ကိုယ်ဝန်ရှိကြောင်းကို အလွယ်တကူဝယ်နိုင်တဲ့ ကိုယ်ဝန်စစ်တဲ့ကိရိယာလေးတွေနဲ့ဖြစ်ဖြစ် ၊ Ultrasound ရိုက်ပြီးတော့ပဲဖြစ်ဖြစ် အတည်ပြုလို့ရပါတယ်။ အဲ့သလို အတည်မပြုထားနိုင်ခင်မှာ ခုဖော်ပြပေးမဲ့လက္ခဏာတွေ တွေ့နေဖြစ်နေရင်လည်း ကိုယ်ဝန်ရှိနေတာဖြစ်နိုင်ကြောင်း သံသယဝင်လို့ရပါတယ်။
နောက်ဆုံးရာသီလာခဲ့တဲ့ ပထမရက်ကနေစပြီး တစ်ပတ်ကို ကိုယ်ဝန်ပထမပတ်လို့ သတ်မှတ်ပါတယ် ။ ခန့်မှန့်မွေးမယ့်ရက်ကိုလည်း အဲ့ဒီရက်ကနေမှ တွက်ချက်ပြီး အဖြေထုတ်တာဖြစ်ပါတယ် ။ ကိုယ်ဝန်အပတ်အလိုက် ဖြစ်ပေါ်လာတဲ့ လက္ခဏာတွေက မတူပါဘူး ။ ဖြစ်ပေါ်လေ့ရှိတဲ့ လက္ခဏာတွေကို ဖော်ပြပေးလိုက်ရပါတယ် ။
– ၁ပတ်ကနေ ၄ပတ်ကြား လက္ခဏာများ
သားအိမ်က အနည်းငယ်ကိုက်တတ်ပြီး သွေးနည်းနည်း ဆင်းတတ်ပါတယ် ။ ဘာကြောင့်လဲဆိုတော့ သားအိမ်ရဲ့နံရံကို သန္ဓေသားဖြစ်လာမဲ့ အရည်အိတ်လေးက ထိုးဖောက်တဲ့ အတွက်ကြောင့်မို့လို့ပါ ။ ရာသီလာတာနဲ့လည်း မှားနိုင်ပါတယ် ။ ပုံမှန်အားဖြင့်တော့ ၃ရက်လောက်ပဲ ကြာတတ်ပြီး ကုသမှု ခံယူစရာမလိုပါဘူး ။ဒီအချိန်မှာတော့ ဆေးလိပ် ၊ အရက်သောက်တာတွေက သန္ဓေသားကို ထိခိုက်စေလို့ အသုံးမပြုသင့်ပါဘူး ။
– ၄ပတ် လက္ခဏာများ
သားအိမ်နံရံကို ထိုးဖောက်ပြီးသွားရင်တော့ ခန္ဓာကိုယ်က human chorionic gonadotropin ( hCG ) ဆိုတဲ့ ဟော်မုန်းတစ်မျိုးကို ထုတ်ပေးပါတယ် ။ အဲ့ hCG က ကိုယ်ဝန်ကိုတည်မြဲအောင် လုပ်ပေးပြီး တစ်လတစ်ခါ မမျိုးဥကြွေတာကိုလည်း ရပ်ပေးလိုက်တာကြောင့် ရာသီမလာတော့ပါဘူး ။
– ၄ပတ် ( သို့ ) ၅ပတ် လက္ခဏာများ
အလွယ်တကူ နုံးနွယ်လာနိုင်တဲ့ အဓိက တရားခံကတော့ progesterone ဆိုတဲ့ ဟော်မုန်း မြင့်တက်လာပြီး အိပ်ချင်စိတ်ဖြစ်ပေါ်အောင် လုပ်နေလို့ပါ ။ အိပ်ရေးဝဝ အိပ်သင့်ပါတယ် ။
– ၄ပတ်ကနေ ၆ပတ် လက္ခဏာများ
ရင်သားတစ်ဝိုက်တင်းလာပြီး ပိုဖွံ့ထွားလာပါမယ် ။
ကိုယ်ဝန်ဆောင်ကာလအတွင်းမှာ နှလုံးကပုံမှန်ထပ်ပုံပြီး အလုပ်လုပ်ပါတယ် ။ ဒါကြောင့်မို့ ကျောက်ကပ်ကိုလည်း အလုပ်များများလိုက်လုပ်တာကြောင့် ဆီးအိမ်ထဲကို ဆီများများရောက်စေပါတယ် ။ အပေါ့ခဏခဏသွားတာ ၊ ဆီးထွက်သွားတာ မသိလိုက်တာမျိုးတွေ ဖြစ်တတ်ပါတယ် ။နောက်တစ်ခကတော့ ထွက်လာတဲ့ဟော်မုန်းတွေက အစာချေတဲ့လုပ်ငန်းကိုလည်း နှေးကွေးစေပါတယ် ။ ရလဒ်ကတော့ ရင်ပြည့်တာ ၊ ဝမ်းချုပ်တာတွေ ဖြစ်စေနိုင်ပါတယ် ။
– ၅ပတ်ကနေ ၆ပတ် လက္ခဏာများ
ပျို့တာ ၊ အန်တာတွေကိုတော့ Morning sickness လို့ သိကြတာများပါတယ် ။ တစ်နေ့လုံးလည်း ဖြစ်နိုင်ပါတယ် ။ အများစုကတော့ ပထမ ၃လ ပြီးသွားရင် သက်သာသွားတာများပါတယ် ။
– ၆ပတ် လက္ခဏာများ
