အရင်ဆုံး ပရီဘိုင်အိုးတစ်(Prebiotics) ဆိုတဲ့ နည်းနည်းစိမ်းနေသေးမဲ့ စကားလုံးတစ်ခုနဲ့ အရင်မိတ်ဆက်ပေးချင်ပါတယ်။
ပရိုဘိုင်အိုးတစ်(probiotics) ဆိုတဲ့ စကားလုံးကိုတော့ နည်းနည်းပိုလူသိများပါတယ်။
ဝမ်းပျက်ရင် Probiotics သောက်ပါ.. အစာမကြေရင် Probiotics သောက်ပါ စတဲ့ စကားလုံးတွေ ကြားဖူးကြမှာပါ။
Prebiotics ဆိုတာဘာလဲ ?
ပရီဘိုင်အိုးတစ်ဆိုတာကို မရှင်းခင် ပရိုဘိုင်အိုးတစ်ဆိုတာကို အရင်သိဖို့လိုပါတယ်။
ကျွန်တော်တို့စားသောက်လိုက်တဲ့ အစာတွေအကုန်လုံးကို အစာအိမ်ထဲမှာ အတော်အသင့်ခြေပြီးတဲ့အခါ အူထဲကိုပို့ပြီး ဆက်လက်ခြေဖျက်စေရပါတယ်။
ဒီနေရာမှာ အူထဲက အကျိုးပြုဘက်တီးရီးယားလေးတွေ ၊ မှိုပိုးလေးတွေ ရဲ့ အကူအညီယူရပါတယ်။
ဒီအကျိုးပြုဘက်တီးရီးယားလေးတွေကို ပရိုဘိုင်အိုးတစ်လို့ခေါ်ပါတယ်။
Lactobaccilus, Bifidobacterium, Saccharomyces Boulardii စသည်ဖြင့် Probiotcs အမျိုးအစားကွဲတွေရှိပါတယ်။
ဒီပရိုဘိုင်အိုးတစ်တွေ အင်အားနည်းလာတဲ့အခါ ချို့တဲ့တဲ့အခါမှာ ဝမ်းပျက်တာ၊ အစာမကြေတာ၊ ဗိုက်ကယ်တာ၊ ရင်ပြည့်တာ၊ စိတ်မရွှင်လန်းစိတ်ဓာတ်ကျလာတာ၊ ဗီတာမင်ဓာတ်တွေပါချို့တဲ့လာတာ စတဲ့ ပြဿနာတော်တော်များများဖြစ်လာတတ်ပါတယ်။
တခါတလေမှာ နေမကောင်းဖြစ်ချိန် ပဋိဇီဝဆေးတွေသောက်မိတဲ့အခါမျိုးမှာ ဒီအကျိုးပြုပိုးကောင်လေးတွေပါ သေသွားတတ်ပြီး ဝမ်းပျက်တာ၊ အန်ချင်တာစတဲ့ လက္ခဏာတွေပေါ်လာတတ်ပါတယ်။
ဒီအခါမှာ ဒီပရိုဘိုင်အိုးတစ်တွေကို ဆေးအနေနဲ့လည်း ပြန်သောက်နိုင်သလို ပရိုဘိုင်အိုးတစ်ကြွယ်ဝတဲ့ ဒိန်ချဉ်လို အစားအသောက်တွေပြန်စားပေးပြီးတော့လည်း ပြန်အဆင်ပြေစေနိုင်ပါတယ်။
ပရိုဘိုင်အိုးတစ်ပိုးကောင်လေးတွေရဲ့ အစာကတော့ အပေါ်မှာပြောခဲ့တဲ့ ပရီဘိုင်အိုးတစ်(Prebiotics)ပါပဲ။
Prebiotics တွေကို ဘယ်ကရမလဲ ?
Prebiotics တွေကိုတော့ များသောအားဖြင့် အသီးအနှံ အသီးအရွက်တွေကရပါတယ်။
အစာအိမ်က မခြေဖျက်နိုင်တဲ့ အမျှင်ဓာတ်တွေ ဖြစ်ပါတယ်။
ခန္ဓာကိုယ်တွင်းကနေဆိုရင် မိခင်နို့က ရနိုင်ပြီး ခန္ဓာကိုယ်ပြင်ပကနေဆိုရင်တော့ အစားအသောက်တွေက ရနိုင်သလို ဆေးဝါးအနေနဲ့ပါ ထုတ်လုပ်ရောင်းချတာတွေလည်း ရှိပါတယ်။
အခုနောက်ပိုင်းမှာဆိုရင် တချို့သော ကလေးဆေးဝါးတွေ၊ နို့မှုန့်တွေမှာ Prebiotics တွေကိုပါ ထည့်သွင်းဖော်စပ်ပြီး ကလေးတွေရဲ့ အစာခြေစနစ်ပိုကောင်းအောင် အားဖြည့်ပေးလာတာလည်း တွေ့ရပါတယ်။
Fructo Oligosaccharides(Fos) နဲ့ Glacto Oligosaccharides(Gos) တွေရယ်လို့ အမျိုးအစားကွဲတွေရှိပါတယ်။
များသောအားဖြင့် တော်တော်များများဟာ ကိုယ့်ကိုယ်ကို ပရီဘိုင်အိုးတစ်တွေ စားလို့စားမိနေမှန်းမသိတာလည်း ဖြစ်တတ်ပါတယ်။
ဘယ်အစားအသောက်တွေက ပရီဘိုင်အိုးတစ်ကြွယ်ဝတဲ့ အူကို အကျိုးပြုတဲ့ အစားအသောက်တွေဖြစ်တယ်ဆိုတာ သိထားရင် မိမိကလေးကို ငယ်စဉ်ကတည်းက အူကျန်းမာရေးအတွက် အစားအသောက်အလေ့အကျင့်ကောင်းကောင်း မွေးမြူပေးနိုင်မှာဖြစ်ပါတယ်။
Prebiotics ကြွယ်ဝတဲ့ အစားအစာတွေက ဘာတွေလဲ ?
– ငှက်ပျောသီး
– ပန်းသီး
– ကြက်သွန်နီ
– ကြက်သွန်ဖြူ
– ကြက်သွန်မြိတ်
– ကညွတ်
– ဂျေရုစလင် artichoke
– ပန်းသီး
– chicory အမြစ်
– Dandelion green အရွက်
စတာတွေကတော့ ပရီဘိုင်အိုးတစ်ကြွယ်ဝတဲ့ အစာခြေစနစ်ကို အထောက်အကူပြုတဲ့ အစားအစာတွေပဲဖြစ်ပါတယ်။
ကလေးတိုင်း ကျန်းမာပျော်ရွှင်ကြပါစေ..
Dr ဖြိုးဝေလင်း
