မွေးကင်းစကလေးလေးတွေနဲ့ပတ်သက်ပြီး ဘိုးဘိုးဘွားဘွား၊ ဖေဖေမေမေတို့တွေ အများဆုံး ပြုလုပ်တတ်တဲ့ အစဉ်အလာယုံကြည်မှုအလွဲလေးတွေကို တွေ့ဖူးကြားဖူးကြမှာပါ။ ဒီအကြောင်းအရာတွေနဲ့အတူ သားသားမီးမီးလေးတို့ကို မှန်ကန်စွာပြုစုပျိုးထောင်ရမယ့် နည်းလမ်းလေးတွေ တစ်ခါတည်း ယှဥ်တွဲဖော်ပြပေး သွားပါမယ်။
၁။ ရေနဲ့ ဖြည့်စွက်စာ တိုက်ကျွေးခြင်း
ဒီခေါင်းစဥ်လေးကိုတော့ ကလေးဆရာဝန်တွေ သားဖွားမီးယပ်ဆရာဝန်တွေ အမြဲတမ်း ထပ်ခါထပ်ခါ မေမဖေဖေေ တို့ကိုမှာကြားနေကျဖြစ်မှာပါ။ မှာသလောက်လည်း အမှားတွေ အမြဲ လုပ်ဖြစ်တဲ့မွေးကင်းစကလေးလေးကိုမိခင်နို့ တစ်မျိုးတည်း မတိုက်ဘဲ ရေတိုက်တာတွေ၊ တခြားသောအစားအစာတွေ ကျွေးတာတွေ၊ ဘိုးဘိုးဘွားဘွားတို့က ရိုးရာဆေးတွေ၊ နနွင်းတွေ တိုက်တာတို့လုပ်ခြင်းဟာ အရမ်းကို အန္တာရယ်ရှိတဲ့ အပြုအမူတွေပဲ ဖြစ်ပါတယ်။
မိခင်နို့ရည်ဟာ ရေအပါအဝင် အာဟာရမျိုးစုံရယ် ရောဂါတွေကို ခုခံကာကွယ်ပေးတဲ့ အာနိသင်တွေရယ် အများကြီးပါဝင်ပါတယ်။မွေးစကနေ အနည်းဆုံး အသက် ၆ လအထိကို မိခင်နို့တစ်မျိုးတည်းသာ တိုက်ကျွေးသင့်ပါတယ်နော်။
ဒါကြောင့် ဆရာဝန်ညွှန်ကြားတဲ့ လိုအပ်သောဆေးဝါးများမှအပ မိမိတို့သားသားမီးမီးလေးတွေကို အသက် ၆ လအထိ မိခင်နို့တစ်မျိုးတည်း တိုက်ကျွေးသင့်ပါတယ်။
၂။ ဆံပင်သန်ဖို့ ခေါင်းရိတ်မယ်
မိမိတို့ကလေးလေးတွေကို ဆံပင်ပိုမို သန်စေချင်တာကြောင့်ရယ် မွေးဆံပင်ကိုရိတ်ရမယ်ဆိုတဲ့အယူအဆလွဲတွေရယ်ကြောင့် မွေးပြီးမကြာခင်မှာ ခေါင်းရိတ်ပေးတတ်ကြပါတယ်။ အဲဒီလိုရိတ်တဲ့အခါ အသုံးပြုတဲ့ဓားမသန့်ရှင်းတာကြောင့် ပိုးဝင်တတ်ခြင်း ၊ ငယ်ထိပ်မပိတ်သေးတဲ့အရွယ်ဖြစ်တဲ့အတွက်ဆံပင်အကာကွယ်မရှိတာကြောင့် နှာစေးတာ နာခေါင်းပိတ်တာ အအေးမိလွယ်တာ မျိုးတွေ ဖြစ်တတ်ပါတယ် ဒါကြောင့် ခေါင်းရိတ်တာမျိုးတွေ မလုပ်သင့်ဘဲ ဆံပင်လေးတွေ အရမ်းရှည်လာတာမျိုးဆို ညှပ်ပေးတာမျိုးတော့လုပ်ပေးလို့ရပါတယ်။
၃။ ချက်အတွင်းသို့ နနွင်းကဲ့သို့သော အမှုန့်မျိုးစုံထည့်ခြင်း
ဒီအကြောင်းရာလေးကလည်း ကလေးတွေမှာ မလိုအပ်ဘဲ အသက်ဆုံးရှုံးရတဲ့ အရေးကြီးတဲ့အကြောင်းရာလေးဖြစ်ပါတယ်နော်။ ထုံတမ်းအယူတွေအရ ဘိုးဘိုးဘွားဘွားတွေက နနွင်းတွေ တခြားသော ရိုးရာအမှုန့်မျိုးစုံကို ချက်မြန်မြန်ကြွေစေချင်တာရယ်ကျန်းမာရေးကောင်းစေချင်တဲ့ အယူအဆတွေရယ်ကြောင့် ချက်ထဲ ထည့်လေ့ရှိကြတယ်။
အရမ်းအန္တရာယ်များတဲ့သော အယူဆတွေပါနော်။ လုံးဝလုံးဝမလုပ်သင့်ပါဘူ။း အဲဒီလိုအမှုန့်တွေ ထည့်မိရင် ပိုးဝင်သွေးဆိပ်တက်တာ၊ အသားတွေဝါလာတာ မေးခိုင်ပိုးဝင်တာမျိုးတွေဖြစ်တတ်ပြီး စောစော သတိမထားမိဘဲ ဆရာဝန်နဲ့ သေသေချာချာကုသမှုကို အချိန်မီ မယူမိရင် အသက်ဆုံးရှုံးတဲ့အထိ ဖြစ်နိုင်ပါတယ်နော်။
၄။ မိခင်တွေ အစားအလွန်အကျွံရှောင်ခြင်း
ဆရာဝန်တွေ ခေါင်းအကိုက်ရဆုံး Topic တစ်ခုဖြစ်ပါတယ်။ ဘိုးဘိုးဘွားဘွားတို့အများစုက မေမေတို့ကို အစားအလွန်ရှောင်ခိုင်းကြတဲ့အယူအဆအလွဲတွေ အများကြီးတွေ့နေရပါတယ်။
နို့တိုက်မိခင်တွေ အစားစုံစားခြင်းက ကလေးဗိုက်နာတယ်၊ လေပွတယ်၊ နေမကောင်းဖြစ်စေတယ်ဆိုတဲ့ မှားယွင်းတဲ့အယူအဆတွေက အခုလို ခေတ်ကာလတွေအထိ မရှိသင့်တော့အယူအဆတွေပါ။ ကလေးလေးတွေရဲ့ ဦးနှောက်ဥာဏ်ရည်ဖွံ့ခြင်းတွေ၊ ရောဂါပိုးတွေ ကာကွယ်ပေးပြီး ကျန်းမာပျော်ရွှင်စွာ ကြီးပြင်းလာဖို့က မိခင်အစားမရှောင်ဘဲ စုံလင်စွာ စားသုံးခြင်းက အရမ်းအရေးကြီးတဲ့အချက်ပါ။
ဒါကြောင့် မေမေတို့အနေနဲ့ မသန့်ရှင်းတဲ့အစားအစာတွေရယ် အဆိပ်အတောက်ပါတဲ့ ပင်လယ်ငါးအဆန်းတချို့ရယ်ကလွဲလို့ ပုံမှန်မိမိစားနေကြအတိုင်း အကုန်အစုံ စားပေးကြပါလို့ဒီဆောင်းပါးလေးကနေ ဝေမျှချင်ပါတယ်။
၅။ ကာကွယ်ဆေးနဲ့ပတ်သက်တဲ့ အယူအဆအလွဲများ
တချို့မိဘတွေက ကာကွယ်ဆေးထိုးပေးရင် ကလေးတွေ ဖျားတတ်တယ်၊ ကာကွယ်ဆေးကြောင့်နေမကောင်းဖြစ်နိုင်တယ် စတဲ့အယူအဆ အလွဲအမှားတွေ ရှိနေတတ်ကြပါတယ်။
ကာကွယ်ဆေးထိုးနှံခြင်းဟာ သားသားမီးမီးလေး တွေပျော်ရွှင်ကျန်းမာစွာကြီးပြင်းလာဖို့အတွက်ဆိုရင် အင်မတန်အရေးပါပါတယ်။ကာကွယ်ဆေးထိုးနှံခြင်းမှာလည်း သားသားမီးမီးတို့ သူ့အချိန်သူ့အသက်နဲ့ လိုက်လျောညီထွေတဲ့ ကာကွယ်ဆေးတွေရရှိဖို့ကအရေးကြီးပါတယ်။ ဒါကြောင့် ထိုးရမယ့် ရက်လနှစ်တွေကို သေချာမမေ့မလျော့ထိုးသင့်ပါတယ်။
အပေါ်ကအချက်တွေအပြင် မွေးကင်းစကလေးငယ်လေးတွေကိုနမ်းရှုတ်ခြင်း လှုပ်ရမ်းချီကစားခြင်း စတာတွေ ၊ လက်သေချာမဆေးကြောဘဲ ကိုင်တွယ်တာတွေ ၊ ကလေးပတ်ချာလည်မှာ ဆေးလိပ်၊ ခြင်ဆေးစတာတွေသုံးစွဲခြင်းတွေကို ရှောင်ကြဥ်သင့်ပါတယ်နော်။
အခုပြောပြပေးသွားတဲ့ အချက်လေးတွေကို သေချာလေး လေ့လာမှတ်သားပေးထားပြီး ဖေဖေမေမေ ဘိုးဘိုးဘွားဘွားတို့ရဲ့မွေးကင်းစ သားသားမီးမီးတို့ကို အကောင်းဆုံးပြုစုပျိုးထောင်နိုင်ကြပါစေ။
Author: Dr. Phyu
