မိုးရာသီမှာ အအေးမိတာ၊ ချောင်းဆိုးရင်ကျပ်တာအပြင် လူအများစုဟာ မိုးမိပြီးရင် အရိုးအဆစ်တွေ ကိုက်ခဲတတ်ကြပါတယ်။ မိုး ရွာ/မရွာကို အရိုးအဆစ်နာရောဂါရှိသူတွေက မိုးလေဝသပညာရှင်တွေထက် ပိုခန့်မှန်းနိုင်ကြတယ်လို့တောင် အချို့က ဆိုကြလေ့ရှိပါတယ်။ သုတေသနလေ့လာချက်များက မိုးမိခြင်းဟာ အရိုးအဆစ်တွေအပေါ် သက်ရောက်မှု တိတိကျကျမရှိဟု ဖော်ပြကြသော်လည်း လူအများစုက မိုးမိပြီးတဲ့အခါ အရိုးအဆစ်တွေ ကိုက်ခဲတာ ခံစားရလေ့ရှိပါတယ်။
မိုးရာသီလို အေးမြစိုစွတ်တဲ့ရာသီဥတုကို ပြောင်းတဲ့အခါ barometric pressure ခေါ် လေထုဖိအား၊ လေထုစိုထိုင်းဆ humidity နှင့် အပူချိန် စသည်တို့ ပြောင်းလဲမှုကြောင့် အရိုးအဆစ်ကိုက်ခဲခြင်းဖြစ်တာလို့ သုတေသနပညာရှင်များက ယူဆကြပါတယ်။ ခန္ဓာကိုယ်ရှိ အရိုးနုများပျက်စီးပြီး အရိုးအဆစ်ရောင်ရောဂါ arthritis ရနေသူများတွင် barometric pressure ပြောင်းလဲမှုကို အာရုံကြောများက ပိုခံစားသိရှိသဖြင့် အရိုးအဆစ်ကိုက်ခဲခြင်း ပိုခံစားရခြင်းဖြစ်နိုင်သလို အေးသောအချိန်တွင် အရွတ်၊ ကြွက်သား၊ အမာရွတ်စသည်တို့ ကျုံ့ဆန့်ခြင်းဖြစ်ပြီး နာကျင်ခြင်းကို ခံစားရနိုင်ပါတယ်။ အရိုးအဆစ်ကြားရှိ အရည်များသည် အပူချိန်ကျလာသည်နှင့် ပိုပျစ်လာပြီး အဆစ်များတောင့်တင်းကာ နာကျင်ကိုက်ခဲတတ်ပါတယ်။
အထူးသဖြင့် အသက်(၄၀) ကျော်လာလျှင် အရိုးအဆစ်ကိုက်ခဲနာကျင်မှု ပြဿနာ ပိုကြုံလာရနိုင်ပါတယ်။ မိုးရွာတဲ့အခါ၊ မိုးမိတဲ့အခါ အရိုးအဆစ်တွေ ကိုက်ခဲခြင်းမခံရအောင် နွေးနွေးထွေးထွေး နေသင့်ပါတယ်။ မိုးကာဝတ်ခြင်း၊ အနွေးထည်ဝတ်ဆင်ခြင်း၊ ရေနွေးဖြင့်ရေချိုးခြင်း၊ စောင်ခြုံအိပ်ခြင်း၊ အပူပေးကိရိယာအသုံးပြုခြင်း၊ ကိုက်ခဲသည့်နေရာ ရေနွေးအိတ်ကပ်ပေးခြင်း၊ အကိုက်အခဲ နာကျင်မှုသက်သာစေမယ့် လိမ်းဆေးလိမ်းပေးခြင်းတို့ ပြုလုပ်ပေးနိုင်ပါတယ်။
နေ့စဉ်စားသောက်မှုပုံစံတွင် နွားနို့ပုံမှန်သောက်ပေးခြင်း၊ ကြက်ဥအကာစားပေးခြင်း၊ အရိုးအဆစ်နာကျင်မှု လျော့စေတဲ့ curcumin ဓာတ်ပါသော နနွင်း စားသုံးပေးခြင်း၊ အစိမ်းရောင်အသီးအရွက်များ၊ အစေ့အဆန်များ၊ ငါးသေးသေးလေးများ၊ ကယ်လ်ဆီယမ် Calcium၊ ဖော့စဖိုရပ်စ် Phosphorus၊ မဂ္ဂနီဆီယမ်ဓာတ် Magnesium ကြွယ်ဝသော အစားအစာများကို ပုံမှန်စားပေးခြင်းဖြင့် အရိုးအဆစ်ကို အားဖြည့်ပေးနိုင်ပါတယ်။ မိုးရာသီတွင် အရိုးအဆစ်ကိုက်ခဲစေမယ့် ယူရစ်အက်ဆစ်ဓာတ် တက်စေတဲ့ အစားအစာများဖြစ်သော မှို၊ မျှစ်၊ အရက်၊ ဘီယာ၊ ကလီစာများကို တတ်နိုင်သမျှ ရှောင်ကျဉ်သင့်ပါတယ်။
ခန္ဓာကိုယ်အလေးချိန် များရင်လည်း အရိုးအဆစ်များ ဒဏ်ဖြစ်ပြီး ကိုက်ခဲနာကျင်မှု ပိုဖြစ်နိုင်တဲ့အတွက် သင့်တင့်သော ကိုယ်အလေးချိန်ကို ထိန်းထားသင့်ပါတယ်။ အရိုးအဆစ်များ ဒဏ်မဖြစ်စေတဲ့ ကိုယ်လက်လှုပ်ရှားမှုများဖြစ်သော ခန္ဓာကိုယ် အစိတ်အပိုင်းများ ဆန့်ထုတ် အကြောလျှော့ခြင်း Stretching၊ Yoga ယောဂကျင့်ခြင်း၊ တိုက်ချိ Taichi ကစားခြင်း၊ ရေကူးခြင်းတို့ကို ပုံမှန်ပြုလုပ်ပေးခြင်းဟာ အရိုးအဆစ်ကိုက်ခဲမှု သက်သာဖို့ အရေးပါပါတယ်။ လေ့ကျင့်ခန်းမပြုလုပ်ခင်နှင့် ပြုလုပ်ပြီးတိုင်း အကြောလျှော့ လေ့ကျင့်ခန်းများကိုလည်း လုပ်ပေးသင့်ပါတယ်။
မိုးရာသီမှာ မိုးမိပြီး အရိုးအဆစ်ကိုက်ခဲမှု မဖြစ်ရအောင် မိုးမမိအောင် ဂရုစိုက်ခြင်း၊ အထက်ပါ စားသောက်နေထိုင်မှုပုံစံများ ပြောင်းလဲပြီး ကာကွယ်နိုင်သကဲ့သို့ အရိုးအဆစ်ကိုက်ခဲမှု ခံစားရရင်လည်း အကိုက်အခဲပျောက် လိမ်းဆေး၊ သောက်ဆေးများ အသုံးပြုခြင်း၊ အရိုးအဆစ်ဖြည့်စွက် အားဆေးအာဟာရများ မှီဝဲခြင်း၊ လေ့ကျင့်ခန်းကုသမှု ခံယူခြင်း၊ ဖယောင်းအပူပေး ကုသမှုခံယူခြင်းတို့ကို ဆရာဝန်နှင့်တိုင်ပင် ကုသမှုခံယူပြီး သက်သာပျောက်ကင်းနိုင်ပါတယ်။
Author: Dr. Yee Mon
