မေမေတို့အိမ်မှာ သားငယ်သမီးငယ်လေးတွေ ထမင်းသိပ်မစားလို့ စိတ်ညစ်နေရင် ဒီနည်းလမ်းလေးတွေ သုံးကြည့်ပါ။
(၁) ကလေးတွေက စူးစမ်းချင်တဲ့စိတ် အရမ်းများတဲ့အတွက် သူတို့လေးတွေကို ကိုယ်တိုင် ထိတွေ့ကိုင်တွယ်စားခိုင်းပါ။ ဒါပေမယ့် ကိုင်စားမည့် လက်တွေ၊ ဇွန်းတွေကိုတော့ သန့်ရှင်းအောင် ဆေးကြောပေးဖို့တော့လိုပါမယ်။ ဒါမှလည်း ကလေးက ကိုယ့်အားကိုယ်ကိုးတတ်လာပြီး ပိုပြီးလည်း ထမင်းစားပိုဝင်တယ်လို့ သုတေသနတွေ့ရှိချက်များက ရေးသားထားပါတယ်။
(၂) ကလေးတွေ ထမင်းစားနေရင် ဘေးကနေ မေမေ၊ ဖေဖေတို့က သူစားနေတာ ဘာအသား၊ ဘာအရွက် အဲ့ဒါစားရင် သူ့အတွက် ဘယ်လိုအကျိုးရှိတယ်ဆိုတာလေးကို ပြောပြပေးခြင်းအားဖြင့် ကလေးတွေဟာ သူတို့အတွက် ဗဟုသုတ အသစ်အသစ်တွေ ရရှိစေတဲ့အပြင် မိသားစုနွေးထွေးမှုကိုပါ ခံစားရတဲ့အတွက် ထမင်းစားပိုဝင်ကြပါတယ်။
(၃) ကလေးတွေအတွက် ထမင်းပန်းကန်ပြင်တဲ့အခါမှာ သူတို့ ကုန်နိုင်မည့် ပမာဏကိုပဲ ထည့်ပေးသင့်ပါတယ်။ ဒူးလောက်တင်မှ ရင်လောက်ကျဆိုပြီး ကလေးစားနိုင်တဲ့ ပမာဏထက်အများကြီး ပန်းကန်ထဲထည့်ပေးလိုက်ရင် ကလေးတွေရဲ့ စိတ်ထဲမှာ ဒါသူတို့ မကုန်နိုင်လောက်ဘူးဆိုပြီး စစားကတည်းက စိတ်မပါ လက်မပါ ဖြစ်သွားတတ်ပါတယ်။ ဒါကြောင့် သူတို့ ကုန်နိုင်လောက်တဲ့ ပမာဏပဲ ထည့်ပေးခြင်းဟာ ကလေးငယ်တွေစိတ်ထဲ သူတို့ စားလို့ ဖြစ်နိုင်တယ်လို့ ယူဆကြတဲ့အတွက် သူတို့လေးတွေက ပိုပြီးတော့တောင် စားချင်စိတ် ဖြစ်လာတတ်ကြပါတယ်။
(၄) ကလေးတွေကို ပြင်ဆင် ချက်ပြုတ်ပေးတဲ့အခါမှာလည်း သူတို့ စိတ်ဝင်စားမည့် ပုံလေးတွေ ပုံဖော်ပြီးကျွေးတာ၊ အလှပုံလေးတွေ ပုံဖော်ပြီးကျွေးတာကလည်း ကလေးငယ်တွေကို အစာစားချင်စိတ် ဖြစ်ပေါ်စေပါတယ်။
(၅) နောက်ဆုံး အရေးကြီးတာတစ်ခုက ကလေးတွေက ဗိုက်ပြည့်သွားပြီ ဆက်မစားချင်တော့ဘူးလို့ ပြောနေချိန်မှာ မေမေတို့အနေနဲ့ အတင်းဇွတ်ကျွေးတာ၊ အမျိုးမျိုးကြိမ်းမောင်းပြီး ကျွေးတာမျိုးက အရမ်းမှားပါတယ်။ ကလေးတွေဟာ လူကြီးတွေနှင့် မတူတဲ့အချက်က သူတို့က အားနာစာ၊ နှမြောစာရယ်ဆိုပြီး ဗိုက်ပြည့်သွားလည်း ဆက်စားတာမျိုးမရှိတဲ့အတွက် သူတို့ ဗိုက်ဝနေတဲ့အချိန်မှာ စိတ်ချမ်းသာအောင် ဆက်မကျွေးပါနဲ့။ သေချာပါတယ် နည်းနည်းပဲ စားထားတဲ့ ကလေးက ခဏနေတာနဲ့ ဗိုက်ဆာတယ် တန်းပြောမှာပါ။ အဲ့လိုမျိုး သူတို့ ဗိုက်ဆာမှ ကျွေးကျွေးပေးတာမျိုးကလည်း ကလေးတွေကို စားဝင်စေပါတယ်။ ဘာကြောင့်လဲဆိုတော့ သူတို့စိတ်ထဲမှာ သူတို့ စားချင်သလောက်ပဲ စားလို့ရတယ်။ မကုန်ရင်လည်း အပြစ်ပေးတာ ဆူတာတွေ မရှိတော့ဘူးဆိုပြီး သူတို့စားချင်တဲ့အချိန်တိုင်း မေမေတို့ကိုပြောဖို့ ဝန်မလေးတော့တဲ့ အတွက်ကြောင့်ပါ။
ဒါကြောင့် အထက်ပါ ဖော်ပြထားတဲ့ ကလေးငယ်များ အစားစားချင်စိတ်ကို ဖြစ်စေတဲ့ စိတ်ပိုင်းဆိုင်ရာ နည်းလမ်းများကို အသုံးပြုပြီး ကလေးငယ်များ အစားကောင်းကောင်း စားအောင် ဖေဖေ၊ မေမေတို့ ကြိုးစားကြည့်ပါ။
လေးစားစွာဖြင့်
ဒေါက်တာ ညီညီကျော်
