fbpx

Download OnDoctor App on Google Play

Myanmar (Covid-19 Stats)

😷 12,425 Total Cases
😥 284 Deaths
😇 3,391 Recovered

သားအိမ်ပြင်ပ သန္ဓေတည်ခြင်းအကြောင်း

သားအိမ်ပြင်ပ သန္ဓေတည်ခြင်းအကြောင်း

သားအိမ်ပြင်ပသန္ဓေတည်ခြင်းကို ဆေးပညာအရ Ectopic Pregnancy လို့ခေါ်ပါတယ်။

သားအိမ်ပြင်ပ သန္ဓေတည်တယ်ဆိုတာဟာ

သုတ်ကောင်တကောင်နဲ့မမျိုးဥတလုံးပေါင်းစပ်ပြီး ဖြစ်လာတဲ့ သန္ဓေအောင်ဥ(Fertilized ovum)လေးက ပုံမှန်အားဖြင့် သားအိမ်မှာလာတွယ်ကပ်ပြီး သန္ဓေသားအဖြစ် ကြီးထွားရမယ့်အစား သားအိမ်မဟုတ်တဲ့ တခြားနေရာတွေမှာ သွားတွယ်ကပ်ပြီးကြီးထွားတာပါ။

သန္ဓေအောင်ဥလေး သွားတွယ်ကပ်နိုင်တဲ့ သားအိမ်မဟုတ်တဲ့ တခြားနေရာတွေကတော့ သားဥပြွန်(Fallopian tube)၊သားဥအိမ်(Ovary)၊သားအိမ်ခေါင်း(Cervix)၊ဝမ်းဗိုက်ခေါင်းအမြှေး(Peritoneum)၊အူ(Intestine)၊သားအိမ်နံရံကြွက်သား(Broad Ligament) စတဲ့ နေရာတွေပဲဖြစ်ပါတယ်။

သားအိမ်မဟုတ်တဲ့တခြားနေရာတွေထဲကမှ သန္ဓေအောင်ဥလေး သွားတွယ်ကပ်လေ့အရှိဆုံးနေရာကတော့ သားဥပြွန်ပါ။

သားအိမ်ပြင်ပသန္ဓေတည်ခြင်းရဲ့ ၉၀ရာခိုင်နှုန်းကျော်ဟာ သားဥပြွန်ထဲမှာ ဖြစ်လေ့ရှိပါတယ်။

လက္ခဏာအနေနဲ့ကတော့ ကိုယ်ဝန်ရှိသလိုပဲ ရာသီထိန်တာ၊ပျို့အန်တာ၊ရင်သားတင်းတာ မျိုးတွေဖြစ်နိုင်ပါတယ်။

ဒါ့အပြင် ဗိုက်နာတာ၊နာကျင်ကိုက်ခဲတာ၊ပုံမှန်မဟုတ်သွေးဆင်းတာတွေလည်းဖြစ်နိုင်ပါတယ်။

သားဥပြွန်ထဲမှာ သန္ဓေတည်တာက တဖြည်းဖြည်းကြီးလာလို့ရှိရင် သားဥပြွန်ကွဲထွက်တာဖြစ်နိုင်ပါတယ်။အဲ့အခါကျရင်တော့ သားဥပြွန်ထဲမှာရှိတဲ့အရည်၊သွေး၊သန္ဓေသား စတဲ့အရာတွေဟာ ဝမ်းတွင်းခေါင်းအမြှေးပါး(Peritoneum)ထဲရောက်သွားပြီး ဗိုက်မခံမရပ်နိုင်အောင်အောင့်တာနာတာ၊မိန်းမကိုယ်ကနေ သွေးမည်းညစ်တွေဆင်းတာ၊ချက်ချင်းရုတ်တရက်သတိလစ်တာ တွေဖြစ်နိုင်ပါတယ်။

ဒီလိုအခြေအနေဆိုရင်တော့ ဆေးခန်း၊ဆေးရုံ ချက်ချင်းသွားဖို့လိုပါတယ်။

သားအိမ်ပြင်ပမှာ သန္ဓေတည်လို့ရှိရင်အမေအတွက်အသက်အန္တရာယ်စိုးရိမ်ရတဲ့အပြင် ကလေးအဖတ်တင်လေ့လည်းမရှိပါဘူး။

ရှားရှားပါးပါးအနေနဲ့အူနံရံမှာ သန္ဓေတည်ပြီး ကလေးရော၊အမေပါအသက်ရှင်ခဲ့တဲ့ဖြစ်ရပ်တခုကိုတော့ တခါဖတ်ဖူးပါတယ်။ဒါပေမယ့် ဒါဟာ အင်မတန်ရှားပါတယ်။

သားအိမ်ပြင်ပမှာ သန္ဓေတည်ရတဲ့အကြောင်းရင်းအတိအကျကတော့ မသိသေးပါဘူး။

သုတေသနတွေအရတော့

ဆီးပိုးဝင်ရာကနေ သားဥပြွန်ရောင်ရမ်းဖူးတဲ့အမျိုးသမီးတွေ

သားဥပြွန်ကိုခွဲစိတ်မှု ပြုလုပ်ဖူးတဲ့အမျိုးသမီးတွေ

အရင်တခါက သားအိမ်ပြင်ပသန္ဓေတည်ဖူးတဲ့သူတွေ

သားအိမ်ထဲ သန္ဓေတားပစ္စည်းထည့်တဲ့သူတွေ

ဆေးလိပ်သောက်တဲ့အမျိုးသမီးတွေ မှာ ပိုဖြစ်နိုင်ခြေများတယ်လို့ပြောထားပါတယ်။

သားအိမ်ပြင်ပသန္ဓေတည်တာဟုတ်မဟုတ်စမ်းသပ်စစ်ဆေးမှုတွေအနေနဲ့ကတော့ ဆီးစစ်တာ၊သွေးစစ်တာ၊အာထရာဆောင်းရိုက်တာ၊ဗိုက်ကနေမှန်ပြောင်းကြည့်တာ စတဲ့စမ်းသပ်စစ်ဆေးမှုတွေလုပ်ကြည့်နိုင်ပါတယ်။

ကုသမှုအနေနဲ့ကတော့ ဖြစ်တဲ့နေရာရယ် ဖြစ်တာကိုသိတဲ့အချိန်စောတာ နောက်ကျတာပေါ်ရယ် လူနာပေါ်ရယ်မူတည်ပြီး ဆေးနဲ့ကုတာ၊ခွဲစိတ်ကုတာ၊မှန်ပြောင်းနဲ့ခွဲစိတ်ကုတာ စသဖြင့် အမျိုးမျိုးရှိပါတယ်။

အဆုံးသတ်အနေနဲ့မှာချင်တာကတော့ သားအိမ်ပြင်ပသန္ဓေတည်တာဟာ ကလေးရော မိခင်အတွက်ပါ အန္တရယ်များတဲ့အတွက် ကိုယ်ဝန်ရှိပြီဆိုကတည်းက သားအိမ်ပြင်ပသန္ဓေတည်လား ပုံမှန်သားအိမ်ထဲမှာတည်တာလား စောစောသိရအောင် အာထရာဆောင်းရိုက်ပါလို့ မှာချင်ပါတယ်။အာထရာဆောင်းဆိုတာက ကိုယ်ဝန် ငါးလပြည့်မှ ယောက်ျားလေး၊မိန်းကလေးသိဖို့အတွက်ပဲ ရိုက်ရတာမဟုတ်ပါဘူး။

Dr 528

ဆက်စပ် ဆောင်းပါးများ