ကိုယ်လက်လှုပ်ရှား လေ့ကျင့်ခန်း လုပ်ပြီးရင် လုပ်သင့်တဲ့ အရာများ

နေ့စဉ်နေ့တိုင်း ကိုယ်လက်လှုပ်ရှားမှုတွေပုံမှန်ပြုလုပ်နေပါလျက်နဲ့ ကိုယ်လိုချင်တဲ့ရလဒ်၊ ခန္ဓာကိုယ်အချိုးအစားမျိုးမရတာတွေကြုံဖူးကြမှာပါ။ ရလဒ်ကောင်းရဖို့အတွက် ကိုယ်လက်လှုပ်ရှားလေ့ကျင့်ခန်းလုပ်ပြီးချိန်မှာ ဘယ်လိုနေထိုင်၊ဘာတွေစားသောက်လိုက်လဲဆိုတဲ့အချက်ပေါ်လည်း အများကြီးမူတည်နေပါတယ်။ ဒါကြောင့် လေ့ကျင့်ခန်းလုပ်ပြီးချိန်မှာ အောက်ပါအချက်တွေကို လိုက်နာလုပ်ဆောင်သင့်ပါတယ်။

၁။ သွေးအေးလေ့ကျင့်ခန်းတွေပြုလုပ်ပေးပါ။

ပြင်းထန်တဲ့လေ့ကျင့်ခန်းတွေလုပ်ပြီးပြီးချင်း ချက်ချင်းရပ်လိုက်ရင် ခေါင်းမူးတာ၊ အလွန်မောပန်းတာမျိုးခံစားရတတ်ပါတယ်။ အားကစားလုပ်နေချိန်မှာ ခန္ဓာကိုယ်တွင်းအပူချိန်ဟာ မြင့်တက်နေလေ့ရှိပါတယ်။ လုပ်ဆောင်လိုက်တဲ့လေ့ကျင့်ခန်းတွေဟာ သွေးပူလေ့ကျင့်ခန်းဖြစ်ပါတယ်။ လေ့ကျင့်ခန်းလုပ်ပြီးချိန်မှာ ပုံမှန် ခန္ဓာကိုယ်အပူချိန်ပုံမှန်ပြန်ရောက်နိုင်အောင် လမ်းလျှောက်တာ၊ လွယ်ကူတဲ့လေ့ကျင့်ခန်းတွေကိုဖြေးဖြေးလေးလုပ်တာ စတဲ့ သွေးအေးစေမယ့်လေ့ကျင့်ခန်းတွေကို ပြုလုပ်ပေးရပါမယ်။

၂။ အကြောလျှော့၊ အကြောဆန့်ပါ။

အကြောလျှော့ခြင်းဟာ လေ့ကျင့်ခန်းပြုလုပ်ပြီးနောက် ခံစားရတတ်တဲ့ ကြွက်သားနာကျင်မှုတွေကို သိသိသာသာလျော့နည်းစေနိုင်ပါတယ်။ ထို့အပြင် ကိုယ်ဟန်အနေအထားကောင်းမွန်စေခြင်း၊ လှုပ်ရှားရလွယ်ကူခြင်း၊ ကြွက်သားများသက်တောင့်သက်သာဖြစ်စေခြင်းစတဲ့ကောင်းကျိုးများလည်း ရရှိနိုင်ပါတယ်။

၃။ ရေသောက်ပါ။

လေ့ကျင့်ခန်းလုပ်ချိန်မှာ ချွေးထွက်များတဲ့အတွက် ရေဓာတ်ဆုံးရှုံးမှုလည်း များပြားပါတယ်။ ဒါကြောင့် လေ့ကျင့်ခန်းလုပ်ပြီးချိန်မှာ ခန္ဓာကိုယ်တွင်း ရေဓာတ်ပြန်လည်ဖြည့်တင်းပေးဖို့ ရေ ၂ခွက်ခန့် အနည်းဆုံး

သောက်သုံးပေးသင့်ပါတယ်။ ကဖိန်းဓာတ်၊ အယ်လ်ကိုဟော၊ သကြားဓာတ်ပါဝင်မှုများပြားတဲ့ အအေးတွေဟာ ရေဓာတ်ခန်းခြောက်စေနိုင်လို့ ရှောင်ရှားရပါမယ်။

