ပထမတခါခွဲမွေးထားခဲ့ရင် ဒုတိယကလေး ဘယ်လိုမွေးမလဲ
အခုခေတ် ကိုယ်ဝန်သည်အမျိုးသမီးတွေ ကလေးမွေးတဲ့အခါ ခွဲမွေးဖို့ပြင်ဆင်ကြတာများတယ် ။ကလေးမွေးရတဲ့ နာကျင်တာကို မခံချင်ကြတာလည်း အကြောင်း တစ်ခုပေါ့။ တစ်ချို့ကျတော့လည်း ရိုးရိုးမွေးဖို့ပြင်ဆင်ထားရင်းနဲ့မှ အကြောင်းအမျိုးမျိုးကြောင့် ခွဲမွေးလိုက်ကြရတယ်။
ပထမကလေးကို ရိုးရိုးမွေးထားတယ်ဆိုရင် နောက်ထပ်ကလေး ယူတယ်ဆိုရင် ရိုးရိုးပဲမွေးမွေး ခွဲပဲမွေးမွေး ပြဿနာသိပ်မရှိတတ်ဘူး။ ဒါပေမယ့် ပထမကလေးကို အကြောင်းအမျိုးမျိုးကြောင့် ခွဲမွေးထားတာဆိုရင် နောက်ကလေးတွေမှာ ခွဲပဲမွေးရမလား ရိုးရိုးမွေးလို့ရလား စသဖြင့်တွေ စဉ်းစားလာရတယ်။
ကလေးပဲမွေးမွေး သားအိမ်မှာအလုံးဖြစ်လို့ တစ်ခုခုကြောင့်ပဲ ခွဲခွဲ တစ်ခါခွဲခံထားရတဲ့ သားအိမ်မှာ အမာရွတ်တော့ ဖြစ်သွားပါတယ်။ ဒီအမာရွတ်က သားအိမ်ကပုံမှန်အနေအထားဆိုရင်တော့ ဘာမှပြဿနာမပေးနိုင်ပေမယ့် ကိုယ်ဝန်ဆောင်ရတဲ့အခါ တစ်ဖြည်းဖြည်းလရင့်လာတာနဲ့အမျှ သားအိမ်ကအရွယ်အစားကြီးလာတာနဲ့အမျှ အမာရွတ်လည်း ဆွဲဆန့်ခံလိုက်ရသလို တစ်ဖြည်းဖြည်းပါးလာတတ်တယ်။ ပါးလာတဲ့ အမာရွတ်က ပြန်ကွဲထွက်တတ်တယ်။ ကလေးမွေးချိန်ရောက်မှမဟုတ်ပါဘူး။ တစ်ချို့တွေဆို အပတ် ၃၀ ၃၅လောက်နဲ့လည်း သားအိမ်ထဲက အမာရွတ် ကွဲထွက်လာတတ်တယ်။ အမာရွတ်ကွဲတယ်ဆိုတာ သားအိမ်ကွဲတာပါ။
သားအိမ်ကွဲတော့ဘာဖြစ်နိုင်လဲပေါ့။
သားအိမ်ကွဲတာက အသက်အန္တရာယ်ရှိပါတယ်။ ကိုယ်ဝန်သည်မှာ အမေရောကလေးရော အသက်စိုးရိမ်ရပါတယ်။ အမေမှာလည်း သားအိမ်ကွဲထွက်တာကြောင့် ရုတ်တရက်ကြီး ဗိုက်အောင့်တာဆီးစပ်ကိုက်တာတွေကနေ သွေးထွက်လွန်ပြီး သွေးပေါင်ကျတာ သတိလစ်မေ့မြောတာကနေ အသက်ကိုပါထိနိုင်ပါတယ်။ အထဲကကလေးဆိုရင်လည်း သားအိမ်ကွဲကွဲခြင်း ဆေးရုံဆေးခန်းရောက်လို့ ခွဲခန်းဝင်တယ်ဆိုရင်တောင် အသက်ရှင်ဖို့ နည်းပါတယ်။ လမစေ့သေးတဲ့ ကလေးတွေဆို ပိုဆိုးပါတယ်။
