ကိုယ်ဝန်လနုစဉ် သွေးဆင်းခြင်း

ကိုယ်ဝန်လနုစဉ်ဆိုတာ ကိုယ်ဝန်ဆောင်ပြီး ပထမ ၃လအတွင်းကို ဆိုလိုတာပါ ။ ထို ၃လအတွင်းသွေးဆင်းတာကို ကိုယ်ဝန်လနုစဉ် သွေးဆင်းခြင်းလို့ခေါ်ပါတယ်။ မိခင်လောင်းတွေအနေနဲ့ ထိုကာလအတွင်း သွေးဆင်းရင် ဘာတွေဆောင်ပြီး ဘာတွေ သတိထားရမလဲ ၊ ဘာတွေဖြစ်တတ်သလဲဆိုတာကို ဒီဆောင်းပါးလေးမှာ ဇီဝကအနေနဲ့ အကြံပေးထားပါတယ် ။

ကိုယ်ဝန်လနုစဉ် သွေးဆင်းတာကို ကိုယ်ဝန်ဆောင်အားလုံးရဲ့ ၂၀-၃၀ ရာခိုင်နှုန်းခန့် ဖြစ်တတ်ပါတယ် ။ ထိုအထဲမှာ သားပျက်သားလျော ဖြစ်နိုင်ခြေက ၃၀ရာခိုင်နှုန်းခန့် ရှိပါတယ်။ ကျန် ၇၀ ရာခိုင်နှုန်းလောက်က ပုံမှန်အတိုင်း ကိုယ်ဝန်ဆက်ဆောင်နိုင်ပါလိမ့်မယ်။ ၃ရာခိုင်နှုန်းခန့်ကတော့ သားအိမ်ပြင်ပ သန္ဓေတည်ခြင်း Ectopic pregnancy နဲ့လည်း တွဲနိုင်ပါသေးတယ် ။

ဘာကြောင့် ကိုယ်ဝန်လနုစဉ် သွေးဆင်းတတ်လဲ ဆိုရင်
(၁) Implantation bleeding သန္ဓေအောင်ပြီးနောက် သန္ဓေသား သားအိမ်ကို တွယ်ကပ်ရာတွင် သွေးဆင်းခြင်း
– ကျားသုတ်ပိုးနဲ့ မမျိုးဥတို့ သားဥပြွန်မှာ ပေါင်းစပ် သန္ဓေအောင်ပြီးနောက် သန္ဓေသားသည် ၎င်းရှင်သန်ကြီးထွားဖို့ရာ သားအိမ်မှာ တွယ်ကပ်ရပါတယ်။ ထိုသို့ တွယ်ကပ်ရာမှာ သွေးအနည်းငယ် ဆင်းလာနိုင်ပါတယ် ။အများအားဖြင့် သန္ဓေအောင်ပြီး ၆ ရက်ကနေ -၁၂ ရက်လောက်မှာ ဆင်းတတ်ပါတယ် ။ ခန့်မှန်းခြေအနေနဲ့ ရာသီလာတဲ့ရက်လောက်မှာပဲ ဆင်းတတ်ပါတယ်။ ဒါကြောင့်မို့ အမှတ်မှားတတ်ပါတယ်။ သွေးဆင်းရင်လည်း နာရီပိုင်းကနေ ရက်ပိုင်းလောက်ပဲ ကြာတတ်ပါတယ် ။

(၂) ကိုယ်ဝန်ဆောင်တွင် သားအိမ်ခေါင်း ပြောင်းလဲခြင်းကြောင့် သွေးဆင်းခြင်း
– ကိုယ်ဝန်ဆောင်များတွင် သားအိမ်ခေါင်းသည် ပိုမိုနူးညံ ပျော့ပြောင်းလာပါတယ်။ ဒါ့အပြင် သားအိမ်ခေါင်းဆီ သွေးသွားလာတာလည်း များလာပါတယ်။ ဒါ့ကြောင့် အမျိုးသားနဲ့ အတူနေမိ လိင်ဆက်ဆံမိက ၊ ဒါမှ မဟုတ် သားအိမ်ခေါင်း အချွဲစယူခြင်းများ လုပ်က သွေးဆင်းတတ်ပါတယ် ။

(၃) ကိုယ်ဝန်ဆောင်စဉ် မိန်းမကိုယ် မွေးလမ်းကြောင်းထဲ ပိုးဝင်ခြင်းကြောင့် သွေးဆင်းခြင်း
– ကိုယ်ဝန်ဆောင်စဉ် မိန်းမကိုယ် မွေးလမ်းကြောင်းထဲ ပိုးဝင်က သွေးဆင်းနိုင်သလို အဖြူဆင်းတာ မိန်းမကိုယ်ယားတာ ရောင်ရမ်းနာတာတွေပါ ဖြစ်တတ်ပါတယ်။ အထက်ပါ ၃ချက်သည် ဖြစ်လေ့ဖြစ်ထရှိတဲ့ အကြောင်းတရားတွေပါ။ အရမ်းစိုးရိမ်စရာ မလိုပါ။ အောက်မှာ ဆက်ပြောမယ့် အချက်တွေကိုတော့ သတိထားဖို့ လိုပါတယ်။ အောက်ပါအချက်များထဲက တစ်ခုခု ဖြစ်မယ်လို့ ယူဆရင် နီးစပ်ရာ ဆေးရုံ ၊ ဆေးခန်း အမြန်ပြဖို့ မမေ့ပါနဲ့ ။

