အောက်ဖော်ပြပါအချက်များသည် သားသားမီးမီးတို့ အအေးမိချောင်းဆိုးဖြစ်သည့်အခါ မေမေတို့ အနေဖြင့် သိထားသင့်သော အချက်များဖြစ်ကြပါသည်။
(၁) ခုခံအားစနစ်ကောင်းမွန်စေရန် အာဟာရပြည့်၀သော အစားအစာများနှင့် ဗီတာမင်ဖြည့်စွက်အားဆေးများ တိုက်ကျွေးပါ
အအေးမိတုပ်ကွေးရောဂါဖြစ်ရခြင်း၏ အဓိကအကြောင်းရင်းမှာ ခန္ဓာကိုယ်၏ ကိုယ်ခံစွမ်းအားစနစ် ကျဆင်းသောအချိန်တွင် ရောဂါပိုးကူးစက်ခြင်းကြောင့် ဖြစ်ပါသည်။ထို့ကြောင့် ကလေးများအအေးမိနှာစေးချောင်းဆိုးအမြန်သက်သာစေရန် အောက်ပါအစားအစာများကို ပိုမိုကျွေးမွေးသင့်ပါသည်။
– အစိမ်းရောင်အရွက်ရှိသော ဟင်းသီးဟင်းရွက်များ
– ပန်းသီး၊ လိမ္မော်သီး၊ စပျစ်သီး၊ နာနတ်သီး၊ ပန်းသစ်တော်သီးအစရှိသော သစ်သီး အမျိုးမျိုး
– ကြက်ဥ
– နွားနို့
– ထမင်း၊ ဆန်ပြုတ်၊ ပေါင်မုန့်စသော ကစီဓာတ်များသော အစားအစာများ
– ကြက်စွပ်ပြုတ်ရည်
– အုန်းရည် စသည်
ထို့ပြင် အောက်ပါ ဖြည့်စွက်အာဟာရများနှင့် ဗီတာမင်များကလည် ကိုယ်ခံစွမ်းအားကို မြှင့်တင်ပေးနိုင်ပါသည်။
Probiotics
အူလမ်းကြောင်းတွင်ရှိသော အကျိုးပြုဗက်တီးရီးယားများဖြစ်သည့် Probiotics သည် ခုခံအားစနစ်ကို မြှင့်တင်ပေးနိုင်သော အာနိသင်လည်းရှိသောကြောင့် အအေးမိချောင်းဆိုးနေသော ကလေးများ အမြန်သက်သာစေရန် တိုက်ကျွေးသင့်ပါသည်။
Vitamin C
ဗီတာမင်ဓာတ်များတွင် ဗီတာမင် စီ သည် ခုခံအားစနစ်ကိုကောင်းမွန်စေသော အစွမ်းအာနိသင် အပြည့်အ၀ရှိကြောင်း တွေ့ရှိရပါသည်။ထို့ကြောင့် တုပ်ကွေးရောဂါခံစားနေရသော ကလေးများအား ဗီတာမင် စီ ပါဝင်သော အားဆေးဖြည့်စွက်စာများ တိုက်ကျွေးရန်လိုအပ်ပါသည်။
Zinc
ဇင့်ဓာတ်သည် ခန္ဓာကိုယ်၏ခုခံအားစနစ်ကို မြင့်တက်စေနိုင်သော အာဟာရသတ္တုဓာတ်တစ်မျိုး ဖြစ်သောကြောင့် ဖျားနာနေသော သားသားမီးမီးများအမြန်သက်သာပျောက်ကင်းစေရန် ဇင့်ဓာတ် ပါသော အားဆေးများတိုက်ကျွေးပေးပါ။
( ၂ ) အရည်များများတိုက်ကျွေးပါ
အရည်များများသောက်ခြင်းကြောင့် ရောဂါလက္ခဏာများသက်သာစေခြင်းမဟုတ်ပါ။
သို့သော် ဖျားနာသည့်အခါ ရေဓာတ်လျော့နည်းခြင်းတွဲ၍ ရှိနေတတ်သောကြောင့် ရေ၊ သို့မဟုတ် အာဟာရပြည့်၀သော အရည်များကို များများတိုက်ကျွေးပေးခြင်းဖြင့် ကလေးများအား ရေဓာတ်ပြန်လည်ဖြည့်တင်းပေးနိုင်မည် ဖြစ်ပါသည်။
အာဟာရဓာတ်ပြည့်၀သော အရည်များမှာ
– အိုဗာတင်း
– မိုင်လို
– ဟောလစ်
– ကြက်စွပ်ပြုတ်ရည်
– ဓာတ်ဆားရည် စသည်တို့ဖြစ်ပါသည်။
( ၃ ) အဖျားကျအောင် ပြုလုပ်ပါ
အဖျားကြီးသော ကလေးများအား ပြုစုရာတွင် အောက်ပါအချက်များကို သတိပြုရန်လိုအပ်ပါသည်။
– ထူထပ်သော အဝတ်များဝတ်ဆင်ပေးခြင်းမပြုရပါ။
– စောင်များထူထဲစွာ ခြုံပေးထားခြင်းမပြုရပါ။
– အဖျားအမြန်ကျစေရန် ရေပတ်တိုက်ပေးပါ။
– ကလေးများအားလေဝင်လေထွက်ကောင်းသော နေရာတွင်ထားပါ။
– ကလေးများ အဖျားကြီးခြင်းကြောင့် တက်ခြင်း၊ အာရုံကြောစနစ် ထိခိုက်ခြင်းမှ ကာကွယ်ရန် နဖူးကပ် အဖျားကျပလာစတာကို ကပ်ထားပေးပါ။
( ၄ ) ပျားရည်နှင့် ရေနွေး ရောတိုက်ပါ
ထို့ပြင် ပျားရည်ကို ရေနွေးနွေးဖြင့် ရော၍တိုက်ပေးခြင်းဖြင့်လည်း ကလေးများ ချောင်းဆိုးလည်ပင်းနာ ဝေဒနာများကို သက်သာပျောက်ကင်းစေနိုင်ကြောင်းတွေ့ရှိရပါသည်။
( ၅ ) အိပ်ရေးဝပါစေ
အအေးမိချောင်းဆိုးနေသော ကလေးများအား ပုံမှန်အချိန်ထက်ပို၍ အိပ်စက်အနားယူစေခြင်းဖြင့် ကိုယ်ခံစွမ်းအားကောင်းမွန်စေကာ ရောဂါအမြန်သက်သာပျောက်ကင်းစေနိုင်မည်ဖြစ်ပါသည်။
( ၆ ) အောက်ပါအစားအစာများကို ကျွေးမွေးခြင်းမှ ရှောင်ကြဉ်ပါ
အအေးမိချောင်းဆိုးနေသော ကလေးများအား အောက်ပါအစားအစာများကို ကျွေးခြင်းမှ ရှောင်ကြဉ်သင့်ပါသည်။
ရေခဲချောင်း၊ ရေခဲမုန့်နှင့် အေးသော အချိုရည်များ
ဆီကြော်မုန့်များ
ချိုလွန်းသော အစားအစာများ (ဥပမာ – သကြားလုံး၊ ချောကလက်၊ ဂျယ်လီ) စသည်တို့ကို ကျွေးခြင်းမပြုသင့်ပါ။
Author: Dr. CK