သားအိမ်ကွဲတယ်ဆိုတာလည်း အမာရွတ်အတိုင်းကွဲတာလည်းရှိနိုင်သလို သားအိမ်တစ်ခုလုံးမှာ ရစရာမရှိအောင်ကွဲနေတာလည်းဖြစ်နိုင်တယ်။ သားအိမ်ကွဲတာကို ခွဲခန်းဝင်တဲ့အခါ အခန့်မသင့်ရင် သားအိမ်တစ်ခုလုံးတောင် ထုတ်ပစ်လိုက်ရတတ်တယ်။ အမေရဲ့ အသက်ကိုတောင် မနည်းကယ်ရမှာပါ။ သွေးထွက်လွန်နေတာတွေကြောင့် သွေးလန့်တာတွေဖြစ်လာတတ်တယ်။
သားအိမ်ကွဲတာက ဘယ်သူတွေမှာ ဖြစ်တယ်လို့တော့ အတိအကျမပြောထားပါဘူး။ ဒါပေမယ့် အကြောင်းအမျိုးမျိုးကြောင့် သားအိမ်မှာခွဲထားတယ်ဆို ကိုယ်ဝန်ဆောင်တဲ့အခါ အရမ်းဂရုစိုက်ရပါတယ်။ လရင့်လာတာနဲ့ အမျှ အနေအထိုင်ပုံစံတွေ ပြင်ဆင်ရပါတယ်။ မွေးခါနီးဖြစ်လာလေလေ သားအိမ်ကြွက်သားတွေ လှုပ်ရှားတာတွေ ဖြစ်လာလေလေပါ။ ဒီလိုအခါတွေ ပိုဂရုစိုက်ရပါတယ်။
ကလေးကြီးတာတွေ ရေမြွှာပမာဏများတာတွေ အမြွှာကိုယ်ဝန်ဆောင်ထားတယ်ဆိုရင် ပိုဂရုစိုက်ရပါတယ်။ ကလေးမီးဖွားချိန်ဆို ပိုဆိုးပါတယ်။ သားအိမ်ခေါင်းပွင့်ဖို့ကလည်းကြာနေတုန်း သားအိမ်မှာလည်း လှုပ်ရှားမှုတွေများလာပြီး လူနာကလည်းတောက်လျှောက်ညှစ်တာနဲ့ သားအိမ်အမာရွတ်ကို ကွဲနိုင်စေတတ်ပါတယ်။
ဒါကြောင့် တစ်ချို့တွေမေးတတ်ကြတယ် ပထမကလေးကိုခွဲမွေးထားလို့ ဒုတိယကလေးကို ရိုးရိုးမွေးလို့ရလားဆိုပြီး မေးတတ်ကြတယ်။ ရိုးရိုးမွေးတာမရဘူးတော့မဟုတ်ဘူး။ ဒါပေမယ့် သားအိမ်မှာရှိတဲ့ အမာရွတ်ကကွဲထွက်မှာကိုတော့ ထည့်စဉ်းစားရတယ်။ လူတိုင်းဖြစ်တယ်လည်းမဟုတ်ဘူး။ ဖြစ်ချင်တယ်ဆို ဖြစ်တယ်။ အနေအထိုင်ပုံစံလည်းဆိုင်တယ်။ ခွဲထားတာကြာနေလည်း နှစ်နဲ့ ချီလည်းဖြစ်ချင်ဖြစ်တယ်။
ဘာပဲဖြစ်ဖြစ်တော့ ပထမတစ်ခါ သားအိမ်မှာခွဲထားဖူးတယ်ဆိုရင် ဒုတိယတစ်ကြိမ်ကိုယ်ဝန်ဆောင်တယ်ဆို သေချာဂရုစိုက်ပါ။ မွေးဖို့ကိုလည်း သားဖွားမီးယပ်ဆရာဝန်တွေ ပြထားပါ။ ဖြစ်နိုင်ရင် ဆေးရုံမှာပဲမွေးပါ ခွဲပဲမွေးမွေး ရိုးရိုးပဲမွေးမွေးပါ။
Author : Dr. CST
