လူတစ်ဦး၏တနေ့တာ အသားဓါတ် ပရိုတင်း (protein) လိုအပ်မှု ဘယ်လောက်ရှိလဲ သင်သိပါသလား?
လူတစ်ယောက်ရဲ့ တနေ့တာအသားဓါတ်လိုအပ်မှုဟာ မိမိ၏ခန္ဓာကိုယ်အလေးချိန်နှင့် မိမိစားသုံးတဲ့ ကယ်လိုရီပမာဏပေါ်မှာ မူတည်ပါတယ်။ အစားအစာနှင့်အာဟာရ အဖွဲ့အစည်းများ၏ recommended daily allowances (RDA) ခေါ် တစ်နေ့တာလိုအပ်မှုကိန်းညွှန်းအရ လူတစ်ဦး၏အလေးချိန်တစ်ပေါင်အတွက် ၀.၃၆ ဂရမ်ရှိသောအသားဓါတ် (သို့မဟုတ်) တစ်ကီလိုအလေးချိန်လျှင်၂.၂ဂရမ်အသားဓါတ်ပမာဏ စားသုံးသင့်ကြောင်း ဖော်ပြထားပါတယ်။ ထို့ကြောင့် ခန္ဓာကိုယ်အလေးချိန် ၁၄၀ ပေါင်ရှိသူတစ်ဦးသည် တစ်နေ့လျှင်အသားဓါတ် အနည်းဆုံး၅၀ဂရမ် စားသုံးပေးရန် လိုအပ်ပါတယ်။
အသားဓါတ်ဟာ ကျွန်ုပ်တို့ခန္ဓာကိုယ်၏ အသက်ရှင်ရပ်တည်နိုင်ရန် အဓိကကျသည့် ပုံမှန်ဇီဝကမ္မလုပ်ငန်းများနှင့် ကြွက်သား၊ အရိုး၊ အရွတ်၊ သွေး၊ အရေပြား၊ ဆံပင်ဖွဲ့စည်းမှုတို့မှာလည်း အခြေခံအာဟာရအနေနဲ့ ပါဝင်ပါတယ်။ ထို့ကြောင့်ကြွက်သားများကို အိမ်တစ်လုံးနဲ့တင်စားမယ်ဆိုလျှင် ပရိုတင်းအသားဓါတ်ဟာ ဖွဲ့စည်းထားတဲ့ အခြေခံအုတ်တွေပဲဖြစ်ပါတယ်။
ကြွက်သား muscles သန်မာခြင်းသည် ကြွက်သားထုထည်ကြီးပြီး သန်စွမ်းလှုပ်ရှားနိုင်ခြင်းကို ဆိုလိုပါသည်။ ကြွက်သားများသန်မာဖို့အတွက် အဓိကအရေးကြီးတဲ့ လိုအပ်ချက်၂ချက်မှာ မိမိစားသောက်သော အစားအစာနဲ့ ကိုယ်ခန္ဓာလေ့ကျင့်ခန်း လုပ်ဆောင်မှုတို့ဖြစ်ပါတယ်။ အစားအစာစားသုံးမှုတွင် လိုအပ်သော အသားဓာတ်ပါဝင်မှ ကြွက်သားများသန်မာမှုအတွက် ထောက်ပံ့ပေးနိုင်မှာဖြစ်ပါတယ်။
ကြက်ဥ၊ ဘဲဥစသောဥမျိုးမျိုး၊ ကုလားပဲ၊ ပဲပြား၊ တိုဖူး၊ စားတော်ပဲ၊ပဲပိစပ်၊ ပဲနီလေး၊ ပဲအမျိုးမျိုး၊ ကြက်သား၊ အမဲသား၊ ဆိတ်သား အသားအမျိုးမျိုး၊ ဂျုံ၊ မုယော၊ ကွေကာ၊ ဆန်စသည့်အနှံ(grains)၊ သီဟိုစေ့၊ ဗာဒံစေ့၊ အယ်လမွန်စေ့အစေ့အဆန်များ၊ နွားနို့၊ ဒိန်ချဉ်၊ နို့ထွက်ပစ္စည်းအမျိုးမျိုး၊ မြေပဲထောပါတ်၊အာဟာရဖြည့်စွက်စာများ ထောပါတ်သီး၊ မာလကာသီး၊ ငှက်ပျောသီး၊ ဘရိုကိုလီပန်းပွင့်စိမ်း စတဲ့အစားအစာတွေကတော့ အသားဓာတ်များစွာပါဝင်တဲ့ အစားအစာများဖြစ်ပါတယ်။
မိမိတို့စားသုံးသော အစားအစာမှအသားဓါတ် ပရိုတင်းများကို ခန္ဓာကိုယ်ထဲ၌ အမိုင်နိုအက်ဆစ်အဖြစ်ပြောင်းလဲပြီး ကြွက်သားများကို တည်ဆောက်ဖွဲ့စည်းပါသည်။ ပရိုတင်းဓါတ်များကို အသားမှရသောပရိုတင်းနှင့် အရွက်မှရသောပရိုတင်းဟုနှစ်မျိုး ခွဲခြားထားရာ ကြွက်သားဖွဲ့စည်းမှုကို အားပေးသောအမျိုးအစားမှာ အသားမှရသောပရိုတင်းဖြစ်ပါတယ်။ ဒါကြောင့် သတ်သတ်လွတ်စားသူများအနေနဲ့ အပင်မှရသောပရိုတင်းကို ပမာဏများများစားသုံးပေးသင့်ပါတယ်။
အမေရိကန် အားကစားနှင့်ဆက်စပ်ဆေးပညာကောလိပ် American College of Sports Medicine (ACSM)မှ ကြွက်သားသန်မာဖွံဖြိုးမှုဆိုင်ရာ သုတေသနလေ့လာချက်များမှ တစ်နေ့လျှင် အစားစားသောအကြိမ်ရေအနေနှင့် အိပ်ယာမဝင်မှီအပါ ၄ကြိမ်၅ကြိမ်ခန့်၊ တစ်ခါစားလျှင် ပရိုတင်းပမာဏ ၂၀မှ၄၀ဂရမ် ပါဝင်အောင်စားခြင်းက ကြွက်သားဖွဲ့စည်းမှုကို အားပေးကြောင်းတွေ့ရှိရပါတယ်။ ကြွက်သားသန်မာဖို့ တစ်နေ့လျှင် ၁.၂-၁.၇ဂရမ် ပရိုတင်းစားသုံးမှုနှင့် နည်းစနစ်မှန်ကန်သော ကိုယ်ခန္ဓာကြံ့ခိုင်မှုလေ့ကျင့်ခန်းတို့ လိုအပ်ကြောင်းဖော်ပြထားပါတယ်။ ထို့ကြောင့် ခန္ဓာကိုယ်ကြွက်သားတွေသန်မာဖို့ အရေးပါတဲ့ အသားဓါတ်ပရိုတင်းကို ပြည့်ဝမှန်ကန်စွာ စားသုံးနိုင်ဖို့ ဤဆောင်းပါးလေးဖြင့် Ondoctor စာဖတ်ပရိသတ်များကို မျှဝေပေးလိုက်ပါတယ်။