၄။ အဝတ်အစားတွေလဲဝတ်ပါ။

လေ့ကျင့်ခန်းလုပ်ပြီးပြီးချင်း အဝတ်အစားတွေမလဲဘဲ အလုပ်သွားလုပ်တာ၊ အပြင်ထွက်သွားတာမျိုးတွေ မလုပ်သင့်ပါ။ အဝတ်အစားလို့ဆိုရာမှာ အတွင်းခံအဝတ်ကအစ အားလုံးလဲဝတ်သင့်ပါတယ်။ လေ့ကျင့်ခန်းလုပ်ချိန်မှာ ချွေးထွက်များပါတယ်။ လေ့ကျင့်ခန်းလုပ်ပြီးချိန် အဝတ်အစားမှာကျန်နေတဲ့ အစိုဓါတ်တွေဟာ မှို၊ ဘက်တီးရီးယားပိုးမွှားတွေ ပေါက်လာဖို့ အားပေးတာဖြစ်လို့ အရေပြားပိုးဝင်တာတွေ ဖြစ်လာနိုင်ပါတယ်။ ဒါကြောင့် သန့်ရှင်းတဲ့ အဝတ်အစားလဲဝတ်ဖို့ကလည်း အရေးကြီးပါတယ်။

၅။ ရေအေးအေးနဲ့ ရေချိုးပါ။

ရေအေးအေးနဲ့ရေချိုးခြင်းဟာ လေ့ကျင့်ခန်းလုပ်ပြီးချိန်မှာ ဖြစ်တတ်တဲ့ ကြွက်သားရောင်ရမ်းနာကျင်တာတွေကို လျော့နည်းစေနိုင်ပါတယ်။ လေ့ကျင့်ခန်းလုပ်ပြီး နာရီဝက်ခန့်အတွင်း ချိုးနိုင်ရင်အကောင်းဆုံးဖြစ်ပါတယ်။

၆။ ကာဗွန်ဟိုက်ဒရိတ်(သို့) ပရိုတင်းဓါတ်ပါဝင်တဲ့ အစာများစားပေးပါ။

ကာဗွန်ဟိုက်ဒရိတ်စားသုံးခြင်းဟာ အားကစားလုပ်ခြင်းကြောင့် ကုန်ဆုံးသွားတဲ့ စွမ်းအင်တွေကို ပြန်လည်ဖြည့်တင်းပေးနိုင်ပါတယ်။ ပရိုတင်းဓာတ်ကတော့ ကြွက်သားပြန်လည်တည်ဆောက်ဖို့ရာအတွက် လုပ်ဆောင်ပေးပါတယ်။ ကာဗွန်ဟိုက်ဒရိတ်ပါဝင်မှုမြင့်မားတဲ့အစားအစာတွေကတော့ ကန်စွန်းဥ၊ ဂျုံပေါင်မုန့်၊ ဂျုံခေါက်ဆွဲ၊ ချောကလတ်နို့ တို့ဖြစ်ပါတယ်။ ပရိုတင်းဓာတ်မြင့်မားတာတွေက အသား၊ငါး၊ ကြက်ဥ၊ နို့၊ ချိစ်၊ ဒိန်ချဥ်တို့ဘဲဖြစ်ပါတယ်။

၇။ သင့်တော်မယ့်အားဖြည့်စာသောက်သုံးပါ။

သင့်တော်တဲ့ပမာဏပါဝင်တဲ့ ပရိုတင်း၊ HMB၊ Creatinine စတာတွေပါဝင်တဲ့အားဖြည့်စာတွေ သောက်သုံးပေးရင် ကြွက်သားတွေကြီးထွားဖို့အတွက် ပိုမိုလျင်မြန်သိသာစေနိုင်ပါတယ်။

လေ့ကျင့်ခန်းလုပ်ပြီးနောက် ကိုယ့်မှာအချိန်သိပ်မရလို့ အထက်ပါအချက်တွေအကုန်လိုက်မလုပ်နိုင်ရင်တောင် ကိုယ်တတ်နိုင်တဲ့ လွယ်ကူတာမျိုးလေးတွေတော့ ရွေးလုပ်စေချင်ပါတယ်။ သို့မှသာနေ့စဥ်နေ့တိုင်းစွမ်းအင်ပြည့်ဝစွာ ကိုယ်လက်လေ့ကျင့်ခန်းတွေထိထိရောက်ရောက်လုပ်ဆောင်နိုင်ပြီး ကျန်းမာတဲ့ခန္ဓာကိုယ်ပိုင်ဆိုင်ရရှိနိုင်မှာဖြစ်ပါတယ်။