fbpx

Myanmar (Covid-19 Stats)

😷 49,072 Total Cases
😥 1,172 Deaths
😇 28,636 Recovered

ဗီတာမင်  A က ကလေးများရဲ့ ခန္ဓာကိုယ်အတွက် ဘယ်လိုအရေးပါသလဲ

ကလေးများ၏ ကျန်းမာရေးနှင့် ဖွံ့ဖြိုးရေးအတွက် ဗီတာမင် နှင့် သတ္တုဓာတ်များသည် အဓိကအရေးကြီးပါသည်။ အဆိုပါ ဗီတာမင်နှင့် သတ္တုဓာတ်များသည် ကလေးများ၏ ခန္ဓာကိုယ်ရှိ ဇီဝကမ္မဖြစ်စဉ်အမျိုးမျိုးတို့အတွက် မရှိမဖြစ် လိုအပ်သော Organic ဒြပ်ပေါင်းများ ဖြစ်ကြပါသည်။ ထိုသို့ အရေးပါသော ဗီတာမင်ဓာတ်များထဲမှ တစ်မျိုးမှာ ဗီတာမင် A ဖြစ်ပါသည်။ ဗီတာမင် A သည် ကလေးများ၏ အမြင်အာရုံဆိုင်ရာ၊ အရိုးကြီးထွားမှုဆိုင်ရာနှင့် ရောဂါများကို ကာကွယ်မှုဆိုင်ရာတို့တွင် အရေးပါသော အခန်းကဏ္ဍမှတည်ရှိ နေပါသည်။

 

ကလေးတို့၏ အမြင်အာရုံအတွက် ဗီတာမင် A ၏ အရေးပါမှု

ဗီတာမင် A သည် ကလေးတို့၏ မျက်လုံးအတွင်းရှိ မြင်လွှာပေါ်တွင်ရှိသော အလင်းလက်ခံဆဲလ်များတွင်ရှိသည့် rhodopsin ဟုခေါ်သည့် ပရိုတင်းတစ်မျိုး၏ မရှိမဖြစ် အစိတ်အပိုင်းတစ်ခုဖြစ်ပါသည်။ ထို့အပြင် ဗီတာမင် A သည် မျက်ကာအမြှေးပါးနှင့် မျက်ကြည်လွှာတို့၏ လုပ်ငန်းဆောင်တာများကိုလည်း ထောက်ပံ့ပေးနိုင်ပါသည်။ ဗီတာမင် A ချို့တဲ့လျှင် ကလေးများသည် မျက်ရည်မထုတ်လုပ်နိုင်သော မျက်လုံးခြောက်သွေ့သည့် ရောဂါကို ခံစားရနိုင်ပါသည်။ အဆိုပါ မျက်လုံးခြောက်သွေ့သည့် ရောဂါကို မကုသဘဲထားလျှင် မျက်စိကွယ်သည်အထိ ဆိုးရွားနိုင်ပါသည်။ ဗီတာမင် A ချို့တဲ့ခြင်းကြောင့် အမြင်အာရုံကွယ်သွားသည့် ကလေးငယ်အရေအတွက်သည် တစ်ကမ္ဘာလုံးတွင် တစ်နှစ်လျှင် ၂ သိန်းခွဲမှ ၅ သိန်းကြား ရှိမည်ဟု ခန့်မှန်းထားကြပါသည်။

 

ဗီတာမင် A နှင့် ကိုယ်ခံစွမ်းအား

ဗီတာမင် A သည် ခုခံအားစနစ်တွင် အရေးပါသည့် အခန်းကဏ္ဍမှ ပါဝင်ကြောင်းကို မကြာသေးသော နှစ်ပိုင်းများအတွင်းက သိရှိအလေးထားလာကြပါသည်။ မိခင်၏ ဝမ်းဗိုက်အတွင်းတွင် သန္ဓေဆောင်နေစဉ်ကာလမှ စတင်၍ ဗီတာမင် A ပြည့်ဝစွာ ရရှိခြင်းသည် ကလေး၏ ကိုယ်ခံအားစနစ် ဖွံ့ဖြိုးလာမှုအပေါ် လွှမ်းမိုးမှုများရှိသလို ကလေးဘဝတစ်လျှောက်လုံး ကူးစက်ရောဂါများကို တိုက်ဖျက်ပေးနိုင်သည့် စွမ်းဆောင်ရည်ကိုလည်း တိုးမြင့်လာစေပါသည်။ ထို့အပြင် ဗီတာမင် A တွင် ဓာတ်တိုးဆန့်ကျင် ဂုဏ်သတ္တိလည်းရှိသောကြောင့် ခန္ဓာကိုယ်၏ ခုခံအားစနစ်ကို မြင့်တက်စေပါသည်။ ထို့အပြင် ဗီတာမင် A သည် ခုခံအားစနစ်တွင် အရေးပါသည့် ဆဲလ်တစ်မျိုးဖြစ်သော T- ဆဲလ် များထုတ်လုပ်မှုကိုလည်း တိုးတက်စေပါသည်။ ကလေးများတွင် ဗီတာမင် A ချို့တဲ့ပါက ဝက်သက်ရောဂါ နှင့် ဝမ်းလျှောရောဂါ ကဲ့သို့သော ဖျားနာရောဂါများ ပိုမိုဖြစ်နိုင်ရန် အခွင့်အလမ်းပိုများစေပါသည်။ ထို့ကြောင့်ကလေးများတွင် ဗီတာမင် A ဖြည့်စွက်ကျွေးမွေးခြင်းသည် အရေးပါသည့် အစိတ်အပိုင်းတစ်ရပ်ဖြစ်လာပါသည်။

 

ဗီတာမင် A ကြွယ်ဝသော အစားအစာများ

ဗီတာမင် A ကို အောက်ပါအစားအစာများတွင် ကြွယ်ဝစွာတွေ့ရှိရပါသည်။

  • ဆော်လမွန်ငါး၊
  • ဆာဒင်းငါး
  • အသည်း၊
  • ဥအနှစ်များ ၊
  • ထောပတ် ၊
  • မလိုင်၊
  • ဒိန်ခဲ၊
  • နွားနို့၊
  • မုန်လာဥနီ၊
  • ဟင်းနုနွယ်၊
  • ကိုက်လန်၊
  • ပဲစိမ်း၊
  • ပင်လယ်ရေညှိ၊
  • ခရမ်းချဉ်သီး၊
  • သခွါးမွှေး၊
  • သရက်သီး၊
  • နိုကိုလီ၊
  • သင်္ဘောသီး စသည်တို့တွင် ကြွယ်၀ပါသည်။ ထို့ကြောင့် ကလေးများတွင် အလွန်အရေးပါလှသော ဗီတာမင် A ကို မချို့တဲ့အောင် ကြိုးစားကျွေးမွေးခြင်းအားဖြင့် ကလေးတို့၏ လှပသော အနာဂတ်ကို ဖန်တီးတည်ဆောက်နိုင်ပါစေကြောင်း ဆုမွန်ကောင်း တောင်းပေးလိုက်ပါသည်။

Author : Dr. Kyi

ဆက်စပ် ဆောင်းပါးများ