(၄) သားပျက်သားလျောခြင်း Miscarriage
– သားပျက်သားလျောချင်မှန်း ဘယ်လိုသိနိုင်လဲ ဆိုရင် ရာသီထိန်မယ် ၊ ဗိုက်နာမယ် ၊ သွေးဆင်းမယ် ၊ တစ်ခါတလေ အသားစတွေပါ ဆင်းလာမယ် ။

(၅) သားအိမ်ပြင်ပ သန္ဓေတည်ခြင်း Ectopic Pregnancy
– ဘယ်လိုသိနိုင်သလဲဆိုရင် ရာသီထိန်မယ်(ကိုယ်ဝန်ရှိတယ်ပေါ့) ၊ ဗိုက်အရင်နာမယ် ၊ သွေးဆင်းမယ်။ ဘာကြောင့် အရေးကြီးသလဲ ဆိုရင် သားဥပြွန်မှာ သန္ဓေတည်တာမို့ အရမ်း ကြီးထွားလာချိန်မှာ ပေါက်ထွက်ကာ သွေးလန့်ခြင်း shock ရတတ်ပါတယ်။ ဘယ်သူတွေမှာ ပိုဖြစ်တတ်သလဲဆိုရင် တင်ပါးဆုံအတွင်း အင်္ဂါတွေ နာတာရှည် ရောင်ရမ်းနာဖြစ်ဖူးသူတွေ ၊ အရင်တုန်းကလည်း Ectopic pregnancy ဖြစ်ဖူးသူတွေ ၊ သားဥပြွန်ခွဲစိတ်ဖူးသူတွေ ၊ IUCD သုံးစွဲထားသူတွေပဲ ဖြစ်ပါတယ် ။

(၆) စပျစ်သီးသန္ဓေ Molar pregnancy
– ဘာဖြစ်တာလဲဆိုရင် ပုံမှန်ဆိုရင် သန္ဓေသားဖြစ်ရမယ့်အစား ပုံမမှန်တစ်သျူးများ သားအိမ်ထဲမှာ ကြီးထွားလာတာပါ။ ဘယ်လိုသိနိုင်သလဲဆိုရင် ရာသီထိန်မယ် ၊ ၁၂ ပတ်ကျော်လို့ ဗိုက်စမ်းတော့ သားအိမ်အမြင့်က ရှိသင့်တာထက် ပိုမြင့်နေမယ် ၊ ကလေး နှလုံးခုန်သံ မကြားရ ၊ အာထရာဆောင်းမှာ ပုံမမှန်တဲ့ တစ်သျှူးများသာတွေ့ ၊ သွေးထဲ ဆီးထဲမှာ Beta hCG ဆိုတဲ့ ဟော်မုန်းတွေ များနေမယ် ။ ဘာကြောင့် အရေးကြီးသလဲ ဆိုရင် တစ်ချိန်မှာ ကင်ဆာဖြစ်နိုင်ချေ ရှိတယ် ။

အထက်ပါအချက်တွေကို သတိထားကာ ကိုယ်ဝန်နုစဉ် သွေးဆင်းရင် ဘာတွေ လုပ်ရမလဲ ၊ ရှောင်ကြဉ်ရမလဲဆိုရင်
– ကိုယ်ဝန်လနုစဉ် လိင်မဆက်ဆံပါနဲ့ ။ ဒါမှမဟုတ် သွေးဆင်းနေစဉ် လိင်မဆက်ဆံပါနဲ့ ။
– ကိုယ်ဝန်လနုစဉ် မိန်းမကိုယ်သန့်ဆေးရည်များနဲ့ မလိုအပ်ဘဲ ဆေးကြောခြင်းများ ရှောင်ပါ။ Tampoon သုံးခြင်း ရှောင်ပါ ။
– သွေးဆင်းနေစဉ် အမျိုးသမီးသုံး လစဉ် ပစ္စည်းကို သုံးပါ ။ ပမာဏ ၊ အပျစ်အခဲ ခန့်မှန်းနိုင်ဖို့ပါ ။
– အလေးအပင်မခြင်းများ ရှောင်ပါ ။ နားနားနေနေ နေပါ ။
– အာဟာရမျှတစွာ စားပါ ။
– ရေများများသောက်ပါ ။
– ဆေးလိပ် ၊ ဘီယာ ၊ အရက်ရှောင်ပါ ။
– မလိုအပ်ဘဲ ဆေးဝါးများ မသောက်ပါနဲ့ ။

Author : ခေတ်သစ် ဇီဝက