ကလေးငယ်များမှာအဖြစ်များတဲ့ လေပြွန်လေးများရောင်ရမ်းခြင်းပိတ်ခြင်းကို ဆေးပညာအရ Bronchiolitis လို့ခေါ်ပါတယ်။
၂နှစ်အောက်ကလေးငယ်လေးတွေမှာအဖြစ်များပြီး အထူးသဖြင့် ၁လကနေ ၉လကြား အသက်အရွယ်မှာပိုမိုဖြစ်ပွားပါတယ်။
ဆောင်းရာသီမှာပိုပြီးဖြစ်လေ့ရှိပါတယ်။
Bronchiolitis ဖြစ်တဲ့ အဓိကအကြောင်းအနေနဲ့ကတော့ Respiratory Syncitial Virus,Influenza Virus,Parainfluenza Virus,Adeno virus ဆိုတဲ့ ဗိုင်းရပ်စ်ပိုးတွေ ဝင်ရောက်ကူးစက်ခြင်းခံရလို့ပါ။
ဒီဗိုင်းရပ်စ်တွေထဲမှာမှ အများဆုံးဝင်ရောက်ကူးစက်တဲ့ဗိုင်းရပ်စ်ကတော့ Respiratory Syncitial Virus(RSV) ပဲဖြစ်ပါတယ်။
Bronchiolitis ဖြစ်တဲ့ကလေးအယောက်၁၀၀မှာ အယောက်၇၀ကျော်လောက်ဟာ ဒီRSV ဗိုင်းရပ်စ် ကူးစက်တာကြောင့်ဖြစ်လေ့ရှိပါတယ်။
အများအားဖြင့်တော့ အသက်ရှုလမ်းကြောင်းကတဆင့် ဝင်ရောက်ကူးစက်ပါတယ်။
ဗိုင်းရပ်စ်ပိုးတွေက လေပြွန်ငယ်လေးတွေကို ရောင်ရမ်းစေပြီး၊လေပြွန်ငယ်လေးတွေထဲမှာချွဲသလိပ်တွေကိုဖြစ်စေကာ အသက်ရှုရခက်စေပါတယ်။
ရောဂါလက္ခဏာတွေအနေနဲ့ကတော့ ဖျားတာ၊ချောင်းဆိုးတာ၊နှာချေတာ၊အစာသိပ်မဝင်တာ၊ပျို့အန်တာ၊အသက်ရှုတဲ့အခါမှာတရွှီရွှီမြည်တာ၊ဖြူဖျော့တာ၊နှုတ်ခမ်းပြာတာ၊နှလုံးခုန်မြန်တာ စသဖြင့်ဖြစ်နိုင်ပါတယ်။
စမ်းသပ်စစ်ဆေးမှုတွေအနေနဲ့ကတော့ လည်ပင်းနဲ့နှာခေါင်းက အကျိအချွဲကိုယူစစ်တာ၊ရင်ဘတ်ဓါတ်မှန်ရိုက်တာ၊သွေးဖောက်စစ်တာ စသဖြင့်လုပ်နိုင်ပါတယ်။
ကုသမှုအနေနဲ့ကတော့ ဗိုင်းရပ်စ်ပိုးကြောင့်ဖြစ်တာဖြစ်လို့ တိကျတဲ့ဆေးတော့မရှိပါဘူး။ရောဂါခံစားရတာသက်သာအောင် အောက်စီဂျင်ပေးတာ၊အရည်များများတိုက်တာတွေလုပ်နိုင်ပါတယ်။
လမစေ့ဘဲမွေးတဲ့ကလေးတွေ၊မွေးရာပါနှလုံးရောဂါ၊အဆုတ်နဲ့ပတ်သက်တဲ့ရောဂါအခံရှိတဲ့ကလေးတွေမှာရောဂါအခြေအနေက ပိုဆိုးနိုင်ပါတယ်။
ပိုဆိုးတဲ့အခြေအနေတွေမှာဆိုရင်တော့ အသက်ရှုလမ်းကြောင်းထဲပိုက်ထည့်ပြီးစက်နဲ့ရှုတာ(Intubation and Ventilation) တွေလည်းလုပ်နိုင်ပါတယ်။
အများအားဖြင့်တော့ ဒီရောဂါဟာ နောက်ဆက်တွဲဆိုးကျိုးမကျန်ဘဲ ပြန်ကောင်းသွားလေ့ရှိပါတယ်။သို့သော် ပြန်ပြန်ဖြစ်တတ်ပါတယ်။
Bronchiolitis မဖြစ်အောင် ရာနှုန်းပြည့်ကာကွယ်နိုင်တဲ့ကာကွယ်ဆေးတော့မရှိသေးပါ။သို့သော် Bronchiolitis ဖြစ်စေရာမှာ ၇၀ရာခိုင်နှုန်းကျော်ပါဝင်တဲ့ Respiratory Syncitial Virus ကိုကာကွယ်နိုင်တဲ့ထိုးဆေးကိုတော့ အဖြစ်များတဲ့ကာလတွေမှာ လစဉ်ထိုးပေးတာမျိုးလုပ်နိုင်ပါတယ်။
တခြားကာကွယ်နည်းတွေအနေနဲ့ကတော့ မိမိကလေးကို ကိုယ်ခံအားကောင်းဖို့အတွက် အာဟာရပြည့်စုံအောင်ကျွေးပါ။တကိုယ်ရေသန့်ရှင်းရေးကိုဂရုစိုက်ပါ။
လူထူထပ်တဲ့နေရာ၊ချောင်းဆိုးနှာစေးဖြစ်နေတဲ့သူတွေရဲ့အနီးနား၊ဆေးလိပ်သောက်တတ်တဲ့သူရဲ့အနီးနား စတဲ့နေရာတွေကို မိမိကလေး မသွားမိအောင်ဂရုစိုက်ပါ။
Dr. 528
