fbpx

Download OnDoctor App on Google Play

Myanmar (Covid-19 Stats)

😷 12,425 Total Cases
😥 284 Deaths
😇 3,391 Recovered

ခဏခဏ မောမောနေတာ ဘာလို့လဲ

ခဏခဏ မောမောနေတာ ဘာလို့လဲ

မောပန်းနွမ်းနယ်ပြီး အားမရှိသလိုဖြစ်တာကို လူတိုင်းနီးပါးဖြစ်ဖူး ခံစားဖူးပါလိမ့်မယ်။မောပန်းနွမ်းနယ်တဲ့အခါမှာ လူရဲ့ဆုံးဖြတ်နိုင်စွမ်း၊ဆင်ခြင်နိုင်စွမ်းတွေကျဆင်းလာပါတယ်။မောပန်းနွမ်းနယ်မှုကြောင့်ဖြစ်လာနိုင်တဲ့နောက်ဆက်တွဲပြသာနာတွေအများကြီးရှိပါတယ်။(ဥပမာ အနေနဲ့ဆိုရင် ကားမောင်းရင်းနဲ့မောပန်းနွမ်းနယ်လို့ အိပ်ငိုက်သွားပါက ယဉ်မတော်တဆမှုတွေကိုဖြစ်စေနိုင်ပါတယ်။)မောပန်းနွယ်နယ်ခြင်းကိုဖြစ်စေနိုင်တဲ့အကြောင်းတွေကတော့ အများကြီးရှိပါတယ်။

အဲ့ဒါတွေကတော့

၁။အိပ်ရေးပျက်ခြင်း

ကိုယ်ရောစိတ်ပါစွမ်းဆောင်ရည်ကောင်းတဲ့အခြေအနေမှာရှိဖို့အတွက် အရွယ်ရောက်ပြီးသူတယောက်ဟာ တနေ့တာအိပ်ချိန် အနည်းဆုံး ၇နာရီရှိဖို့လိုပါတယ်။အိပ်ရေးပျက်တာ အိပ်ချိန်မလုံလောက်တာတွေဖြစ်လာရင် ရေရှည်မှာ မောပန်းနွမ်းနယ်တာ၊လုပ်ရည်ကိုင်ရည်ဆုံးဖြတ်နိုင်စွမ်းတွေကျဆင်းတာတွေ၊မတော်တဆယဉ်တိုက်မှုဖြစ်တာတွေ အပြင် အစားသောက်ပျက်လာတာ၊စိတ်ဓါတ်ကျလာတာ စတဲ့ကျန်းမာရေးပြသာနာတွေကိုပါဖြစ်စေနိုင်ပါတယ်။ဒါကြောင့်အိပ်ရေးဝအောင်အိပ်ဖို့အရေးကြီးပါတယ်။ညနက်တဲ့အထိ ဖုန်းသုံးတာ၊တီဗွီကြည့်တာ၊ဂိမ်းဆော့တာ တွေကိုရှောင်ပါ။

၂။အစားအသောက် စားသောက်ပုံမမှန်ခြင်း

အဆီ၊အဆိမ့်၊အငန် လွန်ကဲတဲ့အစားစာတွေကို များများစားခြင်း

အချိုဓါတ်ပါဝင်တဲ့အစားသောက်တွေကို စားသောက်တာများခြင်း

အသား၊ငါး၊ဟင်းသီးဟင်းရွက် တွေကို မျှတအောင်မစားခြင်း

မနက်စာမစားခြင်း

အစာစားချိန်မှာ အချိန်မှန်မစားခြင်း

တွေဟာလည်း မောပန်းနွမ်းနယ်မှုကိုဖြစ်စေနိုင်ပါတယ်။

ဒါကြောင့် တနေ့တာအစားသောက်စားသောက်ရာမှာ အဆီအဆိမ့်အငန်လျှော့ပြီး အသားငါး ဟင်းရွက် စုံလင်မျှတအောင်စားပါ။အစာစားချိန်မှန်အောင်စားပါလို့အကြံပေးချင်ပါတယ်။

