အမျိုးသမီးတစ်ယောက်အတွက် အရေးကြီးတဲ့ ကျန်းမာခြင်းနှင့် လှပခြင်း

လှပခြင်းနဲ့ အမျိုးသမီးဆိုတာ ဒွန်တွဲနေတဲ့ အရာပါ။ မလှချင်တဲ့ အမျိုးသမီးရယ်လို့ မရှိဘူး မဟုတ်လား?

လှပဖို့အတွက် ဆိုရင် ကျန်းမာနေဖို့ကလည်း အရေးကြီးပြန်ပါတယ်။ မကြာခဏ ဖျားနာနေတဲ့သူ၊ နာတာရှည် ရောဂါဝေဒနာတွေ ခံစားနေရတဲ့သူတွေက ဘယ်လိုများ လှပနိုင်တော့ပါ့မလဲ။

မွေးရာပါရုပ်ရည်က လှမနေရင်တောင် စိတ်ကလေးကို ကြည်လင်နေအောင် ထားတဲ့အခါက မျက်နှာကို အကြည်ဓာတ်က လာရိုက်ခတ်ပြီး လှပနေနိုင်ပါတယ်။

စိတ်ကြည်လင်နေဖို့ကလည်း ကျန်းမာမှ ဖြစ်နိုင်မှာပါ။ ခန္ဓာကိုယ်က နာနေရင် စိတ်ကလည်း နာနေတတ်ပြီး မကြည်မလင် မရွှင်မပျ ဖြစ်နေကြတဲ့သူက များတယ်လေ။

အမျိုးသမီးတွေမှာ ကိုယ်၊ စိတ်နှစ်ပါးလုံး ကျန်းမာပြီး လှပဖို့အတွက် ဆိုရင် ဘာတွေ လိုအပ်သလဲ?

1. အာဟာရ

ခန္ဓာကိုယ်ထဲက အချိန်တိုင်း သေဆုံးနေတဲ့ ဆဲလ်တွေနေရာမှာ ဆဲလ်အသစ်တွေ ထပ်မံမွေးဖွားနိုင်ဖို့ အာဟာရဓာတ်တွေ လိုပါတယ်။ နှလုံးက ကောင်းကောင်းညှစ်နိုင်ဖို့၊ အောက်ဆီဂျင်တွေ သယ်ဆောင်ပြီး ခန္ဓာကိုယ်တခုလုံးကို ပို့ပေးဖို့၊ အစာခြေဖို့၊ အဆိပ်အတောက်နဲ့ မလိုအပ်တာတွေကို စွန့်ထုတ်ဖို့၊ ကိုယ်ခံအားကောင်းဖို့၊ ဟော်မုန်းတွေ ထုတ်လုပ်ဖို့၊ အရိုး၊ ကြွက်သားနဲ့ အရေပြားမှာ ဆဲလ်သစ်တွေ ဖြစ်လာဖို့၊ အာရုံကြော အားကောင်းပြီး မှတ်ဥာဏ်ကောင်းဖို့ စသဖြင့် ခန္ဓာကိုယ်ရဲ့ လုပ်ငန်းတွေ အဆင်ပြေနိုင်အောင် ဗိုက်တာမင်၊ သတ္တုဓာတ်၊ အဆီ၊ အသားဓာတ်၊ ကာဗိုဟိုက်ဒရိတ် ကစီဓာတ်၊ အမျှင်ဓာတ်နဲ့ ဓာတ်တိုးဆန့်ကျင်ပစ္စည်း antioxidants တွေ စုံလင်အောင် နေ့စဥ် စားပေးဖို့ လိုအပ်ပါတယ်။

