ကလေးတွေမှာ တစ်ခါတရံ ဖျားနာကြတာဟာ ပုံမှန်ဖြစ်ပေမဲ့ မိမိကလေးမကြာခဏဖျားနေတဲ့အခါမှာ စိုးရိမ်စိတ်တော့ ဝင်ကြမှာ အမှန်ပါပဲ။ ဒီလို မကြာခဏ ဖျားနေတဲ့အခါ ယခင်ကလို အိမ်မှာပဲ အဖျားပျောက်အောင် ပြုစုလိုက်ရုံနဲ့ မလုံလောက်နိုင်တော့ပါဘူး။ မကြာခဏဖျားရတဲ့ အကြောင်းရင်းကို ရှာဖွေနိုင်မှသာ မိမိကလေးအတွက် စိတ်ချနိုင်မှာဖြစ်ပါတယ်။
ကလေးတွေ ဘာကြောင့် မကြာခဏဖျားရတာလဲ
ဗက်တီးရီးယား၊ ဗိုင်းရပ်စ်၊ မှိုရောဂါ ဘယ်ရောဂါပိုး မဆို ခန္ဓာကိုယ်ထဲ ဝင်ရောက်လာတဲ့အခါ ဖျားနာစေပါတယ်။ ကလေးတွေမှာ မကြာခဏဖျားစေတဲ့ အကြောင်းရင်းတွေကတော့ –
၁။ Periodic Fever Syndrome
Periodic Fever Syndrome ဆိုတာဟာ မျိုးရိုးလိုက်ပြီးဖြစ်တတ်တဲ့ ဖျားနားခြင်းမျိုးဖြစ်ပါတယ်။ ပိုးဝင်ခြင်းတွေကြောင်း ဖျားနာတာမျိုး မဟုတ်ပါဘူး။ Periodic Fever Syndrome မှာ ခံစားရတာတွေကတော့ မကြာခဏဖျားခြင်း၊ ဗိုက်နာခြင်း၊ အဆစ်နာခြင်းနဲ့ ရင်ဘတ်အောင့်ခြင်းတို့ဖြစ်ပါတယ်။
၂။ Borrelia Burgdorferi
Borrelia Burgdorferi ဆိုတာ ခွေးသန်း၊ ကြောင်သန်းစတဲ့ အင်းဆက်ပိုးမွှားတွေ အကိုက်ခံရတဲ့အခါ ဖြစ်တတ်တဲ့ ရောဂါတစ်မျိုးဖြစ်ပါတယ်။ ဒီရောဂါဖြစ်တဲ့အခါ ဖျားခြင်း၊ ချမ်းတုန်ခြင်း၊ ကြွက်သားနာခြင်း၊ ပျို့ခြင်းနဲ့ ညဘက်ချွေးထွက်ခြင်းစတဲ့ လက္ခဏာတွေကို ခံစားရတတ်ပါတယ်။
၃။ Cyclic neutropenia
Neutrophils လို့ခေါ်တဲ့ သွေးဖြူဥဆဲလ်လေးတွေဟာ ခန္ဓာကိုယ်တွင်းသို့ ဝင်ရောက်လာတဲ့ ဗက်တီးရီးယားရောဂါပိုးမွှားတွေကို ခုခံတိုက်ခိုက်ပေးတဲ့ ဆဲလ်လေးတွေဖြစ်ပါတယ်။ Neutropenia ဆိုတာ သွေးဖြူဥတွေလျော့နည်းနေခြင်းဖြစ်ပါတယ်။ ဒီလိုသွေးဖြူဥလေးတွေ လျော့နည်းနေတဲ့အချိန်ဆိုရင် ရောဂါပိုးမွှားတွေကို မတိုက်ထုတ်နိုင်တော့ဘဲ မကြာခဏဖျားနာခြင်းကို ခံစားရနိုင်ပါတယ်။
၄။ သွားပြည်တည်နာဖြစ်ခြင်း
ကလေးငယ်တွေမှာ သွားပိုးစားခြင်းကို အတွေ့များရလေ့ရှိပါတယ်။ သွားပိုးစားခြင်းဟာ ပြင်းထန်ပြီး ပြည်တည်နာတွေဖြစ်လာပြီဆိုရင်တော့ သွားပိုးတွေဟာ သွေးတွင်းသို့ ပျံ့နှံ့သွားပြီး မကြာခဏဖျားနာခြင်းကို ဖြစ်စေနိုင်ပါတယ်။ သွားပိုးစားခြင်းနဲ့အတူ သွားနာခြင်း၊ ကိုယ်ပူခြင်း၊ ပါးစပ်နံခြင်း၊ မျက်နှာရောင်ရမ်းခြင်း စတာတွေပါခံစားရနိုင်ပါတယ်။
၅။ Leukaemia or Lymphoma
ကလေးတွေ မကြာခဏဖျားနေပြီဆိုရင် မမေ့သင့်တာကတော့ Leukaemia ဆိုတဲ့ သွေးကင်ဆာပဲဖြစ်ပါတယ်။ Leukaemia ဖြစ်နေပြီဆိုရင် သွေးဖြူဥဆဲလ်တွေ လျော့နည်းနေတာကြောင့် မကြာခဏရောဂါပိုးတွေဝင်ရောက်ပြီး ဖျားနာတတ်ပါတယ်။ မကြာခဏဖျားခြင်းအပြင် ခန္ဓာကိုယ်မှာ အညိုအမဲအကွက်တွေဖြစ်ခြင်း၊ သွေးအားနည်းခြင်း၊ အသည်းကြီးခြင်း၊ ကိုယ်အလေးချိန်လျော့ကျခြင်းနဲ့ မောပန်းခြင်းစတာတွေပါ ခံစားနေရရင်တော့ သွေးကင်ဆာကို သံသယရှိသင့်ပါတယ်။
