ရာသီအကူးအပြောင်းမှာ ကလေးတွေ ဖျားမှာ၊ ဝမ်းပျက်မှာ၊ နေမကောင်းဖြစ်မှာကို ကလေးရှိတဲ့ လူကြီးမိဘတိုင်း စိုးရိမ်တတ်ကြပါတယ်။ နွေရာသီအကုန် မိုးတွင်းဝင်စ ယခုလိုရာသီဥတုမှာ ကလေးတွေဟာ ကိုယ်ခံအားနည်းတတ်ပြီး ကျန်းမာရေးပြဿနာတွေ ကြုံရလေ့ရှိပါတယ်။ မိုးရာသီမှာ စိုစွတ်မှုများတာနဲ့အမျှ ပတ်ဝန်းကျင်ရှိ ဘက်တီးရီးယား၊ ဗိုင်းရပ်စ်နှင့် အခြားရောဂါပိုးမွှားများ ပိုပြီးခိုအောင်းပေါက်ဖွား လွယ်ပါတယ်။ မိုးဥတုအကူးအပြောင်းမှာ နေရောင်ခြည်နဲ့အလင်းရောင် ရရှိမှုနည်းတဲ့အတွက်ကြောင့်လည်းကောင်း၊ ကိုယ်ခံစွမ်းအားကောင်းအောင် လှုံ့ဆော်မှုနည်းတဲ့အတွက်ကြောင့်လည်းကောင်း အလွယ်တကူ အအေးမိဖျားနာတတ်ပါတယ်။ ရာသီတုပ်ကွေး ဗိုင်းရပ်စ်ပိုး ကူးစက်ခံရခြင်းကြောင့် ဖျားခြင်း၊ နှာစေး/နှာပိတ်၊ လည်ပင်းနာ၊ ချောင်းဆိုးခြင်း၊ ကိုယ်လက်နာကျင်ကိုက်ခဲခြင်းတို့ကို ခံစားရနိုင်ပါတယ်။
ကလေးတွေ မိုးရာသီမှာ အဖြစ်များပြီး စိုးရိမ်ရတဲ့ပြဿနာကတော့ ခြင်ကိုက်ခံရခြင်းကြောင့်ဖြစ်တဲ့ သွေးလွန်တုပ်ကွေးရောဂါပဲ ဖြစ်ပါတယ်။ အဖျားကြီးခြင်း၊ ပျို့အန်ခြင်း၊ ကြွက်သားအဆစ်များနှင့် မျက်လုံးအနောက်ဖက် နာကျင်ခြင်း၊ ပြင်းထန်စွာ ခေါင်းကိုက်ခြင်း၊ ခန္ဓာကိုယ်တွင် အနီစက်များထွက်ခြင်း စသည့်လက္ခဏာများ ခံစားရတတ်ပါတယ်။ အချိန်မှီ ကုသမှုမခံယူရင် ခန္ဓာကိုယ်တွင်း သွေးယိုခြင်း၊ သွေးလန့်ခြင်း shock ဖြစ်ခြင်းကဲ့သို့ အသက်အန္တရာယ် စိုးရိမ်ရတဲ့အထိ ပြင်းထန်နိုင်ပါတယ်။
မိုးရာသီတွင် စိုစွတ်မှုများပြီး ဘက်တီးရီးယားပိုးမွှား ပေါက်ဖွားမှုပိုများတဲ့အတွက် အစားအသောက်များတွင် ပိုးများအလွယ်တကူ ကပ်နိုင်ပြီး စားသုံးမိရင် ဝမ်းပျက်ဝမ်းလျှောရောဂါ၊ ကာလဝမ်းရောဂါ၊ အထက်လန်အောက်လျှော (gastroenteritis) နှင့် အူယောင်ငန်းဖျား တိုက်ဖွိုက် (Typhoid) ကဲ့သို့ ရောဂါများ ဖြစ်တတ်ပါတယ်။ ထို့ကြောင့် မိုးရာသီတွင် ကလေးများကို အပြင်စာမကျွေးဘဲ နေအိမ်တွင် သန့်ရှင်းလတ်ဆတ်စွာ ပြင်ဆင်ချက်ပြုတ်ထားသော အစားအစာများကိုသာ ကျွေးသင့်ပါတယ်။