2. ရေဓာတ်

ခန္ဓာကိုယ်ရဲ့ ၆၀% ခန့်ကို ရေဓာတ်နဲ့ ဖွဲ့စည်းထားပါတယ်။ ရေအသက် တစ်မနက် ဆိုတဲ့ စကားမှာ ရေမသောက်ရရင် တစ်မနက်တောင် အသက်ရှင်ဖို့ မလွယ်ဘူးလို့ ဆိုထားပါတယ်။ ခန္ဓာကိုယ်မှာ ရေဓာတ် ခန်းခြောက်နေတဲ့အခါ သွေးတွေ ပျစ်လာပြီး သွေးစီးဆင်းမှု မကောင်းတော့ဘဲ ဆဲလ်တွေဆီကို အောက်ဆီဂျင်နဲ့ အာဟာရတွေ လုံလောက်စွာ မပို့နိုင်တော့တာ၊ အသားအရေ ခြောက်သွေ့ပြီး အရေးအကြောင်းတွေ ပေါ်လာတာ၊ ဆံပင်နဲ့ ခြေသည်းလက်သည်းတွေ ကျိုးကြေလွယ်လာတာတွေ ဖြစ်နိုင်ပါတယ်။ ဒါကြောင့် တစ်နေ့ကို အနည်းဆုံး ရေ ၂ လီတာခန့် သောက်သင့်ပါတယ်။

3. ကိုယ်လက်လှုပ်ရှားမှု

လေ့ကျင့်ခန်း ပုံမှန်လုပ်ရင် သွေးလှည့်ပတ်မှု ကောင်းစေသလို အရိုးနဲ့ ကြွက်သားတွေကိုလည်း သန်မာစေပါတယ်။ ခန္ဓာကိုယ်ရဲ့ လုပ်ငန်းတွေကို ချောမွေ့စေပြီး ပျော်ရွှင်ခြင်းဟော်မုန်းတွေ ထွက်စေကာ ကိုယ်ရောစိတ်ပါ ကျန်းမာစေပါတယ်။

4. ပတ်ဝန်းကျင်ကောင်း

သူငယ်ချင်းတွေ၊ မိသားစုဝင်တွေနဲ့အတူ ရယ်မောပျော်ရွှင်ပြီး နားလည်မှုရှိတဲ့ ဘဝကို ပိုင်ဆိုင်ရတာကလည်း ပျော်ရွှင်ခြင်းဟော်မုန်းတွေကို ထွက်စေပြီး ကိုယ်ကျန်းမာရေး၊ စိတ်ကျန်းမာရေးကို အထောက်အကူပြုပါတယ်။

5. အကောင်းမြင်စိတ်

အကောင်းမြင်စိတ်ဆိုတာ ဘာမဆို အကောင်းမြင်ပြီး ကောင်းတဲ့ဘက်က ဆွဲတွေးရမယ်လို့ ဆိုလိုတာ မဟုတ်ပါဘူး။ ကိုယ့်မှာ ရှိတာတွေကို လက်ခံနိုင်မှုကို ဆိုလိုတာပါ။ သိန်းတစ်ထောင်ရှိတဲ့သူက သိန်းတစ်သောင်း ရှိချင်လို့ ပူလောင်စိတ်ဆင်းရဲနေချိန်မှာ သိန်းတစ်ရာပဲ ရှိတဲ့သူက ရောင့်ရဲပျော်ရွှင်နိုင်ရင် ပိုကျန်းမာမှာပဲ။ စိတ်ဖိစီး၊ စိတ်ဆင်းရဲနေတဲ့အခါ ခန္ဓာကိုယ်တွင်း ရောင်ရမ်းမှုတွေကို ဖြစ်စေတဲ့ cortisol ဟော်မုန်းတွေ ပိုမိုထွက်လာပြီး အိုမင်းရင့်ရော် လွယ်စေသလို နှလုံး၊ သွေးတိုး၊ ဆီးချိုနဲ့ ကင်ဆာရောဂါတွေကိုလည်း ဖြစ်စေနိုင်ပါတယ်။

အမျိုးသမီးတွေ အနေနဲ့ လှပချင်ရင် ကျန်းမာနေဖို့က အရေးအကြီးဆုံးပါ။ လှပမှုဟာ ဘဝမှာ အောင်မြင်မှုရဖို့ လက်နက်တစ်ခုလည်း ဖြစ်နိုင်ပါတယ်။ ဒါကြောင့် ကျန်းမာခြင်းရော လှပခြင်းရော ပြည့်စုံတဲ့ မိန်းကလေးတွေ ဖြစ်အောင် ကြိုးစားလိုက်ကြရအောင်။

Author: Dr.Yee Mon