိပ်ယာနိုးထချိန်မှစ ညအိပ်ယာဝင်ချိန်ထိ အာရုံစူးစိုက် ကြည့်ရှုနေရသည့်အတွက် မျက်စိအားကောင်းပြီး အမြင်အာရုံ ကြည်လင်ပြတ်သားဖို့သည် အရေးကြီးပါသည်။
မျက်စိအားကောင်းပြီး အမြင်အာရုံ ကြည်လင်ပြတ်သားစေဖို့ အဓိကကျသည့် အချက်မှာ မိမိ၏ မျက်စိကျန်းမာရေးကို ပုံမှန်ဂရုစိုက် စစ်ဆေးခြင်းဖြစ်ပါသည်။ တစ်နှစ်လျှင် အနည်းဆုံးတစ်ကြိမ် မျက်စိကျန်းမာရေးကို ပုံမှန်စစ်ဆေးသင့်ပါသည်။ မျက်လုံးစစ်ဆေးမှုပြုပြီး မျက်မှန်နှင့် အခြားဆေးကုသမှုများ လိုအပ်ပါက မျက်စိအထူးကုဆရာဝန်နှင့် တိုင်ပင်ကုသသင့်ပါသည်။
မျက်စိအားကောင်းစေသော အစွမ်းသတ္တိပေးနိုင်သည့် ဗီတာမင်ဓါတ်ကြွယ်ဝသော အစားအစာများဖြစ်သည့် အစိမ်းရောင်၊ အဝါရောင် အသီးအရွက်များစားပေးခြင်း၊ အစာအာဟာရ သင့်တင့်မျှတအောင် စားပေးခြင်းတို့ ပြုလုပ်ပေးသင့်သည်။ အဝလွန်ခြင်းသည် မျက်လုံးရှိ သွေးကြောများကို ထိခိုက်စေနိုင်သဖြင့် ကိုယ်ခန္ဓာ အလေးချိန်ကိုလည်း မျှတအောင် ထိန်းညှိပေးသင့်ပါသည်။ ဆေးလိပ်သောက်သုံးမှုကြောင့် မျက်လုံးခြောက်သွေ့ခြင်း Dry Eye Syndrome မှ မျက်လုံးတိမ်စွဲခြင်းရောဂါထိ ဆက်စပ်လျက်ရှိသောကြောင့် ဆေးလိပ်ကိုရှောင်ကျဉ်သင့်သည်။
နေ့စဉ်အသုံးပြုနေသည့် မိုဘိုင်းဖုန်း၊ ကွန်ပြူတာ စသည့်အသုံးအဆောင် ပစ္စည်းများမှ ထုတ်လွှတ်သော အပြာရောင်အလင်းတန်းသည် digital eyestrain ခေါ် မျက်လုံးဒါဏ်ပိမှု ဖြစ်စေနိုင်ပါသည်။ ဖန်သားပြင်ကြည့်ရှုခြင်း (screen time) ဟာ မျက်လုံးကို အပြာရောင်အလင်းတန်း တိုက်ရိုက်ထိတွေ့မှုကြောင့် မျက်တောင်ခတ်နည်းခြင်း၊ မျက်လုံးခြောက်သွေ့ခြင်း၊ မျက်လုံးညောင်းညာပင်ပန်းခြင်းတို့မှစကာ အနီးမှုန်ခြင်း၊ အဝေးရှိ အရာဝတ္ထုများကို အာရုံစူးစိုက်ရန် ခက်ခဲခြင်း၊ အမြင်မှုန်ဝါးခြင်းနှင့် မျက်ကြည်လွှာထိခိုက်ခြင်းအထိ ဖြစ်စေနိုင်ပါတယ်။ ထို့ကြောင့် ဖန်သားပြင်ကို စူးစိုက်ကြည့်ရှုရသည့်အချိန် screen time ကို သတိထားသင့်ပါသည်။
ဖန်သားပြင်ကြည့်ရှုခြင်း screen time များခြင်းအတွက် မျက်လုံးကိုအနားပေးသည့် နည်းလမ်းတစ်ခုဖြစ်သည့် (20-20-20rule )မိနစ်၂၀ခန့် TV/ကွန်ပျူတာ/ဖုန်းအသုံးပြုပြီးတိုင်း ပေ၂၀ အကွာအဝေးခန့်မှ အစိမ်းရောင် အရာဝတ္ထုတစ်ခုခုကို စက္ကန့်၂၀ခန့်ကြည့်ပေးပြီး မျက်လုံးကိုအနားပေးသော သတိပေးချက်လေး လုပ်ထားပေးသင့်ပါသည်။မိုဘိုင်းဖုန်းနဲ့အခြားကိရိယာများတွင် screen time ကို သတိပေးချက် ထည့်ထားခြင်းတို့ ဆောင်ရွက်သင့်သည်။
ပူပြင်းသောနေရောင်ခြည်အောက်တွင် အချိန်ကြာမြင့်စွာနေရသူများတွင် ခရမ်းလွန်ရောင်ခြည်ဓါတ်ကြောင့် မျက်လုံးထိခိုက်ခြင်းနှင့် အမြင်အာရုံဆုံးရှုံးခြင်းတို့ ဖြစ်တတ်ပါသည်။ ထို့ကြောင့် နေပူထဲသို့ထွက်လျှင် ဦးထုပ်၊ UV ကာကွယ်မှုပါထီး၊ နေကာမျက်မှန်စသည့် အကာအကွယ်ပစ္စည်းများကို အသုံးပြုခြင်းဖြင့် မျက်လုံးကိုကာကွယ်သင့်သည်။
မျက်စိအမြင်အာရုံနှင့် ပါတ်သက်သည့် အချို့အခြေအနေများသည် အထက်ပါနည်းလမ်းများဖြင့် ပုံမှန်ကြည်လင်သောအမြင်အာရုံကို ပြန်မရရှိနိုင်ဘဲ မျက်စိပါဝါ၊ ဆလင်ဒါ ပါဝင်သည့် မျက်မှန်၊ မျက်ကပ်မှန်၊ ခွဲစိတ်ကုသမှုများ လိုအပ်နိုင်သောကြောင့် သက်ဆိုင်ရာအထူးကု မျက်စိဆရာဝန်နှင့် တိုင်ပင်ဆွေးနွေးကုသမှု ခံယူရန် လိုအပ်ပါသည်။
Author : Dr. Yee Mon