မိုးရာသီတွင် စိုထိုင်းမှုကြောင့် မသန့်ရှင်းသော အစားအစာနှင့်ရေများမှတဆင့် ကူးစက်နိုင်တဲ့ ရောဂါတစ်မျိုးမှာ အသည်းရောင်အသားဝါအေ Hepatitis A ရောဂါ ဖြစ်ပါတယ်။ အစာအိမ်အူလမ်းကြောင်း မှတဆင့် ရောဂါပိုးကူးစက်ခံရရင် အစားအသောက်ပျက်ခြင်း၊ နုံးချိခြင်း၊ ဗိုက်အောင့်ခြင်း၊ ပျို့အန်ခြင်း၊ ဝမ်းလျှောခြင်း၊ အသားဝါခြင်း လက္ခဏာများနှင့် အသည်းယောင်ပြီး အသည်းအင်ဇိုင်းများ မြင့်တက်ခြင်းကို ခံစားရနိုင်ပါတယ်။
စိုထိုင်းဆများပြီး နေရောင်မရတဲ့မိုးရာသီမှာ အိမ်ခန်းအတွင်းနှင့် ပရိဘောဂ၊ ကလေးအသုံးအဆောင်၊ ကစားစရာများမှာ မှိုစွဲခြင်း၊ ရောဂါပိုးမွှားများ ခိုအောင်းခြင်းဖြစ်ပြီး ချောင်းဆိုးချွဲကျပ်ခြင်း၊ ရင်ကျပ်ရောဂါ အခံရှိသော ကလေးများ ရုတ်တရက် ရင်ကျပ်ခြင်းတို့ ဖြစ်တတ်ပါတယ်။ ရာသီအလိုက်ပွင့်သော ပန်းဝတ်မှုန်၊ ဝတ်ဆံများကြောင့်လည်း ဓာတ်မတည့်ချောင်းဆိုးရင်ကျပ် ခံစားရတတ်ပါတယ်။ ထို့ကြောင့် မှိုများကင်းစင်အောင် ပြုလုပ်ပေးခြင်း၊ စိုထိုင်းဆလျော့အောင် Dehumidifier အသုံးပြုပေးခြင်း၊ ပန်းပွင့်များဝတ်မှုန်များ တိုက်ရိုက်မထိတွေ့အောင် သတိထားသင့်ပါတယ်။
မိုးရာသီမှာ မသန့်ရှင်းသော ရေနှင့်ထိတွေ့မှုကြောင့် အဖြစ်များတဲ့ အရေပြားဆိုင်ရာ ပြဿနာတစ်ခုကတော့ အရေပြားဝဲရောဂါ scabies ပဲဖြစ်ပါတယ်။ မခံမရပ်နိုင်အောင် ယားယံခြင်း၊ ခန္ဓာကိုယ်၏ အခြားနေရာများသို့ ကူးစက်ပျံ့နှံခြင်း၊ အချင်းချင်းကူးစက်ခြင်း ဖြစ်တတ်သော အရေပြားရောဂါတစ်မျိုးဖြစ်ပါတယ်။
မိုးရာသီဝင်လာတာနဲ့ ကလေးတွေမှာ အဖြစ်များတဲ့ အထက်ပါကျန်းမာရေး ပြဿနာများကို ကာကွယ်နိုင်ရန် အာဟာရပြည့်ဝပြီး ကိုယ်ခံအားကောင်းစေတဲ့ အစားအစာများကျွေးခြင်း၊ သန့်ရှင်းလတ်ဆတ်အောင် ပြင်ဆင်ချက်ပြုတ်ကျွေးခြင်း၊ တစ်ကိုယ်ရေ သန့်ရှင်းရေး၊ နေအိမ်သန့်ရှင်းရေး ဂရုစိုက်ပေးခြင်း၊ လက်သေချာဆေးခြင်း၊ လူထူထပ်နေရာများရှောင်ကျဉ်ခြင်း၊ ကလေးနေမကောင်းရင် ကလေးအထူးကု၊ ဆရာဝန်နှင့် တိုင်ပင်ကုသမှု ခံယူသင့်ပါတယ်။
Author: Dr. Yee Mon
