ကလေးငယ်များ အာဟာရ ဖွံ့ဖြိုးရေးရဲ့အစ မှာ အာဟာရပြည့်ဝပြီး ကျန်းမာတဲ့မိခင်က ကိုယ်ဝန်ဆောင်တာ ကိုယ်အလေးချိန် မှန်မှန်တိုးလာတာကနေ စတင်တာပါပဲ။ ကလေးသူငယ်အာဟာရဟာ သန္ဓေသားကစပါတယ်။
မွေးစကလေးရဲ့ အလေးချိန်ဟာအနည်းဆုံးငါးပေါင်ခွဲတို့ နှစ်ကီလိုဂရမ်ခွဲ ရှိမှ ကိုယ်အလေးချိန်ပြည့်တယ်။ မွေးစမှ ကိုယ်အလေးချိန်ပြည့်မှ ကလေးကျန်းမာပြီး ပုံမှန်ကြီးထွားဖွံ့ဖြိုးမယ်။ ကိုယ်ဝန်ဆောင်မိခင်အာဟာရပြည့်ဝမှ ကလေးဟာ ကျန်းမာ ပြီး ပုံမှန်ကြီးထွား ဖွံ့ဖြိုးတယ်။ ကိုယ်အလေးချိန်ပြည့်တဲ့ ကလေးကို မွေးဖွားမယ်။ ကိုယ်ဝန်ဆောင်မိခင်ဟာ အာဟာရပြည့်ဝအောင် အစားပိုစားရမယ်။ သားငါး၊ သီးနှံ စုံအောင်စားရတယ်။ နို့သောက်ရမယ်။ ကိုယ်ဝန်ဆောင်စဉ် သွေးအားကောင်းစေဖို့ သံဓာတ်ဆေးပြား မှန်မှန်မှီဝဲရပါမယ်။
မိခင်နို့က အကောင်းဆုံးဖြစ်လို့ အသက်(၆)လအထိ မိခင်နို့က တိုက်ကျွေးဖို့ လိုပါတယ်။ မိခင်နို့ကိုမွေးပြီး နာရီဝက်အတွင်း တိုက်ရင်လဲ၊ မီးဖွားပြီး ပထမ တစ်ရက်၊ နှစ်ရက်မှာ ထွက်တဲ့နို့ရည်ကြည် (နို့ဦးရည်)ကိုတိုက်ဖြစ်အောင် တိုက်ရတယ်။ အာဟာရပြည့်ဝသလို၊ ရောဂါကာကွယ်ပေးနိုင်စွမ်းလည်းရှိပါတယ်။ ကလေးအသက် (၆)လအထိဘာမှမတိုက်ကျွေးရ။ မိခင်နို့သာတိုက်ကျွေးရမယ်။ အသက်(၆)လကစပြီး မိခင်နို့နှင့် ဖြည့်စွက်စာကျွေးရင်း၊ မိခင်နို့ကို အသက်နှစ်နှစ်ထိ တိုက်ကျွေးရမယ်။ နို့တိုက်မိခင်က အာဟာရပြည့်ဝအောင် အစာပိုစားရမယ်။ သားငါး သီးနံှစုံအောင် စားရပါမယ်။ နို့သောက်သင့်တယ်။
ကလေးအသက်(၆)လပြည့်ရင် မိခင်နို့နဲ့အတူ အခြားအစားအစာများ ဖြည့်စွက်ကျွေးဖို့ လိုအပ်တယ်။ ဆန်ပြုတ် (သို့) ထမင်းပျော့ပျော့စတင်ကျွေးနိုင်တယ်။ ဆီအနည်းငယ်ထည့်ပြီး ကျွေးရမယ်။
အသက်(၆)လကျော်ရင် ဥ၊ ငါး၊ အသည်းစတဲ့ ပျော့ပျောင်းတဲ့အစာများကစလို့ ပဲနှင့်အသားအမျိုးမျိုးကို နူးနပ်အောင် ချက်ပြီး ဟင်းထဲမှဟင်းရွက်များကို ကြေအောင်ချေလို့ တဖြည်းဖြည်း အကျင့်လုပ်ကာ ကျွေးနိုင် ပါတယ်။ ငှက်ပျောသီးမှည့်၊ သင်္ဘေသီးမှည့်၊ အသီးအနှံများကို လတ်လတ်ဆတ်ဆတ် ကျွေးသင့်ပါတယ်။ သားငါးသီးနှံစုံလင်အောင် ကျွေးမှအာဟာရဓာတ်များ စုံစုံလင်လင် ပြည့်ပြည့်၀၀ရနိုင်မယ်။ ကလေးကိုအစာကျွေးသူ တစ်ကိုယ်ရေသန့်ရှင်းမှုရှိစေဖို့၊ ကျွေးတဲ့အစာ၊ ပန်းကန်ခွက်ယောက်များ သန့်ရှင်းဖို့အရေးကြီးတယ်။