၆။ Crohn’s Disease
Chron’s disease ဆိုတာ အူမကြီးနဲ့ အူလမ်းကြောင်းတစ်လျှောက် ရောင်ရမ်းခြင်းဖြစ်တဲ့ ရောဂါတစ်မျိုးဖြစ်ပါတယ်။ ရောဂါပြင်းထန်လာလေ ကုသရခက်ခဲလေဖြစ်တဲ့ ရောဂါတစ်မျိုးဖြစ်ပါတယ်။ ဖျားနာခြင်းအပြင် သွေးဝမ်းသွားခြင်း၊ အစာအာဟာရချို့တဲ့ခြင်းတို့ပါခံစားနေရမယ်ဆိုရင်တော့ Crohn’s Disease ဖြစ်နိုင်ခြေများပါတယ်။
၇။ Juvenile Idiopathic Arthritis
ကလေးတွေမှာတွေ့ရတဲ့ အဆစ်ရောင်ရောဂါတစ်မျိုးဖြစ်ပါတယ်။ တစ်ခါတစ်ရံ အချိန်ကြာမြင့်စွာ ခံစားရတတ်ပြီး မကြာခဏဖျားနာခြင်း၊ နုံးခြင်း၊ ဒူး၊ လက်ကောက်ဝတ်နဲ့ ခြေကျင်းဝတ်အဆစ်တွေရောင်ရမ်းနာကျင်ခြင်း စတာတွေပါခံစားရနိုင်ပါတယ်။
ဖျားနာနေတဲ့ကလေးတွေကို ဘယ်လိုကုသပေးရမလဲ
၁။ အရည်များများတိုက်ပေးပါ
ဖျားနာခြင်းဟာ ရေဓာတ်ဆုံးရှုံးစေနိုင်တာကြောင့် အရည်များများပြန်တိုက်ပေးဖို့ အလွန်အရေးကြီးပါတယ်။ ဆုံးရှုံးသွားတဲ့ ရေဓာတ်အပြင် Electrolytes တွေပါပြန်လည်ဖြည့်တင်းနိုင်အောင် ဓာတ်ဆားတိုက်ပေးတာက အကောင်းဆုံးဖြစ်ပါတယ်။
၂။ ရေပတ်တိုက်ခြင်း
ကလေးကိုယ်ပူမြန်မြန်ကျဖို့အတွက်ဆိုရင် ရေပတ်တိုက်ပေးခြင်းဟာလည်း အကောင်းဆုံးနည်းလမ်းတွေထဲကတစ်ခုဖြစ်ပါတယ်။
၃။ ကလေးကို စောင်အထူကြီးတွေနဲ့ထုပ်ထားခြင်းမျိုးကို ရှောင်ပါ
ကလေးဖျားရင် စောင်အထူကြီးတွေနဲ့ ခြုံတာဟာအယူအဆအမှားပဲ ဖြစ်ပါတယ်။ ကိုယ်ပူနေချိန်မှာ အထူကြီးခြုံထားခြင်းဟာ အပူတွေလှောင်ထားသလိုဖြစ်ပြီး ပိုဆိုးလာစေနိုင်ပါတယ်။ ကလေးချမ်းနေပြီဆိုရင် ချည်သားစောင် ဒါမှမဟုတ် ကလေးသက်တောင့်သက်သာဖြစ်စေမယ့် စောင်မျိုးကိုသာ ခြုံပေးထားသင့်ပါတယ်။
၄။ ဆရာဝန်နဲ့ပြသပါ
ကလေးဖျားတာ ၂ ရက်ထက်ကျော်နေပြီဆိုရင်တော့ ဆရာဝန်နဲ့ဆိုင်ပင်ပြသသင့်ပါတယ်။ အိမ်တွင်းအဖျားကျအောင် ကုသပေးလို့ရနိုင်ပေမဲ့ ဆရာဝန်နဲ့ပြသမှသာ ကလေးမကြာခဏဖျားနာရခြင်းအကြောင်းအရင်းကို စမ်းသပ်ပေးနိုင်မှာဖြစ်ပါတယ်။
မေမေဖေဖေတို့အနေနဲ့ ကလေးတွေဖျားနာရင် စိုးရိမ်ပူပန်တတ်ကြတာဟာ ဓမ္မတာပဲဖြစ်ပါတယ်။ ကလေးငယ်တွေဟာ မိမိကိုယ်ကို မစောင့်ရှောက်နိုင်သေးတာကြောင့် ကလေးတွေရဲ့ကျန်းမာရေးဟာ မိဘတွေအပေါ်မှာ အလုံးစုံမူတည်နေမှာဖြစ်ပါတယ်။ ဒါကြောင့် မေမေဖေဖေတို့ဟာ ကလေးမကြာခဏဖျားနာရတဲ့အကြောင်းအရင်းတွေကို သေချာနားလည်သိရှိပြီး ကလေးဖျားနာတဲ့အချိန် မှန်ကန်တဲ့နည်းလမ်းတွေစနစ်တကျ ကျင့်သုံးနိုင်ဖို့ အလွန်အရေးကြီးပါတယ်။
Author: Dr. Aye Myat