၃။စိတ်ဖိစီးမှုတအားများခြင်း

အလုပ်အဆင်မပြေမှုကြောင့်၊မိသားစုပြသာနာတွေကြောင့် စတဲ့အကြောင်းရင်းတွေကြောင့်စိတ်ဖိစီးမှုတအားများနိုင်ပါတယ်။

စိတ်ထောင်းကိုယ်ကြေဆိုတဲ့စကားပုံအတိုင်း စိတ်ဖိစီးမှုတအားများလာရင် စိတ်ပင်ပန်းပြီး နေရထိုင်ရတာ မွန်းကြပ်ကာ မောပန်းနွမ်းနယ်သလိုခံစားရနိုင်ပါတယ်။

ဒါကြောင့်စိတ်ဖိစီးစရာများနေတယ်ဆိုရင် သူငယ်ချင်းတွေကိုရင်ဖွင့်တာ၊အပန်းဖြေခရီးထွက်တာ၊သီချင်းဆိုတာ စတဲ့စိတ်ဖြေဖျောက်နည်းတခုခုကိုလုပ်ဖို့လိုပါတယ်။

၄။အထိုင်များခြင်း

တနေကုန်နီးပါး ကွန်ပျူတာနဲ့အလုပ်လုပ်ရတာ၊စာရေးရတာ စတဲ့အထိုင်များတဲ့အလုပ်တွေလုပ်တာများပြီး ကိုယ်လက်လှုပ်ရှားမှုနည်းတဲ့အခါမှာ မောပန်းနွမ်းနယ်တာမျိုးခံစားရတတ်ပါတယ်။

ဒါကြောင့်ကိုယ်က ထိုင်ပြီးအလုပ်လုပ်ရတဲ့သူဆိုရင် အလုပ်ပြီးတဲ့ညနေပိုင်းတွေ၊အားလပ်ရက်တွေမှာ လမ်းလျှောက်တာ စက်ဘီးစီးတာစတဲ့ ကိုယ်လက်လှုပ်ရှားမှုတွေကိုလုပ်ဖို့လိုပါတယ်။

၅။ခန္ဓာကိုယ်ထဲကအရည်ဓါတ်လျော့နည်းခန်းခြောက်ခြင်း

ပူအိုက်တဲ့ရာသီဥတုမှာ ချွေးထွက်များတတ်ပါတယ်။အဲ့အခါကျ ထွက်တဲ့ချွေးတွေနဲ့အတူ ကိုယ်အတွင်းရှိရေနဲ့ဆားဓါတ်များဆုံးရှုံးသွားလို့ မောပန်းနွမ်းနယ်မှုကိုခံစားရနိုင်ပါတယ်။

ဒါကြောင့် နွေရာသီမှာ ချွေးထွက်များတဲ့သူတွေဆိုရင် ဓါတ်ဆားသောက်ပေးဖို့လိုပါတယ်။

၆။ရောဂါတွေကြောင့် မောပန်းနွမ်းနယ်ခြင်း

သွေးအားနည်းရောဂါ၊နှလုံးရောဂါ၊သိုင်းရွက်ဟော်မုန်းရောဂါ၊ဆီးချိုရောဂါ၊စိတ်ကျရောဂါ စတဲ့ရောဂါတွေကြောင့်လည်း မောပန်းနွမ်းနယ်ခြင်းကို ခံစားရနိုင်ပါတယ်။

ကိုယ်ကအစားသောက်လည်းမှန်မှန်စား၊အိပ်ရေးလည်းဝအောင်အိပ်၊စိတ်ဖိစီးစရာလည်းမရှိဘဲမောပန်းနွမ်းနယ်နေရင် သို့မဟုတ် မောပန်းနွမ်းနယ်တာက မကြာခဏရေရှည်ဖြစ်နေရင်တော့ ဆရာဝန်နဲ့ပြသပြီး စမ်းသပ်စစ်ဆေးကြည့်သင့်ပါတယ်။

Dr 528

ဆက်စပ် ဆောင်းပါးများ