ကလေးသူငယ်များရဲ့ အာဟာရအခြေအနေကို မြှင့်တင်ပေးခြင်းပါ။ အနာဂတ်နိုင်ငံတော် တည်ထောင်ရေး အတွက် အုတ်မြစ်ချပေးခြင်းပဲဖြစ်တယ်။
သုံးနှစ်ကလေးများ ကိုယ်အလေးချိန်မှတ်တမ်းထားရှိရပါသည်။ ကလေးများ ကျန်းမာပြီး အာဟာရပြည့်ဝနေရင် ကိုယ်အလေးချိန် မှန်မှန်တိုးမယ်။ ကိုယ်အလေးချိန် မတိုးပဲ တန့်နေရင်(သို့)ကိုယ်အလေးချိန်လျော့သွားရင် ရောဂါ တစ်ခုခုခံစားနေရခြင်း (သို့) အာဟာရပြည့်ဝစွာ မစားသုံးရခြင်းတို့ကြောင့်ဖြင့်နိုင်ပါတယ်။ မွေးစမှ တစ်နှစ် အရွယ်ထိ တစ်လတစ်ကြိမ် ကိုယ်အလေးချိန်၊ ချိန်ပြီးမှတ်တမ်းတင်ထားရမယ်။ တစ်နှစ်မှသုံးနှစ်အရွယ်ထိ၊ သုံးလတစ်ကြိမ်ကိုယ် အလေးချိန်၊ ချိန်ပြီးမှတ်တမ်းတင် ထားရမယ်။ နီးစပ်ရာ ကျန်းမာရေးဌာန သားဖွားဆရာမ (သို့) အရန် သားဖွားဆရာမ ထံမှာ ကိုယ်အလေးချိန်ပြီး မှတ်တမ်းပြုလုပ်ထားရမယ်။
ကလေးငယ်ကိုဘယ်လို အစာကျွေးရမယ်ဆိုတာကို မေးမြန်းသင့်တယ်။ ငါးနှစ်အောက်ကလေးများက လူကြီးများလိုတစ်ကြိမ်တည်းနဲ့ အစာအများကြီး မစားနိုင်ကြဘူး။ လူကြီးတွေလိုတစ်နေ့မှာ နှစ်ကြိမ်စားရုံနဲ့ မလုံလောက်ဘူး။ တစ်နေ့ မှာ ထမင်းသုံးကြိမ်ကျွေးရမယ်။ အာဟာရပြည့်ဝတဲ့ မုန့်ပဲသရည်စာများ ခဏခဏ ကျွေးရမယ်။ ရေများများတိုက်ရမယ်။ အချိုရည်ဘူး မတိုက်သင့်ဘူး။
ကလေးနေမကောင်းဖြစ်နေရင်၊ အစာမကျွေးပဲမထားသင့်ဘူး။ အစာပျော့ပျော့ ကျွေးရမယ်။ အရည်များများ တိုက်ရမယ်။ မိခင်နို့ကိုဆက်ပြီး တိုက်ရမယ်။ အာဟာရ ပြည့်ဝမှ မြန်မြန်နာလန်ထမယ်။
ဝမ်းပျက်ဝမ်းလျှောဖြစ်နေစဉ် ဓာတ်ဆားရည်(သို့) ဆား၊သကြား၊ သောက်ရေ သန့်မှာဖျော်ပြီးတိုက်ရမယ်။ မိခင်နို့ကိုဆက်တိုက်ရမယ်။ ဆန်ပြုတ်၊ စွပ်ပြုတ် တိုက်ရမယ်။ အစာပျော့ပျော့ကျွေးရမယ်။
ကာကွယ်ဆေး (၆)မျိုးကို ကလေးမှာ အပြီးထိုးထားရမယ်။ ကူးစက်ရောဂါ တွေဖြစ်ရင် အာဟာရချို့တဲ့မယ်။ ကလေးကို အဆုတ်ရောဂါကာကွယ်ဆေး အသက် တစ်လခွဲမှာ ထိုးရမယ်။ (ဆုံဆို့၊ ကြက်ညှာ၊ မေးခိုင်၊အသည်းရောင်(ဃ)၊ ဦးနှောက် အမြှေးရောင် ကာကွယ်ဆေးကို ကလေးအသက်(၉)လပြည့်ရင် ထိုးနှံပေးရမယ်။
(၂၀၁၄)ခုနှစ်ကျောင်းများမှာ ဝက်သက်နှင့် ဂျိုင့်သိုးကာကွယ်ဆေးများ ထိုးနှံခဲ့ကြတာ မှတ်မိကြလိမ့်မယ်။ လိုအပ်ရင်၊ လိုအပ်တဲ့ကာကွယ်ဆေးများ ထိုးနှံ ထားဖို့ လိုအပ်ပါတယ်။ ပိုလီယိုအကြောဆေး ကာကွယ်ဆေးကို အချိန်မှန်အကြိမ်ပြည့် (ကလေးနှစ်လ၊ လေးလနှင့် ခြောက်လသား) အရွယ်မှာသုံးကြိမ် တိုက်ကျွေးရမယ်။ (က) အင်အားဖြစ်ထွန်းစေတဲ့အစာများ။ ။ ကစီဓာတ်ပိုများသော အစာများနှင့် အဆီဓာတ်များ ပါဝင်တယ်။ ကစီဓာတ်ကို ဆန်စပါး၊ ဂျုံ၊ ပြောင်း၊ လူး၊ ဆပ် တို့က ရရှိပြီး၊ မပြည့်ဝဆီကို မြေပဲဆီ၊ နှမ်းဆီ၊ နေကြာဆီပြည့်ဝဆီကို ဝက်ဆီ၊ ဆီအုန်းတို့က တဆင့်ရရှိတယ်။ အဆီဓာတ်ဟာ ကစီထက် ဝန်ကျဉ်းပြီးအရေးပါတယ်။
(ခ) ခန္ဓာကိုယ်ကြီးထွားသောအစာအုပ်စု ။ ။ ခန္ဓာကိုယ်က တပ်စဉ်တည်ဆောက် ထားရာကလာသည်မှာအသားဓာတ်အများဆုံးပါတယ်။ ပထမတန်းစား ပရိုတိန်း (အသားဓာတ်) ကိုဝက်သား၊ အမဲသား၊ ငါး၊ ကြက်သား၊ ဆိတ်သားတို့မှရရှိတယ်။ ဒုတိယတန်းစား ပရိုတိန်းကို ပဲအမျိုးမျိုးကရရှိတယ်။ အသားဓာတ် ၁ ဂရမ်ဟာ၊ ကစီဓာတ်နှင့်အညီပင် ၄ ကယ်လိုရီ အင်အား ဖြစ်စေပါတယ်။
၁။ ရောဂါကိုကာကွယ်တဲ့အုပ်စု (က) စိမ်းလန်းတဲ့ဟင်းရွက်များ၊ ကန်စွန်းရွက်၊ ဟင်းနုနွယ်၊ မြင်းခွာ၊
၂။ အခြားဟင်းသီးဟင်းရွက်များအုပ်စု ခရမ်းချဉ်သီး၊ ရုံးပတီသီး၊ ခရမ်းသီး၊ သခွားသီး၊ ပါဝင်တယ်။
၃။ သစ်သီးများအုပ်စုမှာ ငှက်ပျောသီး၊ ပိန်းနဲသီး၊ မာလကာသီး၊ သရက်သီး၊ သင်္ဘောသီး၊ ပန်းသီးပါဝင်သော ဟင်းသီးဟင်းရွက်များမှာ အစာမချေဖျက်နိုင်တ အမျှင်များ ပါဝင်နေရာ ဝမ်းဖောဝမ်းရောင်သွားခြင်း၊ ဝမ်းမှန်ခြင်းစတဲ့ ကောင်းကျိုးများ အပြင် ဗီတာမင်နှင့် သက်စောင့်ဓာတ်များ ပါဝင်လို့ မျှတစွာကျွေးသင့်တယ်။
Author: Dr.လွင်သန့်