ဒီအချိန်ရောက်လာရင်တော့ Oestrogen နဲ့ Progesterone ဆိုတဲ့ ဟော်မုန်း ၂ မျိုးက မြင့်တက်နေပါပြီ ။ အဲ့ဟော်မုန်းတွေ များလာတာကြောင့် ပုံမှန်ထက်ပိုပြီးတော့ စိတ်အရမ်းခံစားလွယ်လာပါတယ် ။ စိတ်ဓာတ်ကျတာ ၊ ဆတ်ဆတ်ထိမခံတော့တာ ၊ စိတ်အရမ်းလှုပ်ရှားလွယ်တာတို့ ဖြစ်တတ်ပါတယ် ။၆ပတ်မြောက်မှာ ပုံမှန် ကိုယ်အပူချိန်ထက်လည်း နည်းနည်းများနေတတ်ပါသေးတယ် ။ လေ့ကျင့်ခန်းလုပ်တာ ၊ ရာသီဥတုပူတာတို့ ဖြစ်လာရင် ကိုယ်အပူချိန်မြင့်တက်လာတဲ့ အတွက်ကြောင့်မို့ ရေများများသောက်ပြီး သတိနဲ့ လေ့ကျင့်ခန်း လုပ်သင့်ပါတယ် ။
– ၈ပတ် လက္ခဏာများ
အများအားဖြင့်တော့ တက်လာတဲ့ သွေးပေါင်ချိန်တွေက ကိုယ်ဝန်အစပိုင်းမှာပဲ ဘာနဲ့မှမကုသပဲနဲ့ သူ့အလိုလို ပျောက်သွားတတ်ပါတယ် ။ တကယ်လို့ ပြန်မကျဘူးဆိုရင်တော့ မိခင်ရော ၊ ကလေးပါ ထိခိုက်နိုင်တဲ့ အတွက်ကြောင့်မို့လို့ ဆရာဝန်နဲ့ အမြန်တိုင်ပင်သင့်ပါတယ် ။
– ၉ပတ် လက္ခဏာများ
ကိုယ်ဝန်ကြောင့် ထွက်လာတဲ့ ဟော်မုန်းတွေက အစာအိမ်နဲ့ အစာရေမျိုလမ်းကြောင်းကို ကျယ်လာစေတဲ့ အတွက်ကြောင့်မို့လို့ အစာအိမ်ထဲက အစာတွေပြန်တက်လာနိုင်ပြီး ရင်ပူတတ်ပါတယ် ။
– ၈ပတ်ကနေ ၁၀ပတ် လက္ခဏာများ
ဒီအပတ်တွေမှာတော့ နှလုံးကပုံမှန်ထက် ပြင်းပြင်းနဲ့ မြန်မြန်ခုန်နေမှာပါ ။ ရင်တုန်တာတွေလည်း ရှိလာနိုင်ပြီး ဟော်မုန်းတွေကြောင့်ပဲ ဖြစ်တာပါ ။ စိတ်ပူစရာမရှိပေမဲ့ နှလုံးရောဂါရှိရင်တော့ ဆရာဝန်နဲ့ တိုင်ပင်ပြီး နှလုံးဆေးအနည်းငယ်ကို မှိဝဲလို့ရပါတယ် ။
– ၁၁ပတ် လက္ခဏာများ
နို့သီးနားတစ်ဝိုက်က Areola လို့ခေါ်တဲ့ အစိတ်အပိုင်းလေးကလည်း ပိုမိုကြီးထွားလာပြီး ပို အရောင်ရင့်လာပါမယ် ။ဝက်ခြံပေါက်လေ့ရှိသူတွေကလည်း ဝက်ခြံပြန်ထွက်လာနိုင်ပါတယ် ။နောက်တစ်ခုက ကိုယ်အလေးချိန် သိသိသာသာ တက်လာတာပါ ။ စားသောက်တဲ့ပုံစံ မပြောင်းပေမဲ့ တက်လာတဲ့ အကြောင်းရင်းကတော့ ရင်သား ၊ သားအိမ် ၊ ရေမွှာရေ ၊ အချင်း ၊ သွေးလည်ပတ်မှုတွေ ကြီးထွားပြီး များလာလို့ ဖြစ်ပါတယ် ။ ၃လအတွင်း ၄ပေါင်လောက် တက်နိုင်ပါတယ် ။
– ၁၂ပတ် လက္ခဏာများ
ဒီအချိန်မှာတော့ မေမေတွေကို လှလာတယ်လို့ ပြောကြပါလိမ့်မယ် ။ အဆီဂလင်းတွေ နဲ့ ဟော်မုန်းတွေရဲ့ ပူးပေါင်းလုပ်ဆောင်မှုကြောင့် အသားအရေတွေက စိုပြေပြီးတောက်ပနေမှာပါ ။ တစ်ဖက်မှာလည်း အဆီဂလင်းတွေ အရမ်းအလုပ်လုပ်လာတဲ့ အတွက်ကြောင့်မို့ ဝက်ခြံတွေ ပေါက်လာနိုင်သေးပါတယ် ။
နိဂုံးချုပ်ရရင်တော့ ဒီလက္ခဏာတွေအများစုက ကိုယ်ဝန် ၃လပြီးတာနဲ့ ပျောက်သွားတတ်ပါတယ် ။ တကယ်လို့ လက္ခဏာတွေ လျော့ပါးသွားအောင် လုပ်ချင်ရင်လည်း သားဖွားမီးယပ် ဆရာဝန်များနဲ့ တိုင်ပင်ဆွေးနွေးလို့ရကြောင်း တင်ပြလိုက်ရပါတယ် ။ ။
Dr.